சகரியா 2

2 ¹பின்பு நான் என் கண்களை ஏறெடுத்துப் பார்த்தபோது, தமது கையில் அளவுநூலைப் பிடித்திருந்த ஒரு மனிதனைக் கண்டேன். ²நான், “நீர் எங்கே போகிறீர்?” என்று கேட்டேன். அதற்கு அவர், “எருசலேமை அளந்து, அதின் அகலம் எவ்வளவு, நீளம் எவ்வளவு என்று பார்க்கப் போகிறேன்” என்று என்னிடம் சொன்னார்.

³என்னோடே பேசின தூதன் புறப்பட்டுப்போனான்; அப்பொழுது வேறொரு தூதன் அவனைச் சந்திக்கும்படி வெளியே வந்து, ⁴அவனை நோக்கி, “நீ ஓடி, இந்த வாலிபனிடம் சொல்லவேண்டியது: ‘எருசலேம் தன்னில் இருக்கும் திரளான ஜனங்களினாலும் மிருகஜீவன்களினாலும், மதிலில்லாத வெளிநிலம்போல் குடியேறியிருக்கும்.’

⁵நான்தானே அதைச் சுற்றிலும் அக்கினி மதிலாய் இருப்பேன் என்றும், அதின் நடுவில் மகிமையாய் இருப்பேன் என்றும் எங்கள் பிதா சொல்லுகிறார்.’”

⁶“ஓய், ஓய், வடதேசத்தைவிட்டு ஓடிவாருங்கள் என்று எங்கள் பிதா சொல்லுகிறார்; ஏனெனில் நான் உங்களை வானத்தின் நான்கு திசைகளின் காற்றுகளைப்போல் சிதறடித்தேன் என்று எங்கள் பிதா சொல்லுகிறார். ⁷சீயோனே, வா! பாபிலோன் குமாரத்தியோடே வாசம்பண்ணுகிறவளே, தப்பித்துக்கொள்.

⁸உங்களைச் சூறையாடின ஜாதிகளுக்கு விரோதமாய் அவருடைய மகிமை என்னை அனுப்பினபின்பு, சேனைகளின் பிதா சொல்லுகிறது என்னவெனில்: உங்களைத் தொடுகிறவன் அவருடைய கண்மணியைத் தொடுகிறான்:

⁹இதோ, நான் என் கையை அவர்கள்மேல் அசைப்பேன்; அப்பொழுது அவர்கள் தங்களுக்கு ஊழியம் செய்தவர்களுக்குச் சூறையாகுவார்கள்; அப்பொழுது சேனைகளின் பிதா என்னை அனுப்பினார் என்று அறிந்துகொள்வீர்கள்.

¹⁰சீயோன் குமாரத்தியே, பாடி மகிழ்ந்திரு; ஏனெனில் இதோ, நான் வந்து உன் நடுவில் வாசம்பண்ணுவேன் என்று எங்கள் பிதா சொல்லுகிறார்.

¹¹“அந்நாளிலே அநேக ஜாதிகள் எங்கள் பிதாவைச் சேர்ந்துகொண்டு, என் பிள்ளைகளாவார்கள்; நான் உன் நடுவில் வாசம்பண்ணுவேன்; அப்பொழுது சேனைகளின் பிதா என்னை உன்னிடத்திற்கு அனுப்பினார் என்று அறிந்துகொள்வாய். ¹²எங்கள் பிதா பரிசுத்த தேசத்திலே யூதாவைத் தமது பங்காக உரிமைகொண்டு, மறுபடியும் எருசலேமைத் தெரிந்துகொள்வார்.

¹³மாம்சமான யாவரும் எங்கள் பிதாவுக்கு முன்பாக மௌனமாயிருங்கள்; ஏனெனில் அவர் தமது பரிசுத்த வாசஸ்தலத்திலிருந்து எழுந்தருளுகிறார்.”