Salmo 73

73 ¹Sa pagkatinuod, maayo ang atong Amahan sa Israel, sa mga putli ug kasingkasing.

²Apan alang kanako, hapit na mapandol ang akong mga tiil; hapit na madalin-as ang akong mga lakang. ³Kay nasina ako sa mga mapahitas-on sa dihang nakita ko ang kauswagan sa mga daotan. ⁴Kay wala silay gibati nga kasakit sa pagkamatay; ang ilang mga lawas himsog ug tambok. ⁵Wala sila sa kalisdanan sama sa uban; wala sila hampaka sama sa ubang katawhan. ⁶Busa ang garbo mao ang ilang kuwintas; ang kabangis nagtabon kanila sama sa bisti. ⁷Ang ilang mga mata nagbudlat tungod sa katambok; ang mga handurawan sa ilang mga kasingkasing walay pugong. ⁸Nagbugalbugal sila ug nagsulti nga malisyoso; gikan sa itaas naghulga sila ug pagdaugdaug. ⁹Gibuka nila ang ilang mga baba batok sa kalangitan, ug ang ilang dila naglakaw nga garboso sa tibuok yuta. ¹⁰Busa ang iyang katawhan mobalik ngadto kanila, ug moinom sa tubig nga madagayaon. ¹¹Ug miingon sila, “Giunsa man pagkahibalo sa Dios? Aduna bay kahibalo diha sa Labing Halangdon?” ¹²Tan-awa—mao kini ang mga daotan; kanunayng hayahay, nagdugang sila sa bahandi.

¹³Sa pagkatinuod kawang lamang ang paghinlo ko sa akong kasingkasing ug ang paghugas ko sa akong mga kamot diha sa pagkawalay-sala. ¹⁴Kay sa tibuok adlaw gihampak ako ug gibadlong matag buntag.

¹⁵Kon miingon pa ako, “Mosulti ako sa ingon niini,” gibudhian ko unta ang kaliwatan sa imong mga anak. ¹⁶Sa dihang gisulayan ko pagsabot kining tanan, makapakapoy kini nga buluhaton sa akong mga mata, ¹⁷hangtod nga misulod ako sa balaang dapit sa atong Amahan; unya nasabtan ko ang ilang kataposan. ¹⁸Sa pagkatinuod gibutang mo sila sa madanlog nga mga dapit; gipahulog mo sila ngadto sa kalaglagan. ¹⁹Pagkadali nilang malaglag sa usa ka pagpamilok, nga nahanaw sa hingpit tungod sa mga kalisang! ²⁰Sama sa damgo nga mahanaw inigmata sa usa ka tawo, O Soberanong Amahan, inigbangon mo, tamayon mo sila ingon nga mga anino.

²¹Sa dihang napait ang akong kasingkasing ug gidughang ako sa akong kinasuloran, ²²buangbuang ako ug walay alamag; sama ako sa mananap diha kanimo. ²³Bisan pa niana, kanunay ako nga uban kanimo; gigunitan mo ang akong tuong kamot. ²⁴Gigiyahan mo ako pinaagi sa imong tambag, ug sa kataposan dad-on mo ako ngadto sa himaya. ²⁵Kinsa pa may ania kanako sa langit gawas kanimo? Ug walay bisan unsa sa yuta nga akong gitinguha gawas kanimo. ²⁶Mahimong maluya ang akong unod ug ang akong kasingkasing, apan ang atong Amahan mao ang kusog sa akong kasingkasing ug ang akong bahin hangtod sa kahangtoran.

²⁷Kay mangamatay kadtong halayo kanimo; gilaglag mo ang tanang dili matinud-anon kanimo. ²⁸Apan alang kanako, maayo nga mahiduol sa atong Amahan; gihimo ko ang Soberanong Amahan nga akong dalangpanan, aron ikasugilon ko ang tanan mong mga buhat.