Kü Jungto Sepeiashi
Yen ka longeibü shuong shanga sepeinyu sangngaitibü mangsang shuong, kho ae to lolabü Choba che la tangshaida, haoei gadu thüka eaaoabü ong lotda. Jembü thekubü shuong theyolanyobü toukeitoukei lauan kibü ngüh che to kaijemda: haoen kü mütshuong kilabü, hoba ngo haoeneibü Bou kilabü.
1 1Darius Choba songdakbü po nyiboubü, lit setboubüa, seneibü Bou ngüh Iddo thuseibü shi, Berekia shou Zekharia jungto loukei: 2Seneibü Bouei kaneibü nyusibou to aeibou khauangkei.
3Kheijinei haoen to lenshi: Lakjaibü dan Bouei hai lauda: Kü jungto sepeiashi, dogo Lakjaibü dan Bouei lauda, hoba ngei kan jungto sepeilabü. Dogo Lakjaibü dan Bouei lauda. 4Kaneibü nyusibou tegü tekijan. Haoen to shang-iedbü thuseibü shuongei phinthonkei: Lakjaibü dan Bouei hai lauda: Tou kaneibü amaibü lamnyu hoba amaibü kümsilei shuong ka sepeiashi. Lausikei haoenei adit ayingsi kü la aheedang, dogo seneibü Bouei lauda.
5Kaneibü nyusibou kho, haoen tükde lae ong ki? Hoba thuseibü shuong, haoen ponpen langkei ki lo?
6Lausikei ngei kü khangenbü thuseibü shuong to sakkubü kü ngüh hoba kü ngühkhüm shuongei, kaneibü nyusibou to phai asem lo? Kheijinei haoenei maangpon sepeian, “Lakjaibü dan Bouei künei to kümla dambü tegü, küneibü lamnyu hoba kümsilei thüng, kho tegü haoei künei to kümbei,” dogo laukei.
Bouei Koli Setbü Shuong Hautida
7Darius Choba songdakbü po nyiboubü, lit anthükche boubü Shebat, nyet saoche leiboubüa, seneibü Bou ngüh Iddo thuseibü shi, Berekia shou Zekharia jungto loukei: 8Khüyou ngei mangsang che hapbei; hoba chühashi, ngo thedanga saklangbü koli che setbü müt che, shumang kabü myrtle bunyu shuong kanglanga loan kikei, hoba hao phaia saklangbü, senyakbü, hoba thupaibü koli shuong kikei. 9Ngei phekei, “Habü ai shuong, kü bunyu?” Kü yoa joyobü hangangbüei laukei, “Habü ai shuongje ngei ka la lenlabü.”
10Myrtle bunyu shuong kanglanga loan kibü müt khoei jongaikei, “Habü ho seneibü Bouei kaodak pendoua paila hautibü shuong ki.”
11Haoenei myrtle bunyu shuong kanglanga loan kibü seneibü Bou hangangbü to lenkei, “Künei kaodak pendoua paikei; hoba kaodak pendou hakso hoba sangmaia settikei.”
12Kheijinei seneibü Bou hangangbüei laukei, “Lakjaibü dan Bou, habü po anjinlei no haoen to khauangko kian, no lalokche sühko Jerusalem hoba Jihuda sangnyu shuong to onou aloutilabü?”
13Kheijinei seneibü Bouei kü yoa joyobü hangangbü to maibü hoba solotibü ngüh laukei.
14Kheijinei kü yoa joyobü hangangbüei laukei, “Phinthonashi: Lakjaibü dan Bouei hai lauda: Ngo Jerusalem hoba Zion shanga aeibou nyektoshatda,” 15lausikei ngo lamleko kibü phangshuong to aeibou khauangda; ngo shisho khünei khauangkei, lausikei haoenei amaibü lai jinyokei. 16Khoei seneibü Bouei lauda: Ngei onou yoa Jerusalem to sepeilabü; hanei kü chem kümetlabü, dogo Lakjaibü dan Bouei lauda, hoba Jerusalem thüka takan chühbü lüh shinglabü.
17Toukei phinthonashi: Lakjaibü dan Bouei hai lauda: Kü sangnyu shuong toukei naangmaibü shenlabü; seneibü Bouei toukei Zion to solotilabü hoba toukei Jerusalem pienlabü.
Laang Shuong hoba Lamshaubü Müt Shuong
18Kheijinei ngei limchühkei, hoba chühashi, ngo thedanga laang lei kikei. 19Ngei kü yoa joyobü hangangbü to phekei, “Habü ai shuong?” Haoei laukei, “Habü ho Jihuda, Israel hoba Jerusalem lintibü laang shuong ki.”
20Kheijinei seneibü Bouei kü la lamshauko kibü müt lei lenkei. 21Ngei phekei, “Habü louan ai kümlabü?” Haoei laukei, “Habü laang shuongei Jihuda to aoei ong jembü khu aphonkulabü dogo lintikei; lausikei habü lamshauko kibü müt shuong kho haoen hatjihatko kula, hoba Jihuda kaodak lintila phangshuongei khulimbo phonbü laang shuong tuongtila loukei.”
