An Hallaka Duniya

Ubanmu ya mai da duniya fayau; hukunci ya faɗa wa kowa daidai — firist da jama'a, mai ba da rance da mai karɓa — domin an karya madawwamin alkawari. Kiɗa ya tsaya, ƙofa ta zama baraguzai, duniya tana tangaɗi kamar mashayi. Waƙoƙi suna tasowa daga can iyaka, amma annabin ya ce yana lalacewa.

Babi na 24.

Ga shi, Ubanmu zai mayar da duniya kango yă bar ta babu kome; zai murɗe fuskarta yă kuma watsar da mazaunanta. Zai zama ɗaya ga talakawa da ga firist, ga bawa da ga maigidansa, ga baiwa da ga uwargijiyarta, ga mai saya da ga mai sayarwa, ga mai ba da rance da ga mai karɓar rance, ga mai bin bashi da ga mai bashi. Za a mayar da duniya kango ƙaƙaf a kuma washe ta sarai, gama Ubanmu ne ya faɗi wannan magana.

Duniya tana makoki ta kuma yanƙwane; duniya ta raunana ta yanƙwane; manyan mutanen duniya sun raunana. Duniya ta ƙazantu a ƙarƙashin mazaunanta, gama sun ƙi bin koyarwa, sun karya ƙa'ida, sun kuma warware madawwamin alkawari. Saboda haka la'ana ta cinye duniya, waɗanda suke zama a cikinta kuma suna ɗaukar laifinsu; saboda haka an ƙone mazaunan duniya ƙaf, mutane kaɗan kuma suka rage. Sabon ruwan inabi yana makoki, kuringar inabi ta raunana; dukan masu shagali suna nishi. Murnar ganguna ta tsaya, hayaniyar masu shagali ta ƙare, murnar molo ta tsaya. Ba sa ƙara shan ruwan inabi tare da waƙa; barasa ta zama da ɗaci ga masu shanta. An ragargaza birnin hargitsi; an rufe kowane gida, babu hanyar shiga. A tituna ana kuka saboda ruwan inabi; dukan farin ciki ya yi duhu, an kori murnar duniya. Kango kaɗai ya rage a birnin; an farfashe ƙofar gari rurrushe. Gama haka zai kasance a cikin duniya, a cikin al'ummai, kamar itacen zaitun da aka bunkuse, kamar inabin da ya rage bayan an gama girbi. ^a

Suna ɗaga muryoyinsu, suna rera waƙa don farin ciki; saboda ɗaukakar Ubanmu suna kururuwa daga yamma. Saboda haka a gabas ku ɗaukaka Ubanmu; a bakin teku, ku ɗaukaka sunan Ubanmu, Allah na Isra'ila. Daga iyakar duniya muna jin waƙoƙi, “Ɗaukaka ta tabbata ga Mai Adalci!” Amma na ce, “Na lalace, na lalace—kaito a gare ni! Masu ha'inci suna ha'inci; da ha'inci masu ha'inci suke ha'inci.”

Razana da rami da tarko suna kanku, ku mazaunan duniya! Duk wanda ya gudu sa'ad da ya ji karar razana zai fāɗa cikin rami, duk wanda kuma ya hau daga ramin zai kama a tarko. Gama an buɗe tagogin sama, tushen duniya kuma yana girgiza. An farfashe duniya ƙaƙaf, an tsage duniya, an jijjiga duniya ƙwarai. Duniya tana tangaɗi kamar bugagge, tana lilo kamar bukka; tawayenta ya yi mata nauyi, za ta fāɗi ba za ta ƙara tashi ba.

A ranar nan Ubanmu zai hukunta rundunar sararin sama a sama, da sarakunan duniya a duniya. Za a tattara su wuri ɗaya kamar 'yan kurkuku a cikin rami; za a kulle su a kurkuku, bayan kwanaki masu yawa kuma za a hukunta su. Sa'an nan wata zai ji kunya rana kuma ta sha kunya, gama Uba na rundunonin sama yana mulki a kan Dutsen Sihiyona da kuma a Urushalima, a gaban dattawansa kuma ɗaukakarsa tana haskakawa.