Isa ka Tawo nga May Lubid nga Pangsukol

Isa ka manugtakos ang naglakat agod takson ang Jerusalem kag ginsilingan nga indi na magpabudlay — ang siudad magaawas sa bisan ano nga pader. Ang aton Amay mismo mangin pader nga kalayo sa palibot niya kag ang himaya sa sulod niya, kag madamo nga kapungsuran ang magbuylog sa iya kag mangin iya mga anak.

Nagahambal ang aton Amay sa mga bersikulo 5–7, 10–12

Kapitulo 2.

Niyan nagtangla ako kag nakita ko ang isa ka tawo nga may lubid nga pangsukol sa iya kamot. Nagpamangkot ako, “Diin ka makadto?” Nagsiling sia sa akon, “Sa pagsukol sang Jerusalem, agud makita kon daw ano kalapad kag daw ano kalaba ini.”

Naghalin ang anghel nga nagahambal sa akon, kag may isa pa ka anghel nga nagguwa sa pagsugata sa iya, kag nagsiling sa iya, “Dalagan ka, kag silinga ining batan-on nga lalaki: ‘Ang Jerusalem pagapuy-an subong sang bukas nga kaumhan, tungud sa kadamuon sang mga tawo kag sang mga kasapatan sa iya.’

Ako mismo mangin kuta nga kalayo sa palibot niya, siling sang aton Amay, kag Ako mangin himaya sa sulod niya.’”

“Dali! Dali! Palagyo kamo gikan sa duta sa aminhan, siling sang aton Amay, kay ginpalapta ko kamo subong sang apat ka hangin sang langit, siling sang aton Amay. Dali, Sion! Pumalagyo ka, ikaw nga nagapuyo upod sa anak nga babayi sang Babilonia.

Amo ini ang ginasiling sang Amay sang mga kasuldadohan sang langit—human nga ginpadala ako sang iya himaya batok sa mga pungsod nga nagpangagaw sa inyo: ang bisan sin-o nga magtandog sa inyo nagatandog sa kalimutaw sang iya mata:

Kay yari karon, ituyhaw ko ang akon kamot sa ibabaw nila, kag mangin inagaw sila sang mga nag-alagad sa ila. Niyan mahibaluan ninyo nga ginpadala ako sang Amay sang mga kasuldadohan sang langit.

Mag-amba kag magkalipay ka, anak nga babayi sang Sion! Kay yari karon, nagakari ako agud magpuyo sa tunga mo, siling sang aton Amay.

“Madamu nga pungsod ang magaintra sa aton Amay sa amo nga adlaw kag mangin akon mga anak. Magapuyo ako sa tunga ninyo, kag mahibaluan ninyo nga ginpadala ako sang Amay sang mga kasuldadohan sang langit sa inyo. Kag panag-iyahon sang aton Amay ang Juda subong nga iya bahin sa balaan nga duta, kag pilion niya liwat ang Jerusalem.

Maghipos kamo, tanan nga unod, sa atubangan sang aton Amay, kay nagbangon sia gikan sa iya balaan nga puluy-an.”