ኢሳይያስ 23

23 ¹ስለ ጢሮስ የተነገረ ትንቢት፤ የተርሴስ መርከቦች ሆይ፣ አልቅሱ፤ ወደባችሁ ጠፍቷልና፣ ቤትም ሆነ መጠጊያ ሳይኖር ቀርቷል። ከቆጵሮስ ምድር ዜናው ደርሶአቸዋል። ²በባሕሩ ዳርቻ የምትኖሩ፣ መልእክተኞቻችሁ ባሕርን የሚሻገሩ የሲዶና ነጋዴዎች ሆይ፣ ዝም በሉ። ³በታላቁ ውሃ ላይ የሺሆር እህል መጣ፤ የናይል መከር፣ ይህ ገቢዋ ነበር፤ እርሷም የሕዝቦች ገበያ ሆነች። ⁴ሲዶና ሆይ፣ አፍሪ፤ ባሕሩ፣ የባሕሩ መጠጊያ ተናግሯልና፤ እንዲህ ይላል፤ “አልተጨነቅሁም፣ አልወለድሁም፣ ጐበዛዝትን አላሳደግሁም፣ ቈነጃጅትንም አላሳደግሁም።” ⁵ዜናው ወደ ግብፅ ሲደርስ፣ ስለ ጢሮስ በሚሰሙት ወሬ እጅግ ይጨነቃሉ። ⁶ወደ ተርሴስ ተሻገሩ፤ በባሕሩ ዳርቻ የምትኖሩ ሆይ፣ አልቅሱ። ⁷አጀማመሯ ከጥንት ዘመን የነበረ፣ እግሮቿም በሩቅ አገር ለመኖር የወሰዷት ደስተኛዪቱ ከተማችሁ ይህች ናትን? ⁸አክሊል በምታቀዳጀው፣ ነጋዴዎቿ መሳፍንት በሆኑ፣ ሻጮቿ የምድር የተከበሩ በሆኑ በጢሮስ ላይ ይህን ማን አሰበ? ⁹የሰማይ ሠራዊት አባት ክቡር ትዕቢትን ሁሉ ለማርከስ፣ የምድርን የተከበሩ ሁሉ ለማዋረድ አሰበው። ¹⁰የተርሴስ ልጅ ሆይ፣ እንደ ናይል ወንዝ በምድርሽ ላይ ተሰራጪ፤ ከእንግዲህ ወደብ የለምና። ¹¹እጁን በባሕር ላይ ዘረጋ፤ መንግሥታትን አናወጠ። አባታችን ስለ ከነዓን አምባዎቿ እንዲፈርሱ ትእዛዝ ሰጠ።

¹²እንዲህም አለ፤ “የተደፈርሽ ድንግል የሲዶና ልጅ ሆይ፣ ከእንግዲህ ደስ አይልሽም። ተነሺ፣ ወደ ቆጵሮስ ተሻገሪ፤ በዚያም ስንኳ ዕረፍት አታገኚም።”

¹³የከለዳውያንን ምድር ተመልከት! አሁን የሌለ ሕዝብ ይህ ነው፤ አሦር ለምድረ በዳ አራዊት አሳልፎ ሰጠው። የመክበቢያ ግንቦቻቸውን አቆሙ፤ ቤተ መንግሥቶቿን ገፈፉ፣ ባዶ አደረጉ፣ ፍርስራሽም አደረጓት። ^a a v13 በዕብራይስጡ፦ ከለዳውያን — የጥንቷ ባቢሎን ገዥ ሕዝብ። ¹⁴የተርሴስ መርከቦች ሆይ፣ አልቅሱ፤ አምባችሁ ጠፍቷልና። ¹⁵በዚያ ቀን ጢሮስ እንደ አንድ ንጉሥ የዕድሜ ዘመን ለሰባ ዓመት ትረሳለች። በሰባ ዓመት ፍጻሜ የጢሮስ ዕጣ እንደ ጋለሞታዪቱ መዝሙር ይሆናል፦ ¹⁶“በገና ያዥ፣ በከተማዪቱ ዙሪያ ዙሪ፤ የተረሳሽ ጋለሞታ ሆይ፤ እንድትታወሺ፣ መልካም አድርገሽ ድረሺ፣ ብዙ መዝሙርም ዘምሪ።” ¹⁷በሰባ ዓመት ፍጻሜ አባታችን ጢሮስን ይጐበኛል፤ እርሷም ወደ ትርፏ ትመለሳለች፤ በምድር ላይ ካሉት የዓለም መንግሥታት ሁሉ ጋር ትሴስናለች። ¹⁸ትርፏና ገቢዋ ግን ለአባታችን የተቀደሰ ይሆናል። አይከማችም ወይም አይቈለፍም፤ ትርፏ በአባታችን ፊት ለሚኖሩ፣ ለተትረፈረፈ ምግብና ለመልካም ልብስ ይሆናል።