Laa 74

74 ¹O ithumwui Avā, khisāda nana ithumli katang mavaila chihohaokhala? Nawui seihomphungwui yaobing chitungli nawui malungkhavātna khisāda malungvāthaira?

²Nana achālakhawui eina homkhui kahai nawui ashangva̱li phaningunglu, nawui shimluikatwui shang ngasā khavai nana ngatangmi kahai mibingli phaningunglu; nana leikasā Zion Kaphungli phaningunglu. ³Katang makhavai ramcho hibing, yangkashena kathara shimtungli sāshimān kahai saikora chishong nawui pheikārbing latunglu.

⁴Nawui yangkashebingna nawui kazippamwui alungli khanganghaira; athumna kachichāwui philān chi machut ngasāda khāngkāhaira. ⁵Athum hi thing thichangli ngahā atungshong khāngkāda ta̱tek mibing thāhaira. ⁶Ara athumna ngahā eina kala yāmkār eina chiwui ruksanga kahai ot saikora sātekmiserhaira. ⁷Athumna nawui kathara shim chi mei eina riktāhaowa; nawui mingwui pamkhavai chi ngaleili tangda sākhamāng ngasaka. ⁸Athumna kachichā iningli hānga, "Ithumna athumwui kazippam saikora katonga sākachupserra." Athumna ngaleili khalei ithumwui Avāwui kazippam saikora mei eina riktāhaowa.

⁹Ithumna ithumwui vang machut matheimana; marān akhala maleithura, kala ithumwui alungli khipānakha karankha da matheimana. ¹⁰Karankha, ithumwui Avā, yangkashena mana̱rora? Yangkashena nawui ming chi katang mavaila zeira? ¹¹Khisāda nawui pāng, nawui yāpang chi khuithuihaokhala? Nawui kachonmareili eina hortālaga athumli sāshimānmilu!

¹²Chithālala ithumwui Avā hi achālakhawui eina iwui awungana, okathui alungli huikhami sāchingda lei.

¹³Nana nawui pangshap eina shamadru chi ngayarkhami; tara̱ atungli shamadruwui dragonbingwui kuitung sātekmi. ¹⁴Nana Leviathanwui kuitung sākachupmi; ali lamhāngli khalei sāyurbingwui kashakazā ngasāda mihaira. ¹⁵Nana ura̱ kala kongrā chi shomkhaimi; katang longkashoka kongbing theng ngasakmi. ¹⁶Ngashun hi nawuina, ngayāla nawuina; kachāng kala zimik nana sakāmi. ¹⁷Nana okathuiwui thari saikora haimi; lumkachāng kala sikachāng nana sākhuimi.

¹⁸Hi phaningmilu—yangkashena mana̱ya, O ithumwui Avā, kala mangkhama̱ mibingna namingli chipata. ¹⁹Nawui nāsha̱wui mirin chi sāyurbingli mamihaialu; nawui kakhanangabingwui mirin chi mashimānla mamalaihaialu. ^a a v19 "Nawui nāsha̱" chi Varewui mi, Israelli, leishirihai laasak eina hokahai mingna.

²⁰Nawui tuingashit khayāshilu, kaja ngaleiwui tangkhamang pambing chi khangashaowui pambingna pemtinghai. ²¹Kachotabing chi maishida mahanungluiranu; kachāma kala khavātana namingli sochikatranu.

²²Ngakarthuilu, O ithumwui Avā, nawui mashun hāngsangmilu; mangkhama̱na langpongda nali kathada mana̱shihaokhala kaji phaningmilu. ²³Nawui yangkashebingwui khonkazār mamalaihaialu, nali khangararbingli ngaunlop chi atam kachida pangmei khangai pangmeimamānhaira.