Mamuna na Ntambo Wakupimira
Munthu wakupima asaenda toera kupima Yerusalemu, mbapangwa kuti asaneta tayu — nzinda unadzadzala kupiringana linga lonsene. Baba wathu iye ene anadzakhala linga la moto kuzungulira nzinda na mbiri yace mkati mwace, na mitundu mizinji inadzaphatana naye mbikhala ana ace.
2 1Na tenepo ndayang'ana padzulu, mbandiona mamuna akhali na ntambo wakupimira m'djanja mwace. 2Ine ndabvundza: “Muli kuenda kupi?” Iye andipanga: “Ndinaenda kukapima Yerusalemi, toera kuona kulapha kwace na kutalika kwace.”
3Anju akhalonga na ine abuluka, penepo anju unango abuluka toera kun'gumana, 4mbampanga: “Thamanga, ukapange mphale uyu: ‘Yerusalemi anadzakhala ninga nthando yakufunguka, na anthu azinji na pifuyo pizinji n'kati mwace.’
5Ine ndekha ndinadzakhala khoma ya moto yakunzungulira, alonga Baba wathu, Ine ndinadzakhala mbiri n'kati mwace.’”
6“Bwerani! Bwerani! Thawani ku dziko ya kumpoto, alonga Baba wathu, thangwi ndakumwazani ninga mphepo zinai za kudzulu, alonga Baba wathu. 7Bwera, Sioni! Thawa, iwe unakhala na mwanankazi wa Bhabhulonya.
8Baba wa anyankhondo a kudzulu alonga tenepa—pakumala mbiri yace kundituma toera kulimbana na mitundu ya anthu idakupokosani: ule anakukhuyani asakhuya mboni ya diso yace:
9Thangwi onani, Ine ndinadzalamusa djanja yanga kuna iwo, iwo anadzakhala pyakupokoswa kuna ale akhaatumikira. Penepo imwe munadzadziwa kuti Baba wa anyankhondo a kudzulu andituma.
10Imba na kukomerwa, mwanankazi wa Sioni! Thangwi onani, Ine ndiri kubwera toera kukhala pakati panu, alonga Baba wathu.
11“Mitundu mizinji inadzaphatana na Baba wathu ntsiku ineyi, mbikhala ana anga. Ine ndinadzakhala pakati panu, imwe munadzadziwa kuti Baba wa anyankhondo a kudzulu andituma kuna imwe. 12Na Baba wathu anadzatambira Yuda ninga khundu yace m'dziko yakucena, mbasankhula pontho Yerusalemi.
13Khalani dzii, anthu onsene, pamaso pa Baba wathu, thangwi Iye asalamuka kubuluka pa mbuto yace yakucena.”
