Sakaria 1 FHB Father's Heart Bible™

1 ¹Dario ahenni afe a ɛto so abien no, ne bosome a ɛto so awɔtwe mu no, yɛn Agya asɛm baa odiyifo Sakaria a ɔyɛ Berekia ba a ɔyɛ Ido nana no nkyɛn se: ²Yɛn Agya bo fuw mo agyanom yiye.

³Enti ka kyerɛ wɔn se: Sɛɛ na Ɔsoro Asafo Agya se: Monsan mmra me nkyɛn, Ɔsoro Asafo Agya na ose, na me nso mɛsan aba mo nkyɛn. Sɛɛ na Ɔsoro Asafo Agya ka. ⁴Monnyɛ sɛ mo agyanom. Wɔn na tete adiyifo no bɔɔ dawuru kyerɛɛ wɔn se: Sɛɛ na Ɔsoro Asafo Agya se: Monnan mfi mo akwan bɔne ne mo nneyɛe bɔne ho seesei. Nanso wɔantie, na wɔamfa mʼasɛm anyɛ hwee, yɛn Agya na ose.

⁵Mo agyanom no, ɛhe na wɔwɔ seesei? Na adiyifo no nso, wɔte ase daa anaa?

⁶Nanso me nsɛm ne mʼahyɛde a mehyɛɛ me nkoa adiyifo no no, ɛantɔ mo agyanom so anaa? Afei wɔsakraa wɔn adwene kae se, “Sɛnea Ɔsoro Asafo Agya bɔɔ ne tirim sɛ ɔbɛyɛ yɛn, sɛnea yɛn akwan ne yɛn nneyɛe te no, saa ara na wayɛ yɛn.”

Agya no Soma Nʼapɔnkɔsotefo

⁷Dario ahenni afe a ɛto so abien no, bosome a ɛto so dubaako a ɛne Sebat no da a ɛto so aduonu anan no, yɛn Agya asɛm baa odiyifo Sakaria a ɔyɛ Berekia ba a ɔyɛ Ido nana no nkyɛn se: ⁸Anadwo no mehunuu anisoadehunu bi, na mʼanim no, ɔbarima bi te ɔpɔnkɔ kɔkɔɔ bi so, ogyina nkwaninkwani nnua a ɛwɔ bon bi mu no mu, na nʼakyi no apɔnkɔ kɔkɔɔ, kɔkɔɔ tuntum ne fitaa wɔ hɔ. ⁹Mebisaa se, “Me wura, eyinom yɛ dɛn?” Ɔbɔfo a ɔne me rekasa no kae se, “Mɛkyerɛ wo nea wɔyɛ.”

¹⁰Ɔbarima a ogyina nkwaninkwani nnua no mu no buae se, “Eyinom ne wɔn a yɛn Agya somaa wɔn sɛ wɔnkɔnenam asase so nhwɛ no.”

¹¹Wɔbɔɔ amanneɛ kyerɛɛ yɛn Agya ɔbɔfo a ogyina nkwaninkwani nnua no mu no se, “Yɛanenam asase so ahwɛ; asase nyinaa te dinn wɔ ahomegye ne asomdwoe mu.”

¹²Afei yɛn Agya ɔbɔfo no kae se, “Ɔsoro Asafo Agya, kosi da bɛn na wobɛkame Yerusalem ne Yuda nkurow no mmɔborɔhunu, wo bo a afuw wɔn mfe aduɔson yi nyinaa?”

¹³Enti yɛn Agya de nsɛm pa ne awerɛkyekye nsɛm kasa kyerɛɛ ɔbɔfo a na ɔne me rekasa no.

¹⁴Afei ɔbɔfo a ɔne me rekasa no kae se, “Bɔ dawuru se: Sɛɛ na Ɔsoro Asafo Agya se: Mewɔ ninkunu kɛse ma Yerusalem ne Sion,” ¹⁵nanso me bo afuw aman a wɔte hɔ dwoodwoo no yiye; me bo fuwii kakra pɛ, nanso wɔde ɔhaw kaa ho. ¹⁶Enti yɛn Agya se: Mede mmɔborɔhunu bɛsan aba Yerusalem; ɛhɔ na wɔbɛsan asi me fi, Ɔsoro Asafo Agya na ose, na wɔbɛtwe susuhama wɔ Yerusalem so.

¹⁷Bɔ dawuru bio se: Sɛɛ na Ɔsoro Asafo Agya se: Me nkurow bɛsan ayɛ ma ma yiyedi abu so; yɛn Agya bɛsan akyekye Sion werɛ, na wasan apaw Yerusalem.

Mmɛn no ne Adwumfo no

¹⁸Afei mepagyaa mʼani, na mʼanim no, mmɛn anan wɔ hɔ. ¹⁹Mebisaa ɔbɔfo a ɔne me rekasa no se, “Eyinom yɛ dɛn?” Ɔkae se, “Eyinom ne mmɛn a ɛbɔɔ Yuda, Israel ne Yerusalem ahwete no.”

²⁰Afei yɛn Agya kyerɛɛ me adwumfo baanan. ²¹Mebisaa se, “Eyinom reba abɛyɛ dɛn?” Ɔkae se, “Mmɛn yi bɔɔ Yuda hwetee ma obiara antumi amma ne ti so; nanso adwumfo yi aba sɛ wɔrebɛhunahuna wɔn, na wɔatow mmɛn a amanaman no maa so tiaa Yuda asase sɛ wɔde bɛbɔ no ahwete no agu fam.”