Isaiah 23

23 ¹Tyrewui pongli khamarān: Chapngachālu, O Tarshishwui marikhongbing, kaja nawui jahas ngasām khavaipam sāshimānhaira, shim lah pam maleila sāhaira. Cyprus ngaleiwui eina pao chi athumli rāshunga. ²Kasaikha pamlu, shamadrupheili khaleibing, Sidonwui leihkhalonbing, awui paomebingna shamadru makāna. ³Tara̱ kachungkhawui lākhavāk Shihorwui kashakazā rāhaira, Nilewui māhā, kala hina awui shai kakhui sai; kala ana yurbingwui leihngapha̱ sāhaira. ⁴Khayaklu, O Sidon, kaja shamadruna hānga, shamadruwui raipanna, hithāda hānga: "Ina makhananglakmana, lah nao mapharāmana, ina yaronnao ring makhangasakmana, lah ngalānao ring makhangasakmana." ⁵Pao chi Egyptli rāshung tharan, Tyrewui pao chi shālaga athum angun eina chotra. ⁶Tarshishli makānlu; chapngachālu, shamadrupheili khaleibing. ⁷Hi nawui khamathāna keinung chila, awui haophok chi achālakhawui eina kharā, awui pheina ali ngalei katāva̱bingli pamkhavai khuivā chila? ⁸Khipāna Tyreli hi khangarān sai, kuihon horsang kasā, awui leihkhalonbingna wungnaobing sai, awui leih kasābingna okathuiwui khayākakāpābing sākhala? ⁹Tekhamatei langkaso saikora sākhamāng khavai, kala okathuiwui khayākakāpā saikora maishi ngasak khavai, saikorawui Avāna hi khangarān sāhaira. ¹⁰Nile thāda nawui ngaleili longlu, Tarshishwui naongalāva̱; jahas ngasām khavaipam maleiluimara. ¹¹Ana shamadrutungli apāng katingshoka; ana wungrambingli sāngatha̱haira. Canaanwui pongli awui raipanbing sāshimān khavai, ithumwui Avāna ningkhami sai.

¹²Ana hānga, "Na maringphāluimara, sākhamāng kahai Sidonwui kachingva̱ naongalāva̱. Ngakarthuilu, Cyprusli makānlu; chilila na ngasāmkakhui maphāmara."

¹³Babylonnaobingwui ngalei chi yanglu! Hi chi maleiluikahai mibingna; Assyriana chi siwukwui sāyurbingli mihaira. Athumna raikānphungbing sakā, athumna awui konungbing raimiserhaira, athumna chi ruinganai sāmihaira. ^a a v13 Hebrew: Chaldeanaobing — achālakhawui Babylonli munga mibingna. ¹⁴Chapngachālu, O Tarshishwui marikhongbing, kaja nawui raipan sāshimānhaira. ¹⁵Chithanghon awunga akhawui thot thāda, Tyre chi zingkum hangshinithang malaihaora. Zingkum hangshini kānthuiwui thili, Tyrewui atam chi khayorva̱wui laa thāda sāra: ¹⁶"Tingteilā khuilu, keinungli kuiung-kuivālu, malaikahai khayorva̱; leishiri eina huikazaklu, laa kachungkha sālu, chithākha nali phaningungra." ¹⁷Zingkum hangshini kānthuiwui thili, ithumwui Avāna Tyreli ngareivāra, kala ana awui amanli latluida, ngaleitungli khalei okathuiwui wungram saikorali ngasoda khayor sāra. ¹⁸Kha awui tongkazā kala awui aman chi ithumwui Avāli kathara tharchigatra. Chi makaziphaimara lah makhorhaimara; kashakazā kachungkha kala kashankachon khangavāwui vang, awui tongkazā chi ithumwui Avāwui mangāli kapamabingli samphangra.