Sekariah 2

2 ¹Nígbà náà ni mo gbé ojú sókè, mo sì rí ọkùnrin kan tí ó ní okùn ìwọ̀n ní ọwọ́ rẹ̀. ²Mo béèrè pé, “Níbo ni ìwọ ń lọ?” Ó sì wí fún mi pé, “Láti wọ̀n Jerusalemu, láti rí bí ó ti fẹ̀ tó àti bí ó ti gùn tó.”

³Áńgẹ́lì tí ó ń bá mi sọ̀rọ̀ sì jáde lọ, áńgẹ́lì mìíràn sì jáde wá pàdé rẹ̀, ⁴ó sì wí fún un pé, “Sáré, sọ fún ọ̀dọ́mọkùnrin yìí pé: ‘Jerusalemu yóò máa gbé bí ilẹ̀ gbangba, pẹ̀lú ọ̀pọ̀lọpọ̀ ènìyàn àti ẹran ọ̀sìn tí ó wà nínú rẹ̀.’

⁵Èmi fúnra mi yóò jẹ́ ògiri iná yí i ká, ni Baba wa wí, èmi yóò sì jẹ́ ògo tí ń bẹ nínú rẹ̀.’”

⁶“Wá! Wá! Sá kúrò ní ilẹ̀ àríwá, ni Baba wa wí, nítorí mo ti tú yín ká bí ẹ̀fúùfù mẹ́rin ọ̀run, ni Baba wa wí. ⁷Wá, Sioni! Sá àsálà, ìwọ tí ó ń gbé pẹ̀lú ọmọbìnrin Babeli.

⁸Èyí ni ohun tí Baba àwọn ọmọ ogun ọ̀run wí—lẹ́yìn tí ògo rẹ̀ rán mi lòdì sí àwọn orílẹ̀-èdè tí wọ́n kó ẹrù yín lọ: ẹnikẹ́ni tí ó bá fọwọ́ kàn yín, ó fọwọ́ kan ọmọ ojú rẹ̀:

⁹Nítorí wò ó, èmi yóò gbé ọwọ́ mi sókè sí wọn, wọn yóò sì di ìkógun fún àwọn tí ó ti sìn wọ́n. Nígbà náà ni ẹ̀yin yóò mọ̀ pé Baba àwọn ọmọ ogun ọ̀run ni ó rán mi.

¹⁰Kọrin kí o sì yọ̀, ọmọbìnrin Sioni! Nítorí wò ó, mò ń bọ̀ wá máa gbé àárín yín, ni Baba wa wí.

¹¹“Ọ̀pọ̀ orílẹ̀-èdè yóò darapọ̀ mọ́ Baba wa ní ọjọ́ náà, wọn yóò sì di ọmọ mi. Èmi yóò máa gbé àárín yín, ẹ̀yin yóò sì mọ̀ pé Baba àwọn ọmọ ogun ọ̀run ni ó rán mi sí yín. ¹²Baba wa yóò sì gba Juda gẹ́gẹ́ bí ìpín rẹ̀ ní ilẹ̀ mímọ́ náà, yóò sì tún yan Jerusalemu.

¹³Ẹ dákẹ́ jẹ́ẹ́, gbogbo ẹ̀dá, níwájú Baba wa, nítorí ó ru ara rẹ̀ sókè kúrò ní ibùgbé mímọ́ rẹ̀.”