Mishān 5

5 ¹Ithumwui Avāna Mosesli hānga,

²"Israelnaobingli ningmilu: phārrei kazāt kalei mi kachiva̱, zaizai khangaya̱ mi kachiva̱, kala kathingun eina makathar kahai mi kachiva̱ chi rāmrahwui eina chihovālu. ³Mayarnao eina sha̱nao khanini chihovālu; I athumwui ngachaili leiki kaji athumwui rāmrah chi makathar masākhavai, athumli rāmrahwui ayarli chihovālu."

⁴Israelnaobingna hi sāda, athumli rāmrahwui ayarli chihovā; ithumwui Avāna Mosesli hāngkahai athishurda, Israelnaobingna sai.

Morei Hāngphat kala Aman Run

⁵Kala ithumwui Avāna Mosesli hānga,

⁶"Israelnaobingli hānglu: Mayarnao lah sha̱nao akhana mikumowui morei khipālikha sāda, ili mashitsangkapaida, chikathā mi chi yonkahaina. ⁷Athumna sākahai morei chi hāngphatra, khayonwui vang tongtingda hanrā, chiwuitungli sharuk phangāwui akha mataida, athumna khayon sākahai mi chili mira. ⁸Kha chikathā mi chili aman runsamphangkhavai athei-asā maleiakha, aman chi iwui ngasāda, yonkahai mi chiwui vang aton sākhavai yaovā ngasoda pāngmonli mira. ⁹Israelnaobingna pāngmonli khuirā kathara chigat saikorawui ngachaili, chigat kachiva̱ chi pāngmonwuina. ¹⁰Mi kachiva̱wui kathara chigat chi kachichāwuina leichingra; mi akhana pāngmonli miki kaji chi pāngmonwuina."

Yuikashiwui Bichar

¹¹Kala ithumwui Avāna Mosesli hānga,

¹²"Israelnaobingli hānglu: Mi akhawui preiva̱na ma̱zatta, ali mashitsangkapaiakha, ¹³mi khangatei akhana ali ngasopida, agaharawui eina ngathumda, makathar sāhailala matheimada—ali shākhi maleila, otsak khalatta maphāhaida, ¹⁴yuikashiwui manglā gaharawuitungli rāda, ana makathar kahai apreiva̱li yuishiakha; lah yuikashiwui manglā awuitungli rāda, apreiva̱ makathar maleilala ana ali yuishiakha, ¹⁵Mayarnao china apreiva̱li pāngmonli khuirāra, awui chigat eina ngasoda: yaoyi mathir akhum katharā. Chiwuitungli thao maheisangmara kala frankincensela masangmara, kaja hi yuikashiwui tharāzātchigat, khayon phaningung ngasak khavai phaningungwui tharāzātchigatna. ¹⁶Pāngmon china ali rānganai ngasakta ithumwui Avāwui mangāli haira. ¹⁷Pāngmon china leikhon ham akhali kathara tara̱ khuida, tabernaclewui chonnarli khalei chifa khuilaga, chi tara̱li sangra. ^a a v17 Hi kakhā tara̱wui acham chi Varewui eina khanaowa bichar akhana: kalikhada sha̱nao chi yonkahaiakha, awui phasāli khayā samphangra; kha khayon maleiakha, awui vang khayākha masamphangmara. ¹⁸Pāngmon china sha̱nao chi ithumwui Avā mangāli nganing ngasaklaga, awui sam khalāhaida, kala phaningung khavai tharāzāt kachigat, yuikashi kachigat chi awui pāngli sangra; kala ana khonkashi khuivā tara̱ khai chi singra. ¹⁹Pāngmon china sha̱nao chi khangashit ngasaklaga ali hānghaora: 'Mayarnao akhana nali mangasopilaga, kala na mama̱thuida nagaharawui azingli nakhalatta masākhamāngakha, khonkashi khuivā tara̱ khai hiwui eina ningkhānranu. ²⁰Kha na nagaharawui azingli ma̱thuihaida, nakhalatta sākhamānghaida, kala nagahara mahutli mayarnao khangatei akhana nali ngasopimihaiakha.' ²¹Chieina pāngmon china sha̱nao chi hi khonkashi khangashit eina khalaplaga hānghaora: Avāna nakhaishāng thengsang ngasakta kala nawuk worshok ngasak tharan, nali namibingwui alungli khonkashi kala maikashi sāngasakranu; ²²hi khonkashi khuivā tara̱ china nawui phasāli zangda, nawuk worshok ngasakta kala nakhaishāng theng ngasakranu. Chieina sha̱nao china, 'Amen, Amen' jira.

²³"Chieina pāngmon china hi khonkashibing chi lairik akhalui akhali kapisanglaga, chi tara̱ khai chili ngasāmhaora. ²⁴Ana sha̱nao chi khonkashi tara̱ khai chi mang ngasakra; khonkashi tara̱ china awui alungli zangda, khai kachotkachāng sāmira. ²⁵Pāngmon china sha̱naowui pāngwui eina yuikashi tharāzāt kachigat chi khuilaga, chi ithumwui Avā mangāli khayitta, hanphuttungli khuikāra. ²⁶Pāngmon china tharāzāt kachigatwui eina phaningung khavai panghomkha khuilaga, hanphuttungli riktāra, chiwui thili sha̱nao chi tara̱ chi mang ngasakra. ²⁷Ana ali tara̱ chi mang ngasakhao thili, sha̱nao china akhalatta sākhamānghaida awui gaharali yankasai kahaiakha, khonkashi khuivā tara̱ china awui alungli zangda, khai kachotkachāng sāmira: awuk worshokra, awui khaishāng thengra, kala a awui mibingwui alungli khonkashi ngasāra. ²⁸Kha sha̱nao china akhalatta masākhamānglaga katharla leiakha, a ningkhānhaira, kala nao vaira.

²⁹"Hi yuikashiwui ainna: preiva̱ akhana agaharawui azingli leilakha ma̱thuida akhalatta sākhamāngakha, ³⁰lah yuikashi manglā akhana mayarnao akhali seizat tharan, kala ana apreiva̱li yuishiakha: ana ali ithumwui Avā mangāli nganing ngasakra, kala pāngmon china hi ain saikora chi awui vang sāmira. ³¹"Gahara china khayonwui eina ningkhānhaira, kha sha̱nao china akhalattawui morei phungra."