ዘፍጥረት 14

14 ¹በሰናዖር ንጉሥ በአምራፌል፣ በኤላሳር ንጉሥ በአርዮክ፣ በዔላም ንጉሥ በኮዶርላኦሜር፣ በጎይም ንጉሥ በቲዳል ዘመን፣ ²እነዚህ ነገሥታት በሰዶም ንጉሥ በቤራ፣ በገሞራ ንጉሥ በቢርሳ፣ በአዳማ ንጉሥ በሲናብ፣ በሰቦይም ንጉሥ በሰሜበር፣ እንዲሁም በቤላ (ማለትም በዞዓር) ንጉሥ ላይ ጦርነት አደረጉ። ³እነዚህ ሁሉ በሲዲም ሸለቆ (ማለትም በሙት ባሕር) ተሰባሰቡ። ^a a v3 በዕብራይስጥ፦ የጨው ባሕር። ⁴ዐሥራ ሁለት ዓመት ኮዶርላኦሜርን አገልግለው ነበር፤ በዐሥራ ሦስተኛው ዓመት ግን ዐመፁ። ⁵በዐሥራ አራተኛው ዓመት ኮዶርላኦሜርና ከእርሱ ጋር የነበሩት ነገሥታት መጥተው በአስታሮት ቀርናይም ራፋይምን፣ በሐም ዙዝምን፣ በሳዌ ቂርያታይም ኤሚምን አሸነፉ፤ ⁶በሴይር ተራራማ አገራቸውም ኮሬዎችን እስከ ምድረ በዳው ዳር እስካለው እስከ ኤልፋራን ድረስ መቱ። ⁷ተመልሰውም ወደ ዔንሚስጳጥ (ማለትም ቃዴስ) መጥተው የአማሌቃውያንን አገር ሁሉ፣ እንዲሁም በሐጻጾን ታማር የሚኖሩትን አሞራውያን መቱ። ⁸የሰዶም ንጉሥ፣ የገሞራ ንጉሥ፣ የአዳማ ንጉሥ፣ የሰቦይም ንጉሥ፣ እንዲሁም የቤላ (ማለትም የዞዓር) ንጉሥ ወጥተው በሲዲም ሸለቆ ለጦርነት ተሰለፉባቸው፤ ⁹በዔላም ንጉሥ በኮዶርላኦሜር፣ በጎይም ንጉሥ በቲዳል፣ በሰናዖር ንጉሥ በአምራፌል፣ በኤላሳር ንጉሥ በአርዮክ ላይ ተሰለፉ፤ አራት ነገሥታት በአምስት ላይ።

¹⁰የሲዲም ሸለቆ የቅጥራን ጕድጓዶች የሞሉበት ነበር። የሰዶምና የገሞራ ነገሥታት ሸሹ፤ ከእነርሱም አንዳንዶቹ በዚያ ወደቁ፤ የቀሩትም ወደ ተራሮች ሸሹ። ¹¹አራቱ ነገሥታትም የሰዶምንና የገሞራን ንብረት ሁሉ፣ ምግባቸውንም ሁሉ ወስደው ሄዱ። ¹²የአብራምን የወንድሙን ልጅ ሎጥንና ንብረቱን ደግሞ ወስደው ሄዱ፤ ሎጥ በሰዶም ይኖር ነበርና።

¹³ያመለጠም አንድ ሰው ይህን ለዕብራዊው ለአብራም ነገረው፤ እርሱም በአሞራዊው በመምሬ የአድባር ዛፎች አጠገብ ይኖር ነበር፤ መምሬም የኤስኮልና የአኔር ወንድም ነበር፤ እነርሱም የአብራም ወዳጆች ነበሩ። ¹⁴አብራምም ዘመዱ መማረኩን በሰማ ጊዜ፣ በቤቱ የተወለዱትን የሠለጠኑትን ሦስት መቶ ዐሥራ ስምንት ሰዎች አስከትቶ እስከ ዳን ድረስ አሳደዳቸው። ¹⁵በዚያ ሌሊትም እርሱና ባሪያዎቹ ተከፋፍለው አጠቋቸው፤ ከደማስቆ በስተ ሰሜን እስካለችው እስከ ሖባ ድረስም አሳደዷቸው። ¹⁶ንብረቱንም ሁሉ መለሰ፤ ዘመዱን ሎጥንና ንብረቱንም፣ ሴቶቹንና ሕዝቡንም መልሶ አመጣ።

ከጦርነቱ ወደ ቤት መመለስ

¹⁷አብራም ኮዶርላኦሜርንና ከእርሱ ጋር የነበሩትን ነገሥታት አሸንፎ ከተመለሰ በኋላ፣ የሰዶም ንጉሥ በሳዌ ሸለቆ (በንጉሥ ሸለቆ) ሊቀበለው መጣ። ¹⁸የሳሌም ንጉሥ መልከ ጼዴቅ እንጀራና የወይን ጠጅ አወጣ፤ እርሱም የኤል ዔሊዮን፣ የልዑል አባታችን ካህን ነበር። ^b b v18 የልዑል እግዚአብሔር ካህን የሆነው መልከ ጼዴቅ ኢየሱስን ያመለክታል፤ ዕብራውያን 7 እርሱን ኢየሱስ ሥርዓቱን የሚፈጽምለት የዘላለም ካህንና ንጉሥ አድርጎ ይጠራዋል። ¹⁹አብራምን ባረከው እንዲህም አለ፤ “አብራም በኤል ዔሊዮን፣ በልዑል አባታችን፣ ሰማይና ምድርን በፈጠረው ይባረክ። ²⁰ኤል ዔሊዮንም፣ ልዑል አባታችንም ይባረክ፤ እርሱ ጠላቶችህን በእጅህ አሳልፎ ሰጥቷልና።” ከዚያም አብራም ከሁሉ ዐሥራት ሰጠው።

²¹የሰዶም ንጉሥ አብራምን፣ “ሰዎቹን ስጠኝ፤ ንብረቱን ግን ለራስህ ውሰድ” አለው።

²²አብራም ግን የሰዶምን ንጉሥ እንዲህ አለው፤ “ወደ አባታችን፣ ወደ ኤል ዔሊዮን፣ ወደ ልዑል፣ ሰማይና ምድርን ወደ ፈጠረው፣ እጄን በመሐላ አንስቻለሁ፤ ²³ከአንተ የሆነውን ምንም ነገር፣ ክር ቢሆን የጫማ ማሰሪያም ቢሆን እንደማልወስድ ማልሁ፤ ይህም ‘አብራምን እኔ ባለጠጋ አደረግሁት’ ብለህ ከቶ እንዳትል ነው። ²⁴ለእኔ ምንም የለም፤ ጕልማሶቹ የበሉትን ብቻ፣ ከእኔም ጋር ለሄዱት ለአኔር፣ ለኤስኮልና ለመምሬ የሚገባቸውን ድርሻ ይቅር፤ እነርሱ የራሳቸውን ይውሰዱ።”