ዘኍልቍ 4

4 ¹አባታችን ሙሴንና አሮንን እንዲህ ሲል ተናገራቸው፤

²“ከሌዋውያን መካከል የቀዓትን ልጆች እንደ ጐሣቸውና እንደ አባቶቻቸው ቤት ቍጠር። ³ከሠላሳ ዓመት እስከ አምሳ ዓመት ዕድሜ ያላቸውን፣ በመገናኛው ድንኳን ውስጥ ለመሥራት ወደ አገልግሎቱ የሚገቡትን ሁሉ ቍጠር።

⁴“የቀዓት ልጆች በመገናኛው ድንኳን ውስጥ የሚያገለግሉት አገልግሎት ይህ ነው፤ እጅግ ቅዱስ የሆኑትን ነገሮች መንከባከብ ነው። ⁵ሰፈሩ በሚነሣበት ጊዜ፣ አሮንና ልጆቹ የሚጋርደውን መጋረጃ አውርደው የምስክሩን ታቦት በእርሱ ይሸፍኑ። ⁶ከዚያም በጥሩ ቈዳ ይሸፍኑት፤ በላዩም ሰማያዊ ጨርቅ ብቻ ይዘርጉ፤ መሎጊያዎቹንም ያግቡ።

⁷“በገቦ ጠረጴዛ ላይ ሰማያዊ ጨርቅ ይዘርጉ፤ ሳሕኖቹን፣ ዕቃዎቹን፣ ጽዋዎቹንና መጠጥ ማፍሰሻ ማሰሮዎቹን በላዩ ያስቀምጡ፤ መደበኛውም ኅብስት በላዩ ይኑር። ⁸በእነርሱም ላይ ቀይ ጨርቅ ይዘርጉ፤ በጥሩ ቈዳ ይሸፍኑት፤ መሎጊያዎቹንም ያግቡ።

⁹“ሰማያዊ ጨርቅ ወስደው የብርሃኑን መቅረዝ፣ መብራቶቹን፣ መቈንጠጫዎቹን፣ ትሪዎቹንና የሚያገለግሉበትን የዘይት ዕቃዎች ሁሉ ይሸፍኑ። ¹⁰እርሱንና ዕቃዎቹን ሁሉ በጥሩ ቈዳ ጠቅልለው በመሸከሚያው ቋሚ ላይ ያኑሩት።

¹¹“በወርቁ መሠዊያ ላይ ሰማያዊ ጨርቅ ይዘርጉ፤ በጥሩ ቈዳ ይሸፍኑት፤ መሎጊያዎቹንም ያግቡ። ¹²በመቅደሱ ውስጥ የሚያገለግሉባቸውን የአገልግሎት ዕቃዎች ሁሉ ወስደው በሰማያዊ ጨርቅ ያድርጓቸው፤ በጥሩ ቈዳ ይሸፍኑ፤ በመሸከሚያው መሎጊያ ላይም ያኑሯቸው።

¹³“ከመሠዊያውም አመዱን አስወግደው በላዩ ሐምራዊ ጨርቅ ይዘርጉ። ¹⁴በላዩም የሚያገለግሉባቸውን ዕቃዎች ሁሉ ያኑሩ፤ የእሳት ማንሻዎችን፣ ሹካዎችን፣ መጫሪያዎችን፣ ገበታዎችንና የመሠዊያውን ዕቃዎች ሁሉ፤ ከዚያም በላዩ የጥሩ ቈዳ መሸፈኛ ይዘርጉ፤ መሎጊያዎቹንም ያግቡ።

¹⁵“አሮንና ልጆቹ ቅዱሳኑን ነገሮችና የመቅደሱን ዕቃዎች ሁሉ ሸፍነው እንደ ጨረሱ፣ ሰፈሩም ሲነሣ፣ የቀዓት ልጆች ሊሸከሟቸው ይምጡ፤ ነገር ግን እንዳይሞቱ ቅዱሳኑን ነገሮች አይንኩ። በመገናኛው ድንኳን ውስጥ የቀዓት ልጆች የሚሸከሙት ሸክም ይህ ነው።

¹⁶“የካህኑ የአሮን ልጅ አልዓዛር ለመብራቱ ዘይት፣ ለመዓዛው ዕጣን፣ ለዕለታዊው የእህል ቍርባንና ለቅብዐ ዘይት ኀላፊ ነው፤ ለማደሪያው ድንኳን ሁሉ፣ በውስጡም ላለው ነገር ሁሉ፣ ለመቅደሱና ለዕቃዎቹ ኀላፊ ነው።”

¹⁷አባታችን ሙሴንና አሮንን እንዲህ ሲል ተናገራቸው፤

¹⁸“የቀዓት ጐሣዎች ነገድ ከሌዋውያን መካከል እንዳይጠፋ አድርጉ። ¹⁹እጅግ ወደ ተቀደሱት ነገሮች በሚቀርቡበት ጊዜ ይኖሩ ዘንድ እንጂ እንዳይሞቱ ይህን አድርጉላቸው፤ አሮንና ልጆቹ ገብተው እያንዳንዱን ለተግባሩና ለሸክሙ ይመድቡት። ²⁰እነርሱ ግን ቅዱሳኑን ነገሮች ለቅጽበትም ቢሆን ገብተው አይዩ፤ አለዚያ ይሞታሉ።”

የጌድሶናውያን ድርሻ

²¹አባታችን ሙሴን እንዲህ ሲል ተናገረው፤

²²“የጌድሶንንም ልጆች እንደ አባቶቻቸው ቤትና እንደ ጐሣቸው ቍጠር። ²³ከሠላሳ ዓመት እስከ አምሳ ዓመት ዕድሜ ያላቸውን፣ በመገናኛው ድንኳን ሥራ የሚያገለግሉትን ሁሉ ቍጠር።

²⁴“በማገልገልና በመሸከም የጌድሶናውያን ጐሣዎች አገልግሎት ይህ ነው፤ ²⁵የማደሪያውን ድንኳን መጋረጃዎች፣ የመገናኛውን ድንኳን፣ መሸፈኛውን፣ በላዩ ያለውን የጥሩ ቈዳ መሸፈኛ፣ የመገናኛውን ድንኳን መግቢያ መጋረጃም ይሸከሙ፤ ²⁶ማደሪያውንና መሠዊያውን ዙሪያ የከበቡትን የአደባባዩን መጋረጃዎች፣ የአደባባዩ በር መግቢያ መጋረጃ፣ ገመዶቻቸውንና የአገልግሎት መሣሪያዎቻቸውን ሁሉ ይሸከሙ፤ ለእነዚህ የሚያስፈልገውንም ሁሉ ያድርጉ። ²⁷የጌድሶናውያንን አገልግሎት ሁሉ፣ ማለትም መሸከማቸውንና ተግባራቸውን አሮንና ልጆቹ ይምሩ፤ የሚሸከሙትንም ሁሉ ምደቡላቸው። ²⁸በመገናኛው ድንኳን የጌድሶናውያን ጐሣዎች አገልግሎት ይህ ነው፤ ተግባራቸውም በካህኑ የአሮን ልጅ በኢታምር ሥር ነው።

የሜራሪ ልጆች

²⁹“የሜራሪን ልጆች ደግሞ እንደ ጐሣቸውና እንደ አባቶቻቸው ቤት ቍጠራቸው። ³⁰ከሠላሳ ዓመት እስከ አምሳ ዓመት ዕድሜ ያለውን፣ በመገናኛው ድንኳን ለመሥራት ወደ አገልግሎቱ የሚገባውን ሁሉ ቍጠር። ³¹በመገናኛው ድንኳን ተግባራቸውና አገልግሎታቸው ይህ ነው፤ የማደሪያው ድንኳን ሳንቃዎች፣ መወርወሪያዎች፣ ምሰሶዎችና መሠረቶች ናቸው። ³²በዙሪያው ያሉት የአደባባዩ ምሰሶዎች፣ ከመሠረቶቻቸው፣ ከችካሎቻቸውና ከገመዶቻቸው ጋር፣ መሣሪያዎቻቸውና አገልግሎታቸው ሁሉ ናቸው፤ እያንዳንዱ የሚሸከመውንም በስም መድቡ። ³³በመገናኛው ድንኳን የሜራሪ ጐሣዎች አገልግሎት ይህ ነው፤ በካህኑ የአሮን ልጅ በኢታምር ሥር ነው።”

በስም የተቈጠሩ ሁሉ

³⁴ስለዚህ ሙሴ፣ አሮንና የማኅበሩ መሪዎች የቀዓታውያንን ልጆች እንደ ጐሣቸውና እንደ አባቶቻቸው ቤት ቈጠሩ፤ ³⁵ከሠላሳ ዓመት እስከ አምሳ ዓመት ዕድሜ ያላቸውን፣ በመገናኛው ድንኳን ለመሥራት ወደ አገልግሎቱ የገቡትን ሁሉ ቈጠሩ። ³⁶እንደ ጐሣቸውም የተቈጠሩት 2,750 ነበሩ። ³⁷በመገናኛው ድንኳን ያገለገሉት የቀዓት ጐሣዎች የተቈጠሩት ብዛት ይህ ነው፤ ሙሴና አሮን አባታችን በሙሴ በኩል ባዘዘው ትእዛዝ መሠረት ቈጠሯቸው።

³⁸ከጌድሶንም ልጆች እንደ ጐሣቸውና እንደ አባቶቻቸው ቤት የተቈጠሩት፣ ³⁹ከሠላሳ ዓመት እስከ አምሳ ዓመት ዕድሜ ያላቸው፣ በመገናኛው ድንኳን የአገልግሎት ሥራ የገቡት ሁሉ፣ ⁴⁰እንደ ጐሣቸውና እንደ አባቶቻቸው ቤት የተቈጠሩት 2,630 ነበሩ። ⁴¹በመገናኛው ድንኳን ያገለገሉት ከጌድሶናውያን ጐሣዎች የተቈጠሩት እነዚህ ናቸው፤ ሙሴና አሮን አባታችን ባዘዘው ትእዛዝ መሠረት ቈጠሯቸው።

⁴²ከሜራሪም ልጆች ጐሣዎች እንደ ጐሣቸውና እንደ አባቶቻቸው ቤት የተቈጠሩት፣ ⁴³ከሠላሳ ዓመት እስከ አምሳ ዓመት ዕድሜ ያላቸው፣ በመገናኛው ድንኳን ለመሥራት ወደ አገልግሎቱ የገቡት ሁሉ፣ ⁴⁴እንደ ጐሣቸው የተቈጠሩት 3,200 ነበሩ። ⁴⁵ከሜራሪ ልጆች ጐሣዎች የተቈጠሩት እነዚህ ናቸው፤ ሙሴና አሮን አባታችን በሙሴ በኩል ባዘዘው ትእዛዝ መሠረት ቈጠሯቸው።

⁴⁶ሙሴ፣ አሮንና የእስራኤል መሪዎች ከሌዋውያን መካከል እንደ ጐሣቸውና እንደ አባቶቻቸው ቤት የቈጠሯቸው ሁሉ፣ ⁴⁷ከሠላሳ ዓመት እስከ አምሳ ዓመት ዕድሜ ያለው፣ በመገናኛው ድንኳን ያገለገለና ሸክም የተሸከመ ሁሉ፣ ⁴⁸የተቈጠሩት 8,580 ነበሩ። ⁴⁹አባታችን ባዘዘው መሠረት፣ ሙሴ እያንዳንዱን ለአገልግሎቱና ለሸክሙ መደበው፤ አባታችንም ሙሴን እንዳዘዘው ቈጠራቸው።