መዝሙር 73

73 ¹በእውነት አባታችን ለእስራኤል፣ ልባቸው ንጹሕ ለሆኑ መልካም ነው።

²እኔ ግን እግሮቼ ሊሰናከሉ ጥቂት ቀርቷቸው ነበር፤ አረማመዴም ሊንሸራተት ጥቂት ቀርቶት ነበር። ³የክፉዎችን ብልጽግና ባየሁ ጊዜ ትዕቢተኞችን ቀንቼ ነበርና። ⁴በሞታቸው ጊዜ ሥቃይ የለባቸውምና፤ ሰውነታቸውም ጤናማና የወፈረ ነው። ⁵እንደ ሌሎች ሰዎች በመከራ ውስጥ አይደሉም፤ እንደ ቀረው የሰው ዘርም አይመቱም። ⁶ስለዚህ ትዕቢት የአንገታቸው ጌጥ ሆኗል፤ ዐመፅም እንደ ልብስ ይከናነባቸዋል። ⁷ዐይኖቻቸው ከስብ የተነሣ ይወጣሉ፤ የልባቸውም ምኞት ወሰን የለውም። ⁸ይዘባበታሉ፤ በክፋትም ይናገራሉ፤ ከከፍታ ሆነው ግፍን ይዝታሉ። ⁹አፋቸውን በሰማያት ላይ ያነሣሉ፤ ምላሳቸውም በምድር ሁሉ ይዘዋወራል። ¹⁰ስለዚህ ሕዝቡ ወደ እነርሱ ይመለሳሉ፤ ውኃንም እጅግ ይጠጣሉ። ¹¹እነርሱም፣ “እግዚአብሔር እንዴት ያውቃል? በልዑል ዘንድስ ዕውቀት አለን?” ይላሉ። ¹²እነሆ፣ ክፉዎች እነዚህ ናቸው፤ ዘወትር በቸልታ እየኖሩ ሀብታቸውን ያበዛሉ።

¹³በእርግጥ ልቤን በከንቱ ንጹሕ አድርጌ ጠብቄአለሁ፤ እጆቼንም በንጽሕና ታጥቤአለሁ። ¹⁴ቀኑን ሙሉ ተመትቻለሁና፤ ማለዳም ሁሉ ተገሥጫለሁ።

¹⁵“እንዲህ እናገራለሁ” ብዬ ብናገር ኖሮ፣ የልጆችህን ትውልድ በከዳሁ ነበር። ¹⁶ይህን ሁሉ ለማስተዋል በሞከርሁ ጊዜ፣ በዐይኔ ፊት አድካሚ ሥራ ሆነብኝ፤ ¹⁷ወደ አባታችን መቅደስ እስክገባ ድረስ፤ ያን ጊዜ ፍጻሜያቸውን አስተዋልሁ። ¹⁸በእውነት በሚያንሸራትት ስፍራ አስቀመጥሃቸው፤ ወደ ጥፋትም ትጥላቸዋለህ። ¹⁹በቅጽበት እንዴት ጠፉ! በድንጋጤም ፈጽመው ተወሰዱ! ²⁰ሰው ከእንቅልፉ ሲነቃ እንደ ሕልም ነው፤ ጌታ አባት ሆይ፣ በተነሣህ ጊዜ እንደ ከንቱ ምስል ትንቃቸዋለህ።

²¹ልቤ በመረረ ጊዜ፣ በውስጤም በተወጋሁ ጊዜ፣ ²²ደንቆሮና የማላውቅ ነበርሁ፤ በአንተ ፊት እንደ እንስሳ ነበርሁ። ²³ነገር ግን እኔ ሁልጊዜ ከአንተ ጋራ ነኝ፤ ቀኝ እጄን ይዘሃል። ²⁴በምክርህ ትመራኛለህ፤ ኋላም ወደ ክብር ትወስደኛለህ። ²⁵በሰማይ ከአንተ በቀር ማን አለኝ? በምድርም ላይ ከአንተ ሌላ የምሻው ነገር የለም። ²⁶ሥጋዬና ልቤ ቢደክሙ፣ አባታችን ግን የልቤ ኀይል ለዘላለምም ዕድል ፈንታዬ ነው።

²⁷ከአንተ የራቁ ይጠፋሉና፤ ለአንተ ታማኝ ያልሆነውን ሁሉ ታጠፋዋለህ። ²⁸ለእኔ ግን ወደ አባታችን መቅረብ መልካም ነው፤ ጌታ አባትን መጠጊያዬ አድርጌአለሁ፤ ሥራህንም ሁሉ እናገር ዘንድ።