Haokaphok 15

15 ¹Ot hibingwui thili, ithumwui Avāwui tui china khamahāli Abramli rāhānga: "Abram, mangacheealu. I nawui chāngveina, nawui khamataia sāmanna."

²Kha Abramna hānga, "Amei ngarā Avā, ina nao maleila, kala iwui shimlui khuipa chiya Damascuswui Eliezer sāhaoda, nana ili khi mira?" ³Abramna hānga, "Nana ili ara̱-azā mimana; iwui shimli pharāhai rao akhana iwui shimlui khuira."

⁴Ithumwui Avāwui tui china ali rāhānga: "Mipa hiya nawui shimlui khuipa maningmara; na khalattawui phasāwui eina kharā naomayara akhana nawui shimlui khuira." ⁵Ana ali kayāngli khuirāda hānga, "Kazingramli yangda, nana shānkhuishapakha sirā mashing shānkhuilu." Chieina ana hānga, "Nawui ara̱-azā chithāda ngasāra."

⁶Abramna ithumwui Avāli shitsanga, kala ithumwui Avāna ali khamashung khangarongana da shānkhui.

⁷Ana ali hānga, "I nawui Avāna, ngalei hi nali shimlui sākhavai Chaldeawui Ur eina nali thānshok kahaina."

⁸Kha Abramna hānga, "Amei ngarā Avā, ina chili shimlui khuira kaji ina kathada theirakhala?"

⁹Ana ali hānga, "Iwui vang zingkum kathum kā kahai seilānao akha, mevā akha, yaova akha, nāsha̱ akha, kala khana̱nao akha khuilu."

¹⁰Abramna hibing saikora ali khuirāda, angachaili kaikhanini sālaga, tangkhai kachichā chi khangatei tangkhai kāroda haimi; kha vānaobing chi masātekmana. ^a a v10 Achālakhawui kadhara sākahai apongli, ngasokazatabing china sāyurbing chi angachaili sathatta atangkhai ngachaili ngara̱thui, khalattawui tui singtit khavai khalattawui kharing chi tharchigatna. ¹¹Sā kashaiya vānaobing china kathingunbing chiwuitungli tātung tharan, Abramna athumli kashamshoka. ¹²Zimik tunkashung tharan, Abramli piphup tāshungda, kala khangachee khamathā kala tangkhamang awuitungli tāshunga.

¹³Chieina ithumwui Avāna Abramli hānga, "Kachangkhatta theilu: Nawui ara̱-azāna athumwui maningla ngaleili yur kateibing sāda pānra; athumli rao sāda zingkum shāmati rekhareklak eina sāra. ¹⁴Athumna otram ngatha̱ yur chi ina bichar sāra, kala naoda athum lan makhavāt eina shokra. ¹⁵Na chingri kahai eina navā ngarāli vaira, kasāng kaphā rāda chifara. ¹⁶Khamate thotli athum hili latluishitra, kaja Amorbingwui khayonkhamāng makuprangmana."

¹⁷Zimik tunkahaiwui thili, tangkhamang shongli, meikhut kashok meiphu akha kala meilā kashār akha shokta, sāthat kahaibing ngachaili ngara̱thuihaowa. ^b b v17 Achālakhawui kadhara sākahai atamli, khanini eina sāyur sathat kahai atangkhai ngachaili ngara̱sera — hi ngashit tui china hithāda kapihaina: "Ina iwui tui khānakha, hibing tākam eina ili sathatpaira." Hili ithumwui Avā akhalattana kahor kashar thāda ngara̱thui, kadharawui otphun saikora chi akhalattali phunkhuina.

¹⁸Chithang ithumwui Avāna Abramli tuingashit sāda hānga, "Nawui ara̱-azāli ngalei hi ina mira, Egyptwui kong eina thuilaga kahaka kong Euphrates tāshungda, ¹⁹Kennaobing, Keniznaobing, Kadmonnaobing, ²⁰Hitnaobing, Periznaobing, Rephaimbing, ²¹Amornaobing, Canaannaobing, Girgashnaobing, kala Jebusnaobingwui ngalei china."