Ithumwui Avā Kaphāna
Asaphwui laa.
Asaphna ringphā kala langsokhangai shanaobingli mikhārda awui phei tangkhakpeila. Kathara shimli zangda athumwui naolak theishingkhui eina tangda khipakha khangarai maleimana. Ana ramsā thāda sākahai da ngahoka, kala ana khangai chi ngasāhaira da theia: awui Avāwui pāngna awui pāng kharakta singa.
73 1Kachangkhat eina ithumwui Avā chi Israelli, wuklung tharzāri kahaibingli kaphāna.
2Kha iya, iphei kongluinaikhaya; iwui pheikār nganaithuinaikhaya. 3Kaja ina makhayābingwui kashāng theilaga, ina langkasobingli yuishihaowa. 4Kaja athum thi tharan kachotmāng matheimana; athumwui asā makhanang-makazā kala nganaipatlaka. 5Athum kateibing thāda kakhanangli maleimana; mikumo kateibing thāda khanang khangasak maleimana. 6Chiwui vang eina langkaso chi athumwui chāna; khangama̱ khangazaina athumli kachon thāda fakhammi. 7Athumwui mik nganaipat eina worshoka; athumwui wuklungwui khangarān langpongda vai. 8Athumna mana̱shida makaphā tui matui; atungshong eina rekakharekwui tui matui. 9Athumna athumwui khamor kazingramli khāmmi, kala athumwui male okathui hupta langsolak eina zata. 10Chiwui vang eina awui mibingna athumshong latungda, tara̱ mavātla manga. 11Kala athumna hānga, "Varena kathada theirakhala? Reikhamataiawui pāngli theikakhui leira?" 12Yanglu, hi makhayābingna; atam kachida reisanglak eina, athum kashāng mataisanga.
13Kachangkhat eina ina aremali iwuklung tharzāri haimihaira, kala khayon makhalei eina ipāng mazika. 14Kaja langpongda ili khanang khangasakhaira, kala ngathor kachida ili kahara.
15Ina, "Ina hithāda matuira," da hānghaiakha, ina nawui naongarāwui thotli yansaikahaira. 16Hi saikora theishingkhui khavai ina ngarāna tharan, chi imikli kakhanang kahai ot ngasāhaira, 17ithumwui Avāwui kathara shimli ina zangranglakha eina tangda; chieina ina athumwui naolak theishingkhuihaira. 18Kachangkhat eina, nana athumli khanganai apamli sanghaira; nana athumli ruinganaishong horthatra. 19Athum pung khatli kathāda shimānhaokhala, khangacheena athumli acho khuithuihaira! 20Mang akha thāda, kachikathā mathokasa tharan, O Proho Avā, nakhalatta ngakarthui tharan, nana athumwui azak chi mang thāda ningkachaira.
21Ining khālakhaoda, kala imalungli chāngkharenghaira, 22Ina mangkhama̱ kala matheithangkhama ngasāhaira; nawui mangāli ina sā akha thāda ngasāhaira. 23Chithālala, ina thangkachida nawui khanang leichinga; nana iwui yāpang singmi. 24Nana nawui hāngkachithei eina ili thānmi, kala naoda nana ili tekhamatei shongli khuikāra. 25Kazingramli iwui vang khipā lei, na lāngda khangatei maleimana? Kala okathuili na lāngda iwui ningkachāng ot khangatei maleimana. 26Iwui asā kala iwui ning ngazanhaira, kha ithumwui Avā chi iwui ningwui pangshap, kala katang mavaila iwui yarna.
27Kaja na eina katāva̱li khaleibing shimānhaora; nali shitkasang makhaleibing saikorali nana kānmi ngasakra. 28Kha iva, ithumwui Avā khanang nganailak china phālaka; Proho Avāli iwui ngayin khavaipam sāhaira, chieina nawui otsak saikora ina hāngmira.
