Ithe Witũ Nĩ Mwega

Thaburi ya Asafu.

Asafu aarĩ hakuhĩ gũtenderũka akĩĩgĩrĩra itonga iria nganga na irĩ na ũgima. Gũtirĩ ũndũ warĩkire nginya rĩrĩa aatoonyire handũ-harĩa-haamũre, akĩona ũrĩa mathiragĩrĩria. Nĩetĩkĩra atĩ aarĩ ta nyamũ, na akamenya atĩ nĩ aarĩ na kĩrĩa eendaga: guoko kwa Ithe wake kũmũnyiitĩte.

Gĩcunjĩ 73.

Ti-itherũ Ithe witũ nĩ mwega harĩ Isiraeli, harĩ arĩa marĩ na ngoro theru.

No niĩ-rĩ, magũrũ makwa maarĩ hakuhĩ kũhĩngwo; makinya makwa maarĩ hakuhĩ gũtenderũka. Amu nĩndaiguagĩra arĩa etĩĩi ũiru rĩrĩa ndonire ũgaacĩru wa andũ arĩa aaganu. Amu matiiguaga ruo rĩrĩa magũkua; mĩĩrĩ yao nĩ mĩgima na nĩĩnoru. Matikoragwo na mathĩĩna ta ũrĩa andũ arĩa angĩ makoragwo namo; matihũũragwo ta andũ arĩa angĩ oothe. Nĩ ũndũ ũcio mwĩtĩĩo nĩguo mũgathĩ wao; haaro ĩmahumbagĩra ta nguo. Maitho mao nĩmatũrĩkĩte nĩ ũndũ wa maguta; meciiria ma ngoro ciao nĩmaiyũrĩire. Nĩmanyũrũranagia na makaaria ndeto cia rũmena; marĩ igũrũ nĩmakaanagia ũhinyanĩrĩria. Matũmĩĩte tũnua twao tũũkĩrĩre igũrũ, naruo rũrĩmĩ rwao rũgaceeraga thĩ yoothe. Nĩ ũndũ ũcio andũ aake nĩmacookaga kũrĩ o, makanyua maaĩ maingĩ. Nao makoiga atĩrĩ, “Ngai aamenyaga atĩa? Ũrĩa-ũrĩ-Igũrũ-Mũno nĩ arĩ na ũmenyo?” Ta rora—aya nĩo andũ arĩa aaganu; matũũraga na thaayũ hĩndĩ ciothe, na makĩragĩrĩria kũgĩa na ũtonga.

Ti-itherũ nĩnjigĩte ngoro yakwa ĩrĩ theru o tũhũ, na ngĩthambia mooko makwa ndĩ mũtheru. Amu mũthenya wothe ndũũrĩte ngĩhũũrwo, na ngarũithio o rũũciinĩ.

Ingĩkorirwo njugĩte atĩrĩ, “Nĩngwaria ũguo,” nĩingĩakunyanĩire rũciaro rwa ciana ciaku. Rĩrĩa ndageragia gũtaũkĩrwo nĩ maũndũ maya mothe, maarĩ wĩra wa kũnogia maithoinĩ makwa, nginya rĩrĩa ndatoonyire handũ harĩa hatheru ha Ithe witũ; hĩndĩ ĩyo ngĩmenya mũthia wao. Ti-itherũ nĩũmaigaga kũndũ gũtenderũ; nĩũtũmaga magwe mathire biũ. Kaĩ nĩmaanangagwo o rĩmwe-ĩ, makaniinwo biũ nĩ imakania! O ta kĩrooto rĩrĩa mũndũ ookĩra, Wee Ithe witũ Mũnene, rĩrĩa ũkeyarahũra, nĩũkamamena ta ciĩruru.

Rĩrĩa ngoro yakwa yarĩ na marũrũ, na ngĩtheecwo thĩinĩ wakwa, Ndaarĩ mũkĩĩgu na ndaarĩ na ũmenyo; ndaarĩ ta nyamũ harĩ wee. O na kũrĩ ũguo, ndũũraga ndĩ hamwe nawe; nĩũnyiitĩte guoko gwakwa kwa ũrĩo. Nĩũndongoragia na kĩrĩra gĩaku, na thuutha ũcio nĩũkanjoya ũndware riiriinĩ. Nũũ ingĩ ndĩ naake igũrũ tiga o wee? Na gũtirĩ kĩndũ gũkũ thĩ kĩrĩa ingĩĩrirĩria tiga o wee. Mwĩrĩ wakwa na ngoro yakwa no ciage hinya, no Ithe witũ nĩ we hinya wa ngoro yakwa na igai rĩakwa nginya tene na tene.

Amu arĩa marĩ kũraya nawe nĩmakaaniinwo; nĩũniinaga mũndũ o wothe ũrĩa ũtarĩ mwĩhokeku kũrĩ wee. No niĩ-rĩ, nĩ wega gũkuhĩrĩria Ithe witũ; nĩndũmĩte Ithe witũ Mũnene rĩũrĩro rĩakwa, nĩ geetha heanage ũhoro wa mawĩra maku mothe.