Anee Long'eng'ung'
Ki wol Abram arorutyet eng' imandanyi: chilili ineendet. Ki imut Kwandanyo ineendet saang' koit kokeenik, ak koiyan Abram. Yeityo kobut ng'wanindo ne oo, ak kogimit arorutyet—kenyiisyek pogol ang'wan che koek otwogik kotomo konam emet ne nywa.
Ng'alaali Kwandanyo eng' mustarisyek 1, 4–5, 7, 9, 13–16, 18–21
15 1Eng' let tuguuchu, ko nyo ng'olyoondetap Kwandanyo ole mi Abram eng' ng'ang'utyet, kole, “Amearageni, Abram. Anee long'eng'ung', melektang'ung' ne oo miising'.”
2Ago kole Abram, “Kwanda Kiptaiyandennyu, nee ne iikoonwa, amu chilili anee, ak ne namei tuguuguk ko Elieser ne po Damasko?” 3Kole Abram, “Ma ikoonwa iyoot; otwogindet ne ki kisich eng' kaanyo konamei tuguuguk.”
4Ki nyo ng'olyoondetap Kwandanyo ole mi ineendet, kole, “Ma namei tuguuguk chiito ni; ago weeriit ne mong'u poriondeng'ung' ko ne namei tuguuguk.” 5Ki imut ineendet saang' ak kole, “Ng'et parak kipsengwet ak iit kecheik, ngot imuuchi iit.” Yeityo kole, “Uu nooto ne koek iyoteng'ung'.”
6Ki iyan Abram Kwandanyo, ak ki iit Kwandanyo nooto koek imandanyi.
7Ki leenji ineendet, “Anee Kwandang'ung', ne ki imong'un eng' Ur emetap Kaldeik, si akoonin emoni, si inam.”
8Ago kole Abram, “Kwanda Kiptaiyandennyu, anai ano ale aname emoni?”
9Ki leenji ineendet, “Nam rooryat, ak ne, ak morket, che po kenyiisyek somok, ak cheptuget, ak aarwetap toriit.”
10Ki imut Abram tuguuchu tugul ole mi ineendet, ak ko til icheek kwenut aeng' aeng', ak kondoi kebeberta age kotoorchin kebeberta age; ago ma til toriitik. a a v10 Eng' oret ne po keny ne kigeyomchinei arorutyet, ki til piik che arorootegei tyong'ik kwenut ak kolandai kwenut kebeberwekwak, kogiirchin saboonwekwak si korib ng'aleekwak. 11Ye kingo putyi toriitik che po logeet poorwek, ko oon Abram icheek. 12Ye kirorokta asiista, ko put Abram rwondo ne oo, ak ko put parak eng' ineendet kamuiset ne oo ak mesundeito.
13Yeityo koleenji Kwandanyo Abram, kole, “Inai komyee: komeny iyoteng'ung' ko uu toek eng' emet ne ma nenywa, kigiratotiin ak kinyaliilin kenyiisyek pogol ang'wan. 14Ak arwookyini pororyet ne boisyeen icheek, ak eng' let komong'u kobooto mogornateet ne oo. 15Ibei ole mi kwanisyeguk eng' kaalyeet, kitupchin eng' osindaneng'ung' ne karaaran. 16Eng' ibinda ne po ang'wan koweek yu, amu tomo kogeskei ng'wanindap Amorik.”
17Ye kagororokta asiista, eng' mesundeito, ko mong'ji tereetap maat ne iyeni ak kegengetap maat ne lalei, ak kolandae kwenutap kebeberwechooto. b b v17 Eng' sakutik che po arorutyet che po keny, ki landai piik aeng' tugul kwenutap kebeberwekap tyong'ik che ki kiternat — kaarutyet ne manjinei kole, “Ingaternatan ko uu tuguuchu ngo awecho kayomisennyu.” Yu ko landa Kwandanyo kityo ineegei ko uu lapkeiyet ne lalei, konamei koiyet komugul ne po arorutyet eng' ineegei.
18Ki yai Kwandanyo arorutyet ak Abram eng' peetuunooto, koleenji, “Akoonji emoni iyoteng'ung', kong'etee aineet ne po Misiri agoi koit aineet ne Yufrets ne oo, 19emetap Kenik, Kenisik, ak Kadmonik, 20ak Hitik, Perisik, ak Repaik, 21ak Amorik, Kanaanik, Girgasik, ak Jebusik.”