Isaia 23 FHB Father's Heart Bible™

23 ¹Ndũmĩrĩri ĩkoniĩ Turo: Girĩkai, inyuĩ marikabu cia Tarishishi, tondũ gĩcukĩro kĩanyu nĩkĩanangĩtwo, gĩgĩtigwo gĩtarĩ nyũmba kana handũ ha kũũrĩra. Kuuma bũrũri wa Kuporo ũhoro ũcio nĩũkinyĩte kũrĩ o. ²Kirai ki, inyuĩ mũtũũraga rũtereinĩ rwa iria, inyuĩ onjorithia a Sidoni, arĩa atũmwo ao maringaga iria. ³Maaĩinĩ marĩa manene nĩgwokire ngano ya Shihori, na magetha ma Nili—ũcio nĩguo warĩ ũtonga wake; nake agĩtuĩka ndũnyũ ya ndũũrĩrĩ. ⁴Conoka, Sidoni, tondũ iria nĩrĩarĩtie, kĩĩhitho kĩa iria, rĩkiuga atĩrĩ: “Niĩ ndirĩ ndaarĩ na ruo rwa gũciara o na kana ngĩciara, ndirĩ ndarera aanake o na kana ngĩkũria airĩĩtu.” ⁵Rĩrĩa ũhoro ũcio ũgaakinya Misiri, magaakorwo na ruo rũnene nĩ ũndũ wa ũhoro wa Turo. ⁶Ringai mũthiĩ Tarishishi; girĩkai, inyuĩ mũtũũraga rũtereinĩ rwa iria. ⁷Ĩ itũũra rĩĩrĩ nĩrĩo itũũra rĩanyu rĩa gĩkeno, rĩrĩa kĩambĩrĩria kĩarĩo kĩrĩ kuuma matukũ ma tene, rĩrĩa magũrũ marĩo maarĩtwarire gũtũũra mabũrũri ma kũraya? ⁸Nũũ ũbangĩte ũndũ ũyũ wa gũũkĩrĩra Turo, itũũra rĩrĩa rĩaheanaga thũmbĩ cia ũthamaki, rĩrĩa onjorithia arĩo maarĩ anene, rĩrĩa onjoria arĩo maarĩ arĩa matĩĩku a thĩ? ⁹Ithe wa ita cia igũrũ nĩwe ũbangĩte ũndũ ũcio—nĩguo athaahie mwĩtĩĩo wothe wa riiri, na aconorithie arĩa othe matĩĩku a thĩ. ¹⁰Therera bũrũriinĩ waku ta rũũĩ rwa Nili, mwarĩ wa Tarishishi; gũtirĩ gĩcukĩro rĩngĩ. ¹¹Nĩatambũrũkĩtie guoko gwake igũrũ rĩa iria; nĩainainĩtie mothamaki. Ithe witũ nĩaathanĩte ũhoro ũkoniĩ Kanaani atĩ ciĩhitho ciakuo cianangwo.

¹²Akiuga atĩrĩ, “Ndũgaacooka gũkena rĩngĩ, wee mwarĩ gathirange ũnyariirĩtwo wa Sidoni. Ũkĩra, ũringe ũthiĩ Kuporo; o na kũu ndũkoona ũhurũko.”

¹³Rora bũrũri wa Ababuloni! Ũyũ nĩguo rũrĩrĩ rũrĩa rũtagĩcooka kũgĩa ho; Ashuri nĩaarũheanire kũrĩ nyamũ cia werũ. Nĩmaakĩire mĩthiringo yao ya mbaara, magĩtunya nyũmba ciakuo cia ũthamaki indo ciothe igĩtigwo njaga, magĩtũma bũrũri ũcio ũtuĩke kũndũ kwanangĩku. ^a a v13 Kĩhibirania: Akalidei—rũrĩrĩ rũrĩa rwaathanaga Babuloni ya tene. ¹⁴Girĩkai, inyuĩ marikabu cia Tarishishi, tondũ kĩĩhitho kĩanyu nĩkĩanangĩtwo. ¹⁵Mũthenya ũcio Turo nĩrĩkariganĩrwo ihinda rĩa mĩaka mĩrongo mũgwanja, ta ũrĩa muoyo wa mũthamaki ũmwe ũtũũraga. Mĩaka mĩrongo mũgwanja yathira, ũndũ ũrĩa ũgaakora Turo ũgaatuĩka ta rwĩmbo rwa mũmaraya: ¹⁶“Oya kĩnanda kĩa mũgeeto, ũthiũrũrũke itũũra rĩu inene, wee mũmaraya ũriganĩirwo; hũũra wega, ũine nyĩmbo nyingĩ, nĩgeetha ũririkanwo.” ¹⁷Mĩaka mĩrongo mũgwanja yathira, Ithe witũ nĩagaacũthĩrĩria Turo, nake acooke kũrĩ mũcaara wake, ahũũrage ũmaraya na mothamaki mothe ma thĩ kũndũ guothe gwa thĩ. ¹⁸No uumithio wake na mũcaara wake nĩikaamũrwo cĩtuĩke theru harĩ Ithe witũ. Itigeeigwo kana ihũũnjwo; uumithio wake nĩũgaathiĩ kũrĩ arĩa matũũraga mbere ya Ithe witũ, nĩguo magĩe na irio nyingĩ na nguo njega.