ዘፍጥረት 16

16 ¹የአብራም ሚስት ሦራ ልጅ አልወለደችለትም ነበር። አጋር የተባለች ግብፃዊት አገልጋይ ነበረቻት። ²ሦራም አብራምን እንዲህ አለችው፤ “እነሆ፣ አባታችን ከመውለድ ከልክሎኛል። ወደ አገልጋዬ ግባ፤ ምናልባት በእርስዋ በኩል ቤተ ሰብ እመሠርት ይሆናል።” አብራምም ሦራ እንዳለችው አደረገ። ^a a v2 በዚያ ባህል አገልጋይ ስለ ቤተ ሰቡ ልጅ መውለድ ትችል ነበር፤ ልጁም የቤተ ሰቡ ተደርጎ ይቈጠር ነበር። ³አብራም በከነዓን ምድር ዐሥር ዓመት ከኖረ በኋላ፣ ሚስቱ ሦራ ግብፃዊቷን አገልጋይዋን አጋርን ወስዳ ለባሏ ለአብራም ሚስት ትሆነው ዘንድ ሰጠችው። ⁴ከአጋርም ጋር ተኛ፤ እርስዋም ፀነሰች፤ እንደ ፀነሰችም ባየች ጊዜ እመቤቷን ናቀች። ⁵ሦራም አብራምን እንዲህ አለችው፤ “የደረሰብኝ በደል ባንተ ላይ ይሁን። አገልጋዬን በእቅፍህ ሰጠሁ፤ አሁንም እንደ ፀነሰች ባየች ጊዜ ናቀችኝ። አባታችን በእኔና በአንተ መካከል ይፍረድ።”

⁶አብራምም ሦራን እንዲህ አላት፤ “አገልጋይሽ በእጅሽ ናት፤ መልካም የመሰለሽን አድርጊባት።” ሦራም አስጨነቀቻት፤ እርስዋም ከፊቷ ሸሸች።

⁷የአባታችን መልአክ አጋርን በምድረ በዳ ባለ የውሃ ምንጭ አጠገብ አገኛት፤ ይህም ወደ ሱር በሚወስደው መንገድ ላይ ያለ ምንጭ ነበር። ^b b v7 የአባታችን መልአክ እንደ አባታችን ራሱ ሆኖ ይናገራል፤ ለአጋርም ልትገናኘው፣ ልትሰማውና ልትመልስለት በምትችልበት መልክ ተገለጠላት።

⁸“የሦራ አገልጋይ አጋር ሆይ፣ ከወዴት መጣሽ? ወዴትስ ትሄጃለሽ?” አላት። እርስዋም፣ “ከእመቤቴ ከሦራ እሸሻለሁ” ስትል መለሰች።

⁹የአባታችን መልአክም፣ “ወደ እመቤትሽ ተመለሽ፤ ለሥልጣኗም ተገዢ” አላት። ¹⁰የአባታችን መልአክም፣ “ዘርሽን ሊቈጠር እስከማይችል ድረስ እጅግ አበዛዋለሁ” አላት። ¹¹የአባታችን መልአክም ደግሞ እንዲህ አላት፤ “እነሆ፣ አሁን ፀንሰሻል፤ ወንድ ልጅም ትወልጃለሽ። ስሙንም እስማኤል ትዪዋለሽ፤ መከራሽን ሰምቻለሁና። ¹²እርሱ እንደ ዱር አህያ የሆነ ሰው ይሆናል፤ እጁ በሁሉ ላይ፣ የሁሉም እጅ በእርሱ ላይ ይሆናል፤ ከወንድሞቹም ሁሉ ጋር በጥል ይኖራል።”

¹³እርስዋም ያነጋገራትን አባታችንን፣ “አንተ ኤልሮኢ ነህ፤ የሚያየኝ አምላኬ ነህ” ብላ ጠራችው፤ “የሚያየኝን እርሱን አሁን አየሁ” ብላለችና። ¹⁴ስለዚህ ጕድጓዱ ብኤርላሃይሮኢ ተብሎ ተጠራ፤ እርሱም በቃዴስና በባሬድ መካከል ይገኛል።

¹⁵አጋርም ለአብራም ወንድ ልጅ ወለደችለት፤ አብራምም የወለደችለትን ልጅ ስም እስማኤል ብሎ ጠራው። ¹⁶አጋር እስማኤልን በወለደችለት ጊዜ አብራም የሰማንያ ስድስት ዓመት ሰው ነበር።