ዘፍጥረት 15

15 ¹ከዚህ ነገር በኋላ የአባታችን ቃል በራእይ ወደ አብራም እንዲህ ሲል መጣ፤ “አትፍራ፣ አብራም፤ ጋሻህ እኔ ነኝ፤ እጅግ ታላቅ ዋጋህም ነኝ።”

²አብራም ግን፣ “ጌታዬ አባት ሆይ፤ ልጅ የሌለኝ ስለ ሆንሁ፣ ወራሼም የደማስቆው ኤሊዔዘር ስለ ሆነ፣ ምን ትሰጠኛለህ?” አለ። ³አብራምም፣ “ዘር አልሰጠኸኝም፤ በቤቴ የተወለደ አገልጋይ ይወርሰኛል።” አለ።

⁴የአባታችንም ቃል እንዲህ ሲል ወደ እርሱ መጣ፤ “ይህ ሰው ወራሽህ አይሆንም፤ ከገዛ አካልህ የሚወጣ ልጅ ወራሽህ ይሆናል።” ⁵ወደ ውጭም አውጥቶ፣ “ወደ ሰማይ ተመልከት፤ ከተቻለህ ከዋክብትን ቍጠር።” አለው፤ ቀጥሎም፣ “ዘርህ እንዲሁ ይሆናል።” አለው።

⁶አብራምም በአባታችን አመነ፤ አባታችንም ይህን እንደ ጽድቅ ቈጠረለት።

⁷እርሱም፣ “ይህችን ምድር ትወርሳት ዘንድ ልሰጥህ ከከለዳውያን ዑር ያወጣሁህ አባትህ እኔ ነኝ።” አለው።

⁸አብራም ግን፣ “ጌታዬ አባት ሆይ፤ እንደምወርሳት በምን አውቃለሁ?” አለ።

⁹እርሱም፣ “ባለ ሦስት ዓመት ጊደር፣ ፍየልና አውራ በግ፣ ዋኖስና የርግብ ጫጩት አምጣልኝ።” አለው።

¹⁰አብራምም ይህን ሁሉ አምጥቶ ለሁለት ከፈላቸው፤ እያንዳንዱንም ክፋይ ከሌላው አንጻር አደረገ፤ ወፎቹን ግን አልከፈለም። ^a a v10 ኪዳንን ለማጽናት በነበረው ጥንታዊ ልማድ መሠረት፣ ተዋዋዮቹ እንስሳትን ለሁለት ከፍለው በክፋዮቹ መካከል ያልፉ ነበር፤ ቃላቸውን ለመጠበቅም ነፍሳቸውን ዋስ አድርገው ይሰጡ ነበር። ¹¹አሞራዎችም በሬሳዎቹ ላይ በወረዱ ጊዜ፣ አብራም አባረራቸው። ¹²ፀሐይ ስትጠልቅ፣ በአብራም ላይ ከባድ እንቅልፍ ወደቀ፤ ታላቅ ድንጋጤና ጨለማም ወረደበት።

¹³አባታችንም አብራምን እንዲህ አለው፤ “ዘርህ የእነርሱ ባልሆነች ምድር እንግዳ ሆኖ እንደሚኖር፣ ባሪያም ሆኖ አራት መቶ ዓመት እንደሚጨቈን በርግጥ ዕወቅ። ¹⁴የሚገዙለትንም ሕዝብ ደግሞ እፈርድበታለሁ፤ ከዚያም በኋላ በታላቅ ሀብት ይወጣሉ። ¹⁵አንተ ግን በሰላም ወደ አባቶችህ ትሄዳለህ፤ መልካም ሽምግልና ሽምግለህም ትቀበራለህ። ¹⁶የአሞራውያን ኀጢአት ገና ስላልተሞላ፣ በአራተኛው ትውልድ ወደዚህ ይመለሳሉ።”

¹⁷ፀሐይ ከጠለቀች በኋላ፣ በጨለማ ውስጥ የሚጤስ እቶንና የሚነድ ችቦ ተገልጠው በተከፈሉት ቍራጮች መካከል አለፉ። ^b b v17 በጥንታዊ የኪዳን ሥርዐቶች ሁለቱም ወገኖች ለሁለት በተከፈሉት የእንስሳት ቍራጮች መካከል ያልፉ ነበር፤ ይህም፣ “ቃሌን ባፈርስ እንደ እነዚህ ለሁለት ልከፈል” ማለት የሆነ መሐላ ነበር። እዚህ ግን አባታችን ብቻውን እንደ ነዳድ ብርሃን በመካከል ያልፋል፤ የኪዳኑንም ሙሉ ክብደት በራሱ ላይ ይወስዳል።

¹⁸በዚያ ቀን አባታችን ከአብራም ጋር ኪዳን አደረገ፤ “ከግብፅ ወንዝ ጀምሮ እስከ ታላቁ ወንዝ እስከ ኤፍራጥስ ድረስ ያለችውን ይህችን ምድር ለዘርህ እሰጣለሁ፤ ¹⁹የቄናውያንን፣ የቀናዛውያንን፣ የቀድሞናውያንን ምድር፣ ²⁰የኬጢያውያንን፣ የፌርዛውያንን፣ የራፋይምን፣ ²¹የአሞራውያንን፣ የከነዓናውያንን፣ የጌርጌሳውያንንና የኢያቡሳውያንን።”