መዝሙር 74

74 ¹አባታችን ሆይ፤ ለዘላለም ለምን ጣልከን? ቍጣህስ በማሰማሪያህ በጎች ላይ ለምን ይጤሳል?

²ከጥንት የገዛኸውን፣ የርስትህ ነገድ ይሆን ዘንድ የተቤዠኸውን ጉባኤህን አስብ፤ የተቀመጥህበትንም የጽዮንን ተራራ አስብ። ³እግርህን ወደ እነዚህ የዘላለም ፍርስራሾች አቅና፤ ጠላት በመቅደሱ ላይ ያደረሰውን ጥፋት ሁሉ ተመልከት።

⁴ተቃዋሚዎችህ በመሰብሰቢያህ ውስጥ ጮኹ፤ የራሳቸውንም ዐላማዎች ምልክት አድርገው ተከሉ። ⁵በዛፎች ጥቅጥቅ ጫካ ውስጥ ምሳር ወደ ላይ እንደሚያወዛውዙ ሰዎች ሆኑ። ⁶አሁንም የተቀረጸውን ሥራ ሁሉ በመጥረቢያና በመዶሻ ያደቅቃሉ። ⁷መቅደስህን በእሳት አቃጠሉ፤ የስምህን ማደሪያ እስከ መሬት ድረስ አረከሱ። ⁸በልባቸው እንዲህ አሉ፤ “መሰብሰቢያዎቻቸውን ሁሉ በአንድነት እናጠፋ።” በምድሪቱ ያለውን የአባታችንን መሰብሰቢያ ሁሉ አቃጠሉ።

⁹ለእኛ የሚሆኑ ምልክቶች አናይም፤ ከእንግዲህ ነቢይ የለም፤ ከእኛም መካከል እስከ መቼ እንደሚሆን የሚያውቅ የለም። ¹⁰አባታችን ሆይ፤ ተቃዋሚው እስከ መቼ ይዘባበታል? ጠላትስ ስምህን ለዘላለም ይሳደባልን? ¹¹እጅህን፣ ቀኝ እጅህን ለምን ትመልሳለህ? ከልብስህ እጥፋት አውጥተህ ፈጽማቸው!

¹²አባታችን ግን ከጥንት ጀምሮ ንጉሤ ነው፤ በምድር ሁሉ ላይ ድነትን የሚያደርግ ነው።

¹³ባሕርን በኀይልህ ከፈልህ፤ በውሃው ላይ የባሕር ጭራቆችን ራሶች ሰበርህ። ¹⁴የሌዋታንን ራሶች አደቀቅህ፤ ለምድረ በዳ ፍጥረታት ምግብ አድርገህ ሰጠኸው። ¹⁵ምንጮችንና ፈሳሾችን ከፈትህ፤ ዘወትር የሚፈሱ ወንዞችን አደረቅህ። ¹⁶ቀኑ ያንተ ነው፤ ሌሊቱም ደግሞ ያንተ ነው፤ ጨረቃንና ፀሐይን አንተ አጸናህ። ¹⁷የምድርን ዳርቻዎች ሁሉ አንተ ወሰንህ፤ በጋንና ክረምትን አንተ ፈጠርህ።

¹⁸ይህን አስብ፤ አባታችን ሆይ፤ ጠላት ይዘባበታል፤ ሞኝ ሕዝብም ስምህን ይሳደባል። ¹⁹የርግብህን ነፍስ ለአራዊት አሳልፈህ አትስጥ፤ የተቸገሩህን ሕይወት ለዘላለም አትርሳ። ^a a v19 “ርግብህ” ለእግዚአብሔር ሕዝብ ለእስራኤል የሚሆን ርኅሩኅ የግጥም ምሳሌ ነው።

²⁰ወደ ኪዳኑ ተመልከት፤ የምድሪቱ ጨለማ ስፍራዎች በግፍ መኖሪያዎች ተሞልተዋልና። ²¹የተጨቈነው በኀፍረት አይመለስ፤ ድኻውና ችግረኛው ስምህን ያመስግኑ።

²²አባታችን ሆይ፤ ተነሥ፤ ጉዳይህን ተከራከር፤ ሞኙ ቀኑን ሙሉ እንዴት እንደሚዘባበትብህ አስብ። ²³የተቃዋሚዎችህን ጩኸት አትርሳ፤ በአንተ ላይ የሚነሡ ሰዎች ዘወትር እየበረታ የሚሄደውን ግርግር አትርሳ።