Chai te pori thaka pobitro sthan
Asaph laga gyaan laga ekta bhajan.
Pobitro jaga jolai dise aru kuthar pora bhangi dise, ekjon bhi bhabobadi bachi thaka nai, aru etu kiman din thakibo kunbi najane. Asaph tai laga Pitri ke purana kaam khan yaad koridi — samundar phali diya, Leviathan ke gudi diya, garom aru thanda din thik kori diya — aru Tai ke niyom phale saabole mange.
74 1O amar Pitri, Apuni kile amikhan ke hodai nimite phelai dise? Apuni laga khong kile Apuni laga ghas-maidan laga mer khan birodhte juli ase?
2Apuni laga sabha ke yaad koribi, juntu Apuni age te kinise, juntu Apuni laga uttoradhikar laga jati hobole mukti dise— Zion Pahar, jun jagate Apuni thaki ahhise. 3Eitu hodai nimite bhangi juwa jaga khan phale Apuni laga theng ghura bi, dushman pora pobitro sthan uporte ana sob dhongsho ke sabi.
4Apuni laga dushman khan Apuni laga joma-ghor bhitorte gorjise; tarkhan nijor laga jhanda khan chihna hisab te khara korise. 5Tarkhan gash khan laga ghana jongol te uporte kuthar mari thaka manuh khan nisina thakise. 6Aru etiya tarkhan kuthar aru hathuri pora eitu laga sob khura kaam khan bhangai di ase. 7Tarkhan Apuni laga pobitro sthan te jui lagai dise; tarkhan Apuni laga nam thaka ghor ke matite girai kene opobitro korise. 8Tarkhan nijor mon te koise, “Amikhan tarkhan laga sob joma-ghor khan eke logote pisi dibo.” Tarkhan desh te thaka amar Pitri laga sob joma-ghor khan julai dise.
9Amikhan nimite eku chihna amikhan dikha nai; ar kun bhabobadi bhi nai, aru amikhan majote kun bhi kiman deri hobo najane. 10Kiman deri, amar Pitri, dushman tu thatta koribo? Dushman tu Apuni laga nam ke hodai nimite ninda koribo? 11Apuni kile Apuni laga hath, Apuni laga dyna hath ke rukhai rakhe? Eitu ke Apuni laga kapor laga bhaj pora ulai kene khotom kori dibi!
12Kintu amar Pitri purana jamana pora moi laga Raja ase, prithibi sob jagate udhar laga kaam kori ase.
13Apuni laga takot pora Apuni samundar ke bhag korise; pani uporte Apuni samundar laga danob khan laga matha khan bhangai dise. 14Apuni Leviathan laga matha khan pisi dise; Apuni eitu ke jongol laga janwar khan nimite khana hisab te dise. 15Apuni jhorna aru nola khan phatai dise; Apuni hodai boi thaka nodi khan ke sukhai dise. 16Din tu Apuni laga ase, rati bhi Apuni laga ase; Apuni chand aru suryo ke sthapon korise. 17Apuni prithibi laga sob simana khan bonaise; Apuni gorom din aru thanda din ke bonaise.
18Eitu ke yaad koribi—dushman tu thatta kori ase, amar Pitri, aru murkho manuh khan Apuni laga nam ke ninda kori ase. 19Apuni laga kopu-sorai laga jibon ke jongoli janwar khan ke nadibi; Apuni laga dukh pa manuh khan laga jibon ke hodai nimite napahoribi. a a v19 “Apuni laga kopu-sorai” tu Isor laga manuh khan, Israel ke morom pora kowa ekta kobita laga chobi ase.
20Vachan phale sabi, kilemane desh laga andhar jaga khan mara-mari laga ghor khan pora bhorta ase. 21Dabai rakha manuh khan ke sorom pora ulta nahobole dibi; gorib aru dukhiya khan ke Apuni laga nam ke stuti koribole dibi.
22Uthibi, amar Pitri, Apuni laga kotha ke bachai bi; murkho manuh pora Apuni ke pura din thatta kora tu yaad koribi. 23Apuni laga dushman khan laga hala-gula ke napahoribi, Apuni birodhte uthi juwa khan laga sor, hodai bisi jor hoi juwa tu.