Salmo 74

74 ¹O among Amahan, nganong gisalikway mo kami hangtod sa kahangtoran? Nganong nag-aso ang imong kasuko batok sa mga karnero sa imong sibsibanan?

²Hinumdomi ang imong katilingban, nga imong gipalit kaniadto, nga imong gitubos aron mahimong tribo sa imong panulondon—ang Bukid sa Zion, diin ikaw nagpuyo. ³Ipadulong ang imong mga lakang ngadto niining walay kataposang mga guba, sa tanang kalaglagan nga gidala sa kaaway sa santuwaryo.

⁴Nagngulob ang imong mga kaaway sulod sa imong tigomanan; gipatindog nila ang ilang kaugalingong mga bandila ingon nga mga timaan. ⁵Sila sama sa mga tawo nga nagwarawara sa mga wasay sa itaas sa kalibonan sa mga kahoy. ⁶Ug karon gidugmok nila ang tanang kinulit niini pinaagi sa atsa ug maso. ⁷Gisunog nila ang imong santuwaryo; gipasipalahan nila ang puloy-anan sa imong ngalan hangtod sa yuta. ⁸Miingon sila sa ilang kaugalingon, “Dugmokon namo ang tanan nilang mga tigomanan.” Gisunog nila ang matag tigomanan sa atong Amahan sa yuta.

⁹Wala kami makakita ug mga timaan alang kanamo; wala nay propeta, ug walay usa kanamo nga nasayod kon hangtod kanus-a. ¹⁰Hangtod kanus-a, among Amahan, magyubit ang kaaway? Tamayon ba sa kaaway ang imong ngalan hangtod sa kahangtoran? ¹¹Nganong gipugngan mo ang imong kamot, ang imong tuong kamot? Ipagula kini gikan sa pil-o sa imong bisti ug taposa na!

¹²Apan ang atong Amahan mao ang akong Hari sukad sa karaang mga panahon, nga nagbuhat ug kaluwasan sa tibuok kalibotan.

¹³Gibahin mo ang dagat pinaagi sa imong kusog; gidugmok mo ang mga ulo sa mga mabangis nga mananap sa dagat diha sa katubigan. ¹⁴Gidugmok mo ang mga ulo sa Leviatan; gihatag mo siya ingon nga pagkaon ngadto sa mga binuhat sa kamingawan. ¹⁵Gipabuswak mo ang mga tuboran ug mga sapa; gipamala mo ang mga suba nga walay hunong sa pagdagayday. ¹⁶Imo ang adlaw, imo usab ang gabii; gitukod mo ang bulan ug ang adlaw. ¹⁷Gitakda mo ang tanang utlanan sa yuta; gibuhat mo ang ting-init ug ang tingtugnaw.

¹⁸Hinumdomi kini—nagyubit ang kaaway, among Amahan, ug gitamay sa usa ka buangbuang nga katawhan ang imong ngalan. ¹⁹Ayaw ihatag ang kinabuhi sa imong salampati ngadto sa mga ihalas nga mananap; ayaw kalimti hangtod sa kahangtoran ang kinabuhi sa imong mga sinakit. ^a a v19 Ang “imong salampati” usa ka malumo nga balaknong hulagway alang sa katawhan sa Dios, ang Israel.

²⁰Sud-onga ang kasabotan, kay ang mangitngit nga mga dapit sa yuta napuno sa mga tagoanan sa kapintasan. ²¹Ayaw itugot nga ang gidaogdaog mobalik nga maulawan; itugot nga ang kabos ug ang nanginahanglan modayeg sa imong ngalan.

²²Bumangon ka, among Amahan, labani ang imong katungod; hinumdomi kon giunsa pagyubit kanimo sa buangbuang sa tibuok adlaw. ²³Ayaw kalimti ang kaguliyang sa imong mga kaaway, ang kasaba niadtong mobatok kanimo, nga nagkakusog sa kanunay.