Zakari 1 FHB Father's Heart Bible™

1 ¹Na mobu ya mibale ya bokonzi ya Dariusi, na sanza ya mwambe, liloba ya Tata na biso eyelaki Zakalia, mwana ya Berekia, mwana ya Ido mosakoli : ²Tata na biso asilikaki mingi na batata na bino ya kala.

³Boye loba na bango : Tala makambo oyo Tata ya mampinga ya likolo alobi : Bozonga epai na Ngai, elobi Tata ya mampinga ya likolo, mpe Ngai nakozonga epai na bino. Boye elobi Tata ya mampinga ya likolo. ⁴Bozala lokola batata na bino ya kala te. Basakoli ya kala basakolaki na bango : Tala makambo oyo Tata ya mampinga ya likolo alobi : Bobaluka sik’oyo na banzela na bino ya mabe mpe na misala na bino ya mabe. Kasi bayokaki Ngai te mpe bapesaki Ngai likebi te, elobi Tata na biso.

⁵Batata na bino ya kala, bazali wapi sik’oyo? Mpe basakoli, bazali na bomoi libela?

⁶Kasi maloba na Ngai mpe mibeko na Ngai, oyo napesaki mitindo na basali na Ngai basakoli, ekweyelaki batata na bino ya kala te? Bongo bazongaki mpe balobaki : « Ndenge Tata ya mampinga ya likolo akanisaki kosala biso, engebene na banzela na biso mpe misala na biso, ndenge wana asali biso. »

Tata atindi bato na Ye oyo bamati bampunda

⁷Na mokolo ya ntuku mibale na minei ya sanza ya zomi na moko, ya Shebati, na mobu ya mibale ya bokonzi ya Dariusi, liloba ya Tata na biso eyelaki Zakalia, mwana ya Berekia, mwana ya Ido mosakoli : ⁸Na butu namonaki emoniseli : namonaki mobali moko amati mpunda ya motane, atelemi kati na banzete ya mirti na lobwaku moko, mpe sima na ye bampunda ya motane, ya moyindo-moyindo mpe ya pembe. ⁹Natunaki : « Biloko oyo ezali nini, nkolo na ngai ? » Anjelu oyo azalaki koloba na ngai alobaki : « Nakotalisa yo biloko oyo ezali nini. »

¹⁰Mobali oyo azalaki kati na banzete ya mirti azongisaki : « Bango nde bazali oyo Tata na biso atindaki mpo na kotambolatambola na mokili. »

¹¹Bapesaki nsango na anjelu ya Tata na biso oyo azalaki kotelema kati na banzete ya mirti : « Totambolaki na mokili ; mokili mobimba efandi na kopema mpe na kimia. »

¹²Bongo anjelu ya Tata na biso alobaki : « Tata ya mampinga ya likolo, okobomba mawa na Yo na Yerusalemi mpe na bingumba ya Yuda tii tango boni, wana osilikelaka yango mbula ntuku sambo oyo ? »

¹³Boye Tata na biso alobaki maloba ya malamu mpe ya kobondisa na anjelu oyo azalaki koloba na ngai.

¹⁴Bongo anjelu oyo azalaki koloba na ngai alobaki na ngai : « Sakola : Tala makambo oyo Tata ya mampinga ya likolo alobi : Nazali na zuwa makasi mpo na Yerusalemi mpe Siona, » ¹⁵kasi nazali na nkanda makasi na bikolo oyo bizali na kimia ; nasilikaki kaka moke, kasi bango bakobisaki mpasi. ¹⁶Boye Tata na biso alobi : Nakozonga na Yerusalemi na mawa ; kuna ndako na Ngai ekotongama lisusu, elobi Tata ya mampinga ya likolo, mpe nsinga ya kolekola ekotolama likolo ya Yerusalemi.

¹⁷Sakola lisusu : Boye elobi Tata ya mampinga ya likolo : Bingumba na Ngai bikotonda lisusu na bolamu ; Tata na biso akobondisa Siona lisusu mpe akopona Yerusalemi lisusu.

Maseke mpe Bato ya Mosala ya Maboko

¹⁸Sima na yango natalaki likolo, mpe namonaki maseke minei. ¹⁹Natunaki anjelu oyo azalaki koloba na ngai : « Maseke oyo mazali nini ? » Alobaki : « Maseke oyo nde mapanzaki Yuda, Isalaele mpe Yerusalemi. »

²⁰Sima na yango Tata na biso amonisaki ngai bato minei ya mosala ya maboko. ²¹Natunaki : « Bato oyo bayei kosala nini ? » Alobaki : « Maseke oyo mapanzaki Yuda tii moto moko te akoka kotombola mutu na ye ; kasi bato oyo bayei mpo na kobangisa bango mpe mpo na kobwaka na nse maseke oyo bikolo bitombolaki likolo ya mokili ya Yuda mpo na kopanza yango. »