Zechariah 2 FHB Father's Heart Bible™

2 ¹Tetiya moi upor te sai kene, hath te jukhiba rusi dhori thaka ekjon manuh ke dekhise. ²Moi hudise, “Tumi kot te jai ase?” Tai pora moi ke koise, “Jerusalem ke jukhibole, kiman chaura aru kiman lamba ase eitu sabole.”

³Moi logot te kotha kori thaka sorgoduth tu ulai jaise, aru tar ke lok pabole dusra ekjon sorgoduth ulai ahhise, ⁴aru tar ke koise, “Polai ja, eitu jawan manuh ke kobi: ‘Jerusalem tu bera nathaka khula desh nisena hobo, tai bhitor te bisi manuh aru janwar khan thakibo.’

⁵Moi nijor tai laga chari phale jui laga bera hobo, amar Pitri koi ase, aru Moi tai bhitor te mahima hobo.’”

⁶“Ahhibi! Ahhibi! Uttor desh pora polai ahhibi, amar Pitri koi ase, kilemane Moi tumikhan ke sorgo laga charta hawa nisena chituki dise, amar Pitri koi ase. ⁷Ahhibi, Zion! Babylon laga swali logot te thaka tumikhan, polai jabi.

⁸Sorgo laga sena khan laga Pitri eneka koi ase—Tar mahima pora tumikhan ke lut kora desh khan bhirodh te moi ke pathaise: kun pora tumikhan ke chuwe, tai Tar suku laga moni ke chuwe:

⁹Kilemane sabi, Moi tarkhan uporte hath hilabo, aru tarkhan tarkhan laga sewa kora manuh khan nimite lut hoi jabo. Tetiya tumikhan janibo sorgo laga sena khan laga Pitri pora moi ke pathaise.

¹⁰Gana koribi aru khushi koribi, Zion laga swali! Kilemane sabi, Moi tumikhan majot te thakibole ahhi ase, amar Pitri koi ase.

¹¹“Hei din te bisi desh khan amar Pitri logot te milibo aru Moi laga bacha khan hobo. Moi tumikhan majot te thakibo, aru tumikhan janibo sorgo laga sena khan laga Pitri pora moi ke tumikhan logot te pathaise. ¹²Aru amar Pitri pora pobitro desh te Judah ke Tar bhag hisab te lobo, aru aru-bar Jerusalem ke basi lobo.

¹³Chup thakibi, sob manuh, amar Pitri usor te, kilemane Tai nijor laga pobitro thaka jagah pora uthi ahhi ase.”