ዘኍልቍ 5

5 ¹አባታችን ሙሴን እንዲህ ሲል ተናገረ፦

²“እስራኤላውያን የቈዳ በሽታ ያለበትን ሁሉ፣ ፈሳሽ ያለበትን ሁሉ፣ በሬሳ የረከሰውን ሁሉ ከሰፈር እንዲያስወጡ እዘዛቸው። ³ወንድም ሆነ ሴት፣ ከሰፈር ውጭ አስወጣቸው፤ እኔ በመካከላቸው የምኖርበትን ሰፈራቸውን እንዳያረክሱ።”

⁴እስራኤላውያንም እንዲሁ አደረጉ፤ ከሰፈር ውጭ አስወጧቸው፤ አባታችን ሙሴን እንዳዘዘው፣ እስራኤላውያን እንዲሁ አደረጉ።

ኀጢአትን መናዘዝና ካሳ መክፈል

⁵ከዚያም አባታችን ሙሴን እንዲህ ሲል ተናገረ፦

⁶“ለእስራኤል ሕዝብ እንዲህ ብለህ ንገራቸው፤ ወንድ ወይም ሴት ሰዎች ከሚሠሩት ኀጢአት አንዱን ሠርቶ ቢከዳኝ፣ ያ ሰው በደለኛ ነው። ⁷የሠሩትን ኀጢአት መናዘዝ አለባቸው፤ ስለ በደሉ ሙሉ ካሳ ይክፈሉ፤ አንድ አምስተኛውን ጨምረው ለበደሉት ሰው ይስጡ። ⁸ነገር ግን ያ ሰው ካሳውን የሚቀበል ዘመድ ከሌለው፣ ካሳው የእኔ ስለሆነ ለካህኑ ይሰጣል፤ ከዚህም ጋራ በደለኛውን ለማስተስረይ የሚቀርበው አውራ በግ ይጨመራል። ⁹እስራኤላውያን ከሚያቀርቡት ከተቀደሱት ስጦታዎች ሁሉ ወደ ካህኑ የሚመጣው መባ ሁሉ የእርሱ ነው። ¹⁰የእያንዳንዱ ሰው የተቀደሰ ስጦታ የራሱ ሆኖ ይኖራል፤ ሰው ለካህኑ የሚሰጠው ግን የካህኑ ነው።”

የቅንዓት ፈተና

¹¹ከዚያም አባታችን ሙሴን እንዲህ ሲል ተናገረ፦

¹²“ለእስራኤላውያን እንዲህ ብለህ ንገራቸው፤ የማንም ሰው ሚስት ብትስትና ለባሏ ታማኝ ባትሆን፣ ¹³ሌላ ሰው ከእርሷ ጋራ ተኝቶ ይህም ከባሏ ተሰውሮ፣ ምንም እንኳ ብትረክስ ሳትታወቅ ብትቀር፣ የሚመሰክርባትም ባይኖር፣ በድርጊቱም ላይ ባትያዝ፣ ¹⁴የቅንዓት መንፈስ ባልዋን አድሮበት በረከሰችው ሚስቱ ላይ ቢቀናባት፣ ወይም የቅንዓት መንፈስ አድሮበት ባትረክስም እንኳ ቢቀናባት፣ ¹⁵ሰውዬው ሚስቱን ከቍርባንዋ ጋራ ወደ ካህኑ ያምጣ፤ ቍርባንዋም ሁለት ሊትር ያህል የገብስ ዱቄት ይሁን። ይህ የቅንዓት የእህል ቍርባን፣ በደልን የሚያስታውስ የመታሰቢያ ቍርባን ስለሆነ፣ ዘይት አያፍስስበት፤ ዕጣንም አያድርግበት። ¹⁶ካህኑም ያቅርባት፤ በአባታችንም ፊት ያቁማት። ¹⁷ካህኑም በሸክላ ዕቃ ውስጥ የተቀደሰ ውሃ ይውሰድ፤ ከማደሪያው ድንኳን ወለል ላይ ዐፈር ወስዶ በውሃው ውስጥ ይጨምር። ^a a v17 ይህ የመራራ ውሃ ሥርዐት ከእግዚአብሔር የሆነ የፈተና ፍርድ ነበር፤ ሴቲቱ በደለኛ ብትሆን በሥጋዋ ላይ ጉዳት ይደርስባታል፤ ንጹሕ ብትሆን ግን ምንም ጉዳት አይደርስባትም። ¹⁸ካህኑም ሴቲቱን በአባታችን ፊት ያቁማት፤ ጠጕሯንም ይፍታ፤ የመታሰቢያውን የእህል ቍርባን ማለትም የቅንዓቱን ቍርባን በእጆቿ ላይ ያድርግ፤ እርሱም መራራውን መርገምን የሚያመጣ ውሃ በእጁ ይይዝ። ¹⁹ካህኑም እንዲህ ብሎ ያምላት፤ ‘ማንም ሰው ከአንቺ ጋራ ካልተኛ፣ አንቺም ሳትስቺ በባልሽ ሥልጣን ሥር ሳትረክሺ ብትሆኚ፣ መርገምን ከሚያመጣው ከዚህ መራራ ውሃ ንጽሕት ሁኚ። ²⁰ነገር ግን በባልሽ ሥር ሳለሽ ስተሽ ብትረክሺ፣ ከባልሽም ሌላ ሰው ከአንቺ ጋራ ተኝቶ ቢሆን፣’ ²¹ካህኑም ሴቲቱን በዚህ የመርገም መሐላ እንዲህ ብሎ ያስራት፤ አብ ጭንሽን አድርቆ ሆድሽን ባስነፋ ጊዜ፣ በሕዝብሽ መካከል ለመርገምና ለውርደት ያድርግሽ፤ ²²መርገምን የሚያመጣው ይህ ውሃ ወደ ሰውነትሽ ገብቶ ሆድሽን ያስነፋ፤ ጭንሽንም ያድርቅ። ሴቲቱም፣ ‘አሜን፣ አሜን’ ትበል።

²³“ከዚያም ካህኑ እነዚህን መርገሞች በጥቅልል ጽፎ ወደ መራራው ውሃ ውስጥ ያጥባቸው። ²⁴ሴቲቱንም መራራውን የመርገም ውሃ ያጠጣት፤ የመርገሙም ውሃ ገብቶባት መራራ ሥቃይ ያመጣባታል። ²⁵ካህኑም የቅንዓቱን የእህል ቍርባን ከእጇ ወስዶ በአባታችን ፊት ያወዛውዘው፤ ወደ መሠውያውም ያቅርበው። ²⁶ካህኑም ከእህሉ ቍርባን ማለትም ከመታሰቢያው እፍኝ ሞልቶ ወስዶ በመሠውያው ላይ ያቃጥለው፤ ከዚያም ሴቲቱን ውሃውን ያጠጣት። ²⁷ውሃውንም ካጠጣት በኋላ፣ ራሷን አርክሳ ባሏን ከድታ ከሆነ፣ መርገምን የሚያመጣው ውሃ ገብቶባት መራራ ሥቃይ ያመጣባታል፤ ሆዷ ይነፋል፤ ጭኗም ይደርቃል፤ እርሷም በሕዝቧ መካከል የመርገም ምሳሌ ትሆናለች። ²⁸ሴቲቱ ግን ራሷን ያላረከሰችና ንጹሕ ከሆነች፣ ነጻ ትሆናለች፤ ልጆችንም ትፀንሳለች።

²⁹“የቅንዓት ሕግ ይህ ነው፤ በባሏ ሥር ያለች ሚስት ስታ ራሷን ባረከሰች ጊዜ፣ ³⁰ወይም የቅንዓት መንፈስ ሰውን ይዞት በሚስቱ ላይ በቀናባት ጊዜ፣ ሚስቱን በአባታችን ፊት ያቁም፤ ካህኑም ይህን ሕግ ሁሉ በእርሷ ላይ ያድርግ። ³¹ባሉም ከበደል ነጻ ይሆናል፤ ሴቲቱ ግን የራሷን ኀጢአት ትሸከማለች።”