Isaiah 23

23 ¹Ọ̀rọ̀-ìran nípa Tire: Ẹ hu, ẹ̀yin ọkọ̀ ojú omi Tarṣiṣi, nítorí tí èbúté yín ti parun, tí a fi sílẹ̀ láìní ilé tàbí ibùsọ̀. Láti ilẹ̀ Kipru ni ìròyìn náà ti dé ọ̀dọ̀ wọn. ²Ẹ dákẹ́ jẹ́ẹ́, ẹ̀yin tí ń gbé ní etí Òkun, ẹ̀yin oníṣòwò Sidoni, àwọn tí ìránṣẹ́ wọn ń rékọjá Òkun. ³Lórí omi ńlá ni ọkà Ṣihori gbà wá, ìkórè odò Naili—èyí ni èrè rẹ̀; ó sì di ọjà àwọn orílẹ̀-èdè. ⁴Kí ojú kí ó tì ọ́, Sidoni, nítorí Òkun ti sọ̀rọ̀, odi agbára Òkun, pé: “Èmi kò rọbí bẹ́ẹ̀ ni èmi kò bímọ, èmi kò tọ́ àwọn ọ̀dọ́kùnrin dàgbà bẹ́ẹ̀ ni èmi kò gbé àwọn ọ̀dọ́bìnrin dàgbà.” ⁵Nígbà tí ìròyìn náà bá dé Ijipti, wọn yóò wà nínú ìrora ńláǹlà nítorí ìròyìn nípa Tire. ⁶Ẹ rékọjá lọ sí Tarṣiṣi; ẹ hu, ẹ̀yin tí ń gbé ní etí Òkun. ⁷Èyí ha ni ìlú yín tí ó kún fún ayọ̀, èyí tí ìpilẹ̀ṣẹ̀ rẹ̀ ti wà láti ìgbà pípẹ́ sẹ́yìn, tí ẹsẹ̀ rẹ̀ gbé e lọ láti máa gbé ní ilẹ̀ jíjìnnà? ⁸Ta ni ó gbèrò èyí sí Tire, olùfún ni adé, èyí tí àwọn oníṣòwò rẹ̀ jẹ́ ọmọ-aládé, tí àwọn onípàtẹ rẹ̀ jẹ́ ẹni-ọ̀wọ̀ ayé? ⁹Baba àwọn ọmọ-ogun ọ̀run ti gbèrò rẹ̀—láti ba gbogbo ìgbéraga ológo jẹ́, láti rẹ gbogbo ẹni-ọ̀wọ̀ ayé sílẹ̀. ¹⁰Ṣàn gba ilẹ̀ rẹ kọjá bí odò Naili, ọmọbìnrin Tarṣiṣi; kò sí èbúté mọ́. ¹¹Ó ti na ọwọ́ rẹ̀ sórí Òkun; ó ti mi àwọn ìjọba tìtì. Baba wa ti pàṣẹ nípa Kenaani láti pa àwọn odi agbára rẹ̀ run.

¹²Ó wí pé, “Ìwọ kì yóò yọ̀ mọ́, ìwọ wúńdíá ọmọbìnrin Sidoni tí a ti bà jẹ́. Dìde, rékọjá lọ sí Kipru; kódà níbẹ̀ ìwọ kì yóò rí ìsinmi.”

¹³Wo ilẹ̀ àwọn ará Babeli! Èyí ni àwọn ènìyàn tí kò sí mọ́; Asiria fi í lé àwọn ẹranko aginjù lọ́wọ́. Wọ́n gbé àwọn ilé-ìṣọ́ ogun wọn ró, wọ́n sì tú àwọn ààfin rẹ̀ sílẹ̀ pátápátá, wọ́n sọ ọ́ di ahoro. ^a a v13 Èdè Hébérù: àwọn ará Kaldea — àwọn ènìyàn tí ń ṣàkóso Babeli ìgbàanì. ¹⁴Ẹ hu, ẹ̀yin ọkọ̀ ojú omi Tarṣiṣi, nítorí tí a ti pa odi agbára yín run. ¹⁵Ní ọjọ́ náà, a ó gbàgbé Tire fún àádọ́rin ọdún, gẹ́gẹ́ bí ọjọ́ ayé ọba kan. Ní òpin àádọ́rin ọdún, ìpín Tire yóò dàbí orin aṣẹ́wó: ¹⁶“Mú dùùrù, rìn ká ìlú, ìwọ aṣẹ́wó tí a ti gbàgbé; tẹ dùùrù dáradára, kọ orin púpọ̀, kí a lè rántí rẹ.” ¹⁷Ní òpin àádọ́rin ọdún, Baba wa yóò bẹ Tire wò, yóò sì padà sí èrè rẹ̀, yóò máa ṣe àgbèrè pẹ̀lú gbogbo ìjọba ayé jákèjádò ilẹ̀ ayé. ¹⁸Ṣùgbọ́n èrè rẹ̀ àti owó oṣù rẹ̀ ni a ó yà sọ́tọ̀ gẹ́gẹ́ bí mímọ́ fún Baba wa. A kì yóò kó o jọ tàbí tò ó pamọ́; èrè rẹ̀ yóò lọ sọ́dọ̀ àwọn tí ń gbé níwájú Baba wa, fún oúnjẹ lọ́pọ̀lọpọ̀ àti aṣọ àmúrè dáradára.