زبور 73 FHB Father's Heart Bible™

73 ¹رښتيا چې زمونږ پلار د اِسرائيل سره، او د هغو خلقو سره چې پاک زړۀ وى، ښۀ دے.

²خو زما خبره بله ده، زما پښې نژدے وې چې وښوئيږى، زما قدمونه نژدے وو چې وخوزيږى. ³ځکه چې ما په مغرورو خلقو باندې رشک کولو، کله چې ما د بدکارو خوشحالى وليدله. ⁴ځکه چې هغوئ د مرګ په وخت کښې کوم درد نۀ محسوسوى، د هغوئ بدنونه روغ او چاغ دى. ⁵هغوئ د نورو په شان په مصيبت کښې نۀ دى، د نورو انسانانو په شان په تکليف اخته نۀ دى. ⁶دې دپاره غرور د هغوئ غاړۀ کۍ ده، ظلم يې د جامو په شان پوښلے دے. ⁷د هغوئ سترګې د چاغتوب نه راوتلى دى، د هغوئ د زړونو خيالونه بې‌بند ګرځى. ⁸هغوئ ملنډې وهى او په بدنيتۍ خبرې کوى، له اوچتائى نه د ظلم ګواښ کوى. ⁹هغوئ خپلې خولې د آسمان په مقابله کښې خلاصوى، او د هغوئ ژبه په زمکه باندې ګرځى. ¹⁰دې دپاره د هغۀ خلق هم هغوئ ته ورګرځى، او په ډېرو مقدارو اوبۀ څښى. ¹¹او هغوئ وائى چې، ”خُدائ پاک به دا څنګه پوهيږى؟ آيا تر ټولو اوچت ذات کښې علم شته؟“ ¹²وګوره، دا بدکاران دى، چې تل په آرام کښې دى او مال يې زياتيږى.

¹³يقيناً ما خپل زړۀ بې‌فائدې پاک ساتلے دے او خپل لاسونه مې په بې‌ګناهۍ ووينځل. ¹⁴ځکه چې زۀ ټوله ورځ وهلے شوے يم او هره سحر ملامته کړے شوے يم.

¹⁵کۀ ما داسې وئيلى وَى چې، ”زۀ به داسې خبرې کوم،“ ¹⁶کله چې ما کوشش وکړو چې په دې ټولو خبرو پوهه شم، ¹⁷ترڅو چې زۀ د زمونږ پلار مقدس ځائ ته ورننوتم، بيا زۀ د هغوئ په انجام پوهه شوم. ¹⁸رښتيا چې تۀ هغوئ په خطرناکو ځايونو کښې ږدې، تۀ هغوئ د تباهۍ په طرف غورزوې. ¹⁹هغوئ به يو دم څنګه برباد شى، د وېرو په وجه به پوره پوره له منځه لاړ شى! ²⁰لکه خوب چې څوک ويښيږى، اے بادشاهه پلاره، چې کله تۀ راپاڅېږې، نو تۀ به هغوئ د خيالونو په شان حقير وګڼې.

²¹کله چې زما زړۀ تريخ شوے وو او زۀ د ننه زخمى شوم، ²²زۀ بې‌عقله او ناپوهه وم، ستا په مقابله کښې زۀ د څاروى په شان وم. ²³خو بيا هم زۀ تل ستا سره يم، تۀ زما ښۍ لاس نيسې. ²⁴تۀ ما په خپل مشورې سره لار ښايې، او بيا به تۀ ما جلال ته بوځې. ²⁵په آسمان کښې ستا نه بغير زما څوک شته؟ او په زمکه باندې ستا نه بغير بل هېڅ نشته چې زۀ يې خواهش ولرم. ²⁶زما غوښه او زما زړۀ کمزورے شى، خو زمونږ پلار زما د زړۀ طاقت او تل دپاره زما برخه دے.

²⁷ځکه چې هغه څوک چې ستا نه لرې دى، هغوئ به هلاک شى، تۀ هر هغه څوک له منځه وړې چې ستا سره بې‌وفا وى. ²⁸خو زما دپاره، د زمونږ پلار نژدے کېدل ښۀ دى، ما بادشاه پلار خپله پناه ګاه جوړه کړې ده، نو زۀ ستا د ټولو کارونو بيان کولے شم.