ኢሳይያስ 24

24 ¹እነሆ፣ አባታችን ምድርን ባድማ ያደርጋል፤ ባዶም ያስቀራታል፤ ፊቷንም ያጣምማል፤ ነዋሪዎቿንም ይበትናል። ²ለሕዝቡም ለካህኑም እኩል ይሆናል፤ ለአገልጋዩም ለጌታው፤ ለገረዲቱም ለእመቤቷ፤ ለገዢውም ለሻጩ፤ ለአበዳሪውም ለተበዳሪው፤ ለአራጣ አበዳሪውም ለባለዕዳው። ³ምድር ፈጽማ ባድማ ትደረጋለች፤ ፈጽማም ትዘረፋለች፤ አባታችን ይህን ቃል ተናግሯልና።

⁴ምድር ታዝናለች ትጠወልጋለችም፤ ዓለም ይደክማል ይጠወልጋልም፤ የምድር ከፍ ከፍ ያሉ ይደክማሉ። ⁵ምድር ከነዋሪዎቿ በታች ረክሳለች፤ ትምህርቱን አልታዘዙምና፤ ሥርዓቱን ጥሰዋል፤ የዘላለሙንም ኪዳን አፍርሰዋል። ⁶ስለዚህ እርግማን ምድርን ይበላል፤ በእርሷም የሚኖሩ በደላቸውን ይሸከማሉ፤ ስለዚህ የምድር ነዋሪዎች ይቃጠላሉ፤ ጥቂት ሰዎችም ይቀራሉ። ⁷አዲሱ የወይን ጠጅ ያዝናል፤ ወይኑ ይደክማል፤ ደስተኞች ሁሉ ያቃስታሉ። ⁸የከበሮዎች ደስታ ጸጥ ብሏል፤ የተድላ አድራጊዎች ጫጫታ ቀርቷል፤ የበገና ደስታ ጸጥ ብሏል። ⁹ከእንግዲህ ወይን ከዜማ ጋራ አይጠጡም፤ የሚያሰክር መጠጥ ለጠጪዎቹ ይመርራል። ¹⁰የሁከት ከተማ ተሰባብራለች፤ ወደ ውስጥ መግቢያ እንዳይኖር ቤት ሁሉ ተዘግቷል። ¹¹በጎዳናዎች ስለ ወይኑ ጩኸት አለ፤ ደስታ ሁሉ ጨልሟል፤ የምድር ሐሴት ተወግዷል። ¹²በከተማይቱ ባድማ ብቻ ቀርቷል፤ በሩ ተደምስሶ ፈርሷል። ¹³በምድር ሁሉ፣ በሕዝቦች መካከል እንዲህ ይሆናልና፤ ተመትቶ እንደሚራገፍ የወይራ ዛፍ፣ መከር ባለቀ ጊዜ ቀርተው እንደሚገኙ ወይኖች ይሆናል። ^a a v13 የወይራ ዛፎች ቅርንጫፎቻቸው በመመታት ይሰበሰቡ ነበር፤ ጥቂት የተበተኑ የወይራ ፍሬዎች ብቻ ይቀሩ ነበር፤ ይህም በሕይወት የተረፈውን ጥቂት ቅሬታ ያመለክታል።

¹⁴ድምፃቸውን ከፍ ያደርጋሉ፤ በደስታም ይዘምራሉ፤ ስለ አባታችን ግርማ ከምዕራብ ጮኸው ይጣራሉ። ¹⁵ስለዚህ በምሥራቅ ለአባታችን ክብርን ስጡ፤ በባሕር ዳርቻዎችም የእስራኤል አምላክ የሆነውን የአባታችንን ስም አክብሩ። ¹⁶ከምድር ዳርቻዎች ዝማሬን እንሰማለን፤ “ለጻድቁ ክብር ይሁን!” እኔ ግን እንዲህ አልሁ፤ “መነመንሁ፣ መነመንሁ፤ ወዮልኝ! ከዳተኞች ይከዳሉ፤ ከዳተኞች በክህደት ይከዳሉ።”

¹⁷በምድር የምትኖር ሆይ፣ ድንጋጤና ጕድጓድ ወጥመድም በአንተ ላይ ናቸው! ¹⁸ከድንጋጤው ድምፅ የተነሣ የሚሸሽ ሁሉ በጕድጓድ ውስጥ ይወድቃል፤ ከጕድጓዱም የሚወጣ ሁሉ በወጥመድ ይያዛል። የሰማይ መስኮቶች ተከፍተዋልና፤ የምድርም መሠረቶች ይናወጣሉ። ¹⁹ምድር ፈጽማ ተሰብራለች፤ ምድር ተቀዳዳለች፤ ምድር በኀይል ተናውጣለች። ²⁰ምድር እንደ ሰካራም ትንገዳገዳለች፤ እንደ ዳስም ትወዛወዛለች፤ ዐመፅዋ በላይዋ ከብዷል፤ ትወድቃለችም ዳግመኛም አትነሣም።

²¹በዚያ ቀን አባታችን በከፍታ ያለውን ሠራዊት በከፍታ፣ የምድርንም ነገሥታት በምድር ይቀጣል። ²²እንደ እስረኞች በጕድጓድ ውስጥ በአንድነት ይከማቻሉ፤ በወኅኒም ይታሰራሉ፤ ከብዙ ቀናት በኋላም ይቀጣሉ። ²³ያን ጊዜ ጨረቃ ታፍራለች፤ ፀሐይም ታፍራለች፤ የሰማይ ሠራዊት አባት በጽዮን ተራራና በኢየሩሳሌም ይነግሣልና፤ በሽማግሌዎቹም ፊት ክብሩ ያበራል።