ዘካርያስ 2 FHB Father's Heart Bible™

2 ¹ኣዒንተይ ቋሕ ኣቢለ ድማ፥ መዐቀኒ ገመድ ኣብ ኢዱ ዝሓዘ ሰብኣይ ረአኹ። ²ኣነ ኸዓ “ናበይ ትኸይድ ኣለኻ?” ኢለ ሓተትክዎ። ንሱ ድማ “ክንደይ ከም ዝሰፍሕን ክንደይ ከም ዝነውሕን ክርኢ፥ ንኢየሩሳሌም ክዓቅን እየ” በለኒ።

³እቲ ምሳይ ዝዛረብ ዝነበረ መልኣኽ ወፀ፤ ካልእ መልኣኽ ከዓ ክረኽቦ መፀ፥ ⁴በሎ ኸዓ፦ “ጕየ፥ ነዝ መንእሰይ እዙይ ከምዙይ ኢልካ ንገሮ፦ ‘ኢየሩሳሌም፥ ብብዝሒ እቶም ኣብኣ ዘለዉ ሰባትን እንስሳን፥ ከም ክፉት ዓዲ ክትሰፍር እያ።’

⁵ኣነ ባዕለይ ኣብ ዙርያኣ ቅፅሪ ሓዊ ክኸውን እየ፥ ይብል ኣቦና፤ ኣብ ውሽጣ ድማ ክብሪ ክኸውን እየ።’”

⁶“ንዑ! ንዑ! ካብ ምድሪ ሰሜን ህደሙ፥ ይብል ኣቦና፤ ከም ኣርባዕተ ንፋሳት ሰማይ በቲነኩም እየ እሞ፥ ይብል ኣቦና። ⁷ኣቲ ፅዮን! ንዒ፤ ኣቲ ምስ ጓል ባቢሎን እትነብሪ፥ ኣምልጢ።

⁸ኣቦ ሰራዊት ሰማይ ከምዙይ ይብል፦ ክብሩ ናብቶም ዝዘመቱኹም ኣህዛብ ድሕሪ ምልኣኹ፥ ዝነክአኩም ዘበለ፥ ብሌን ዓይኑ እዩ ዝነክአ፤

⁹እንሆ፥ ኣብ ልዕሊኦም ኢደይ ከወዛውዝ እየ፥ ነቶም ዘገልገልዎም ከዓ ምርኮ ክኾኑ እዮም። ሽዑ ኣቦ ሰራዊት ሰማይ ከም ዝለኣኸኒ ክትፈልጡ ኢኹም።

¹⁰ኣቲ ጓል ፅዮን፥ ዘምሪ ተሓጐሲ! እንሆ፥ ኣብ ማእኸልኪ ክነብር እመፅእ ኣለኹ፥ ይብል ኣቦና።

¹¹“በታ መዓልቲ እቲኣ ብዙሓት ኣህዛብ ናብ ኣቦና ክፅምበሩ እዮም፥ ውሉደይ ድማ ክኾኑ እዮም። ኣብ ማእኸልኪ ክነብር እየ፥ ኣቦ ሰራዊት ሰማይ ናባኺ ከም ዝለኣኸኒ ድማ ክትፈልጢ ኢኺ። ¹²ኣቦና ድማ ንይሁዳ ኣብታ ቅድስቲ ምድሪ ኸም ግዱ ገይሩ ክወርሶ እዩ፤ ንኢየሩሳሌምውን መሊሱ ክሓርያ እዩ።

¹³ኵሉ ስጋ ኣብ ቅድሚ ኣቦና ስቕ ይበል፤ ካብ ቅዱስ ማሕደሩ ተበራቢሩ ኣሎ እሞ።”