Badat Lang Kachaak Thingrwa Amnu Manpa Khat
Jerusalem ding badat lang kachaak thingrwa amnu manpa khat han thou drwe, atiga badat lang katop mako diga bakhou rinne—namlian ga kapan maknu nam danga onglune. Ani Pa baraanto Araantoza haba amqwatnu mei kapan tolune khatle basung bi lwat liannu tolune, khatle chaat tamna ani Pa le diga khat thangluga Baom mi nun to thanglune.
Ani Pa na chongkhak hei bing bi kabia nge 5–7, 10–12
2 1Atiga eina batou thouluga, bakut pi badat lang kachaak thingrwa khat amnu manpa khat ding mu rwe. 2Eina hweinine, “Nang inlam se ongnubo?” Maanna akhou rinne, “Jerusalem ding badat lang, haga intia liannubo khatle intia namlaanubo dinu mu lang se ongnuwe.”
3Akhou chong kabia ongnu tambaan chonglang ga se ngaake, khatle tambaan chonglang katei khat bating kadou lang swak rwe, 4atiga maanna bakhou rinne, “Pako, heiba katangpa khou rinro: ‘Jerusalem basung bi mi khatle indwan khouring tamga ongnu briakpina, haga kapan maknu nam danga ongtalune.’
5Ei Araantoza haga amqwatnu mei kapan tolune, diga ani Pa na rinne, khatle Ei basung bi lwat liannu tolune.’”
6“Hungro! Hungro! kasak taram khouna pak tammo, diga ani Pa na rinne, balangbe Eina nani ding tambaan om thiraang pat bali danga chai imphaang thang rwe, diga ani Pa na rinne. 7Hungro, Zion! Babylon sa kamaisa le diga ongnu nang, dwak swakro!
8Tambaan kraanmi rwan om Pa na heiyana rinne—Baom lwat liannu nung bi, nani khouna kraan bina phun hungnu chaat bing ding Maanna Ei pi se thang rwe: tudannu nani ding to maannu maan gana Baom mik tung ding to maanne:
9Balangbe phaang ngo, Eina bani lu chung bi Akut ding hiak thanglune, atiga bani ding chwanlaang tonu bing lang kraan bina phun hungnu pot tolune. Atiye dabe tambaan kraanmi rwan om Pa na Ei pi se thang rwe dinu nanina theilune.
10Zion sa kamaisa, laa toluga karowo! Balangbe phaang ngo, Eina nani lak pi ong lang hungna rwe, diga ani Pa na rinne.
11“Haba lumik bi chaat tamga ani Pa khou nung suiluga Ami nun tolune. Eina nani lak pi onglune, khatle tambaan kraanmi rwan om Pa na nani khou Ei pi se thang rwe dinu nanina theilune. 12Atiga ani Pa na bathiangnu taram bi Judah ding Baom badam danga lousulune, khatle Jerusalem ding le kathang swaklune.
13Mi bing, ani Pa meithaan bi thiap thiap ong ngo, balangbe Maanna Baom bathiangnu pwan in khouna kaling thou nge.”