ዘካርያስ 1

1 ¹በዳርዮስ ዘመነ መንግሥት በሁለተኛው ዓመት በስምንተኛው ወር የአባታችን ቃል ወደ ነቢዩ አዶ የልጅ ልጅ ወደ በራክዩ ልጅ ወደ ዘካርያስ እንዲህ ሲል መጣ፦ ²አባታችን በአባቶቻችሁ እጅግ ተቈጣ።

³ስለዚህ እንዲህ ብለህ ንገራቸው፤ የሰማይ ሠራዊት አባት እንዲህ ይላል፦ ወደ እኔ ተመለሱ፤ ይላል የሰማይ ሠራዊት አባት፤ እኔም ወደ እናንተ እመለሳለሁ፤ ይላል የሰማይ ሠራዊት አባት። ⁴እንደ አባቶቻችሁ አትሁኑ፤ የቀደሙት ነቢያት፦ የሰማይ ሠራዊት አባት እንዲህ ይላል፤ አሁን ከክፉ መንገዳችሁና ከክፉ ሥራችሁ ተመለሱ ብለው ሰብከውላቸዋል። እነርሱ ግን ሊሰሙኝና ሊያዳምጡኝ አልወደዱም፤ ይላል አባታችን።

⁵አባቶቻችሁ አሁን የት አሉ? ነቢያቱስ ለዘላለም ይኖራሉን?

⁶ባሪያዎቼን ነቢያትን ያዘዝኋቸው ቃሎቼና ሥርዐቶቼ ግን አባቶቻችሁን አላገኟቸውምን? ከዚያም ተመልሰው፣ ‘የሰማይ ሠራዊት አባት እንደ መንገዳችንና እንደ ሥራችን ሊያደርግብን እንዳሰበ፣ እንዲሁ አደረገብን’ አሉ።

አባታችን ፈረሰኞቹን ይልካል

⁷በዳርዮስ ዘመነ መንግሥት በሁለተኛው ዓመት፣ ሳባጥ በተባለው በዐሥራ አንደኛው ወር በሃያ አራተኛው ቀን የአባታችን ቃል ወደ ነቢዩ አዶ የልጅ ልጅ ወደ በራክዩ ልጅ ወደ ዘካርያስ እንዲህ ሲል መጣ፦ ⁸በሌሊት ራእይ አየሁ፤ እነሆም፣ በሸለቆ ውስጥ ባሉት የባድማ ዛፎች መካከል ቀይ ፈረስ የተቀመጠ ሰው ቆሞ ነበር፤ ከበስተ ኋላውም ቀይ፣ ቡናማና ነጭ ፈረሶች ነበሩ። ⁹እኔም፣ “ጌታዬ ሆይ፣ እነዚህ ምንድን ናቸው?” ብዬ ጠየቅሁ። ከእኔ ጋራ ይነጋገር የነበረውም መልአክ፣ “እነዚህ ምን እንደ ሆኑ አሳይሃለሁ” አለኝ።

¹⁰በባድማ ዛፎች መካከል የቆመውም ሰው፣ “እነዚህ አባታችን ምድርን እንዲዘዋወሩ የላካቸው ናቸው” ብሎ መለሰ።

¹¹እነርሱም በባድማ ዛፎች መካከል ለቆመው ለአባታችን መልእክተኛ፣ “ምድርን ተዘዋውረናል፤ ምድር ሁሉ ተረጋግታና ሰላም ኾና ተቀምጣለች” ብለው ነገሩት።

¹²ከዚያም የአባታችን መልእክተኛ፣ “የሰማይ ሠራዊት አባት ሆይ፣ እነዚህን ሰባ ዓመት የተቈጣሃቸውን ኢየሩሳሌምንና የይሁዳን ከተሞች እስከ መቼ ድረስ ምሕረትህን ትከለክላቸዋለህ?” አለ።

¹³አባታችንም ከእኔ ጋራ ይነጋገር ለነበረው መልአክ መልካምና የሚያጽናና ቃል ተናገረ።

¹⁴ከእኔ ጋራ ይነጋገር የነበረውም መልአክ እንዲህ አለኝ፤ “እንዲህ ብለህ ዐውጅ፤ የሰማይ ሠራዊት አባት እንዲህ ይላል፤ ለኢየሩሳሌምና ለጽዮን እጅግ እቀናለሁ፤” ¹⁵ተዘናግተው በነበሩት አሕዛብ ግን እጅግ ተቈጥቻለሁ፤ እኔ ጥቂት ብቻ ተቈጥቼ ነበር፤ እነርሱ ግን ጕዳቱን አበዙት። ¹⁶ስለዚህ አባታችን እንዲህ ይላል፤ በምሕረት ወደ ኢየሩሳሌም እመለሳለሁ፤ ቤቴም በዚያ ይሠራል፤ ይላል የሰማይ ሠራዊት አባት፤ የመለኪያ ገመድም በኢየሩሳሌም ላይ ይዘረጋል።

¹⁷ደግሞም እንዲህ ብለህ ዐውጅ፤ የሰማይ ሠራዊት አባት እንዲህ ይላል፤ ከተሞቼ እንደ ገና በበረከት ይሞላሉ፤ አባታችንም እንደ ገና ጽዮንን ያጽናናል፤ ኢየሩሳሌምንም እንደ ገና ይመርጣል።

ቀንዶቹና ባለሙያዎቹ

¹⁸ቀና ብዬ ተመለከትሁ፤ እነሆም፣ አራት ቀንዶች ነበሩ። ¹⁹ከእኔ ጋራ ይነጋገር የነበረውን መልአክ፣ “እነዚህ ምንድን ናቸው?” ብዬ ጠየቅሁት። እርሱም፣ “እነዚህ ይሁዳን፣ እስራኤልንና ኢየሩሳሌምን የበተኑ ቀንዶች ናቸው” አለኝ።

²⁰ከዚያም አባታችን አራት ባለሙያዎች አሳየኝ። ²¹እኔም፣ “እነዚህ ምን ሊያደርጉ መጥተዋል?” ብዬ ጠየቅሁ። እርሱም እንዲህ አለ፤ “እነዚህ ቀንዶች ማንም ራሱን ሊያነሣ እስከማይችል ድረስ ይሁዳን በትነውታል፤ እነዚህ ባለሙያዎች ግን ሊያስፈሩአቸውና አሕዛብ የይሁዳን ምድር ለመበተን ያነሡአቸውን ቀንዶች ለመጣል መጥተዋል።”