Isaiah 22

22 ¹Khamahā Tampākwui pongli khamarān. Ara nathumli khi shokkahaikhala, nathum kachiva̱ shimtungli kāhaira, ^a a v1 Mahākhami Tampāk: Jerusalemwui vang laa thāda ming, keinung kuikhanam khalei tampāk kathukabing chi phaningsak khavaina. ²khonkazar eina pemtinghai keinung, chaokazata pa̱ngapā keinung, ringphāshonshon keinung? Nathumwui kathibing raighai eina mashaothatmana, kala rai eina mathimana. ³Nathumwui khamungabing kachiva̱ katonga yāmhaowa; malā mahunlala athumli tukkhuiya. Nathumli samphangbing saikora katonga tukvāhaowa, nathum katāva̱li yāmhaolala. ⁴Chiwui vang eina ina hānga, "Iwui eina mai ngareithuilu; ina soso chapngachāra. Iwui mibingwui naongalāva̱wui kashimānwui pongli ili ringpha ngasak khavai mahotnāmialu." ⁵Kaja Khamahā Tampākli saikorawui Avāwui khonkazar, naikazam kala pa̱ngapā atam akha lei; phākho shaokhaimihaida, kala ngachonmi khavai khavao kaphungshong tāshunga. ⁶Elamna siguigari eina siguiwui raimibing ngasoda malākhong khuiya, kala Kirna athumwui chāngvei thānzata. ⁷Nathumwui khamathā tampākbing siguigarina pemtinghai, kala siguiwui raimibingna ngaveili raipam akhuiya. ⁸Ithumwui Avāna Judahwui raipan raimithuihaira. Kala chi atamli nathumna Ngahong Shimli khalei raiwui khutlai chi yanga, ^b b v8 Ngahong Shim: Jerusalemli khalei Solomonwui raisāri haipam khareina, cedar thing kachungkha ngavaiwui vang aming phokkahaina. ⁹kala Davidwui keinungli phākho kakai kayākha lei chi nathumna thei. Nathumna khamaze ra̱khongwui tara̱ chi kazipa, ¹⁰kala nathumna Jerusalemwui shimbing chi shinglaga, phākho pingngasakra khavai kaikha shaokhai. ¹¹Nathumna phākho khaniwui ngachaili arar ra̱khongwui tara̱wui vang ra̱khong akha sai, kha chi sākakā chili nathumna mayangmana, kala achālakhawui eina chi khangarān sākahai ithumwui Avāli machukkhuimana. ¹²Chi atamli saikorawui Avāna chapngachā eina sifa khavai, kui shaokhaida bora ngavai khavai ngakaowa. ¹³Kha chi mahutli khamathān eina lumlao lei, sei shaothatta yao shaothatta, sā shaida drakhāra̱ mangda: "Ithum shaida manglu, kaja akhama ithum thira!"

¹⁴Saikorawui Avāna hi ili phongmihaira: "Kachangkhata hi morei nathum mathiranglakha eina tangda nathumwui eina mapheothuipaimara," da saikorawui Avāna hānga.

¹⁵Saikorawui Avāna hithāda hānga: Hi kashina, shimkhurwui tungli khalei Shebnali vāda ali hānglu: ¹⁶Na hili khi sāda leikhala, kala hili leira khavai khipāna nali khamung mikhala, na khalattawui vang hili chikhur akha sāda, kajuia chili nawui chikhur yeksanga, lunghārli nawui ngasām khavaipam chishātla? ¹⁷Na kapinga mi, yanglu, ithumwui Avāna nali khanuk eina horsangra; ana nali pangda tukkhuira. ¹⁸Ana nali ball thāda marar ngasunkhuilaga, ngalei khamashā kathengli shireora. Apam chili na thira, kala apam chili nawui tekhamatei chara̱bing leira. Na nawui akhavāwui shimwui maikashina! ¹⁹Nawui otpam eina ina nali kashamshokra, kala nawui pam eina nali khuiunghaora.

²⁰Chithanghon ina iwui rao Hilkiahwui naomayara Eliakim chili hokhuira, ²¹Ina ali nawui kachon ngavaimira kala nawui shānneira̱ ali sāshānmira, kala nawui sāshap pangshap chi awui pāngli horsangmira. Ana Jerusalemli khaleibing kala Judah shimkhurli avā akha sāra. ²²Ina David shimkhurwui sho chi awui yartuili sharhaira; ana shohaiakha khipānakha mashungmara, kala ana shunghaiakha khipānakha mashomara. ^c c v22 Revelation 3:7li Jishuna hi apong chi akhalattawui pongli matui—Eliakim hi Davidwui sho kasinga katang makhavai Anaomayarawui shingā kachithei akhana. ²³Ina ali pam marar akhali karhui thāda kāpsangra, kala ana awui avāva̱wui shimkhurwui vang khayākakā pamkhong akha sāra. ²⁴Athumna awui avāva̱wui shimkhurwui kharit saikora chi, naotun kala kashāng-kharei, koklui eina thuida ham saikora vāshungda ham kateteo kachiva̱ saikora, awuitungli hokthāngra. ²⁵Chithanghon, da saikorawui Avāna hānga, pam marar akhali kāpsangkahai karhui chi sātekmira; chi katattāmihaida kongluira, kala chiwuitungli hokthanghai otphun chi katatmihaora; kaja ithumwui Avāna hānghaira.