ዘፍጥረት 13

13 ¹አብራም ከግብፅ ወደ ኔጌብ ወጣ፤ እርሱ፣ ሚስቱ፣ ያለው ሁሉ፣ ሎጥም ከእርሱ ጋራ። ²አብራም በከብት፣ በብርና በወርቅ እጅግ ባለጠጋ ሆኖ ነበር። ³ከኔጌብ ተነሥቶ ደረጃ በደረጃ ወደ ቤቴል፣ ድንኳኑ ቀድሞ ወደ ነበረበት ቦታ፣ በቤቴልና በጋይ መካከል ወዳለው ቦታ ሄደ፤ ⁴ቀድሞም መሠዊያ ወደ ሠራበት ቦታ ሄደ፤ በዚያም አብራም የአባታችንን ስም ጠራ። ⁵ከአብራም ጋራ ይጓዝ የነበረው ሎጥም በጎችና ከብቶች፣ ድንኳኖችም ነበሩት። ⁶አብረው ሊኖሩ ምድሪቱ አልቻለቻቸውም፤ ንብረታቸው እጅግ ብዙ ስለ ነበር አብረው መቀመጥ አልተቻላቸውም። ⁷በአብራም እረኞችና በሎጥ እረኞች መካከል ጠብ ተነሣ። በዚያን ጊዜም ከነዓናውያንና ፈሪዛውያን በምድሪቱ ይኖሩ ነበር። ⁸አብራም ሎጥን እንዲህ አለው፤ “በእኔና በአንተ መካከል፣ ወይም በእረኞችህና በእረኞቼ መካከል ጠብ አይኑር፤ እኛ ወንድማማች ነንና። ⁹ምድሪቱ ሁሉ በፊትህ አይደለችምን? እባክህ፣ ከእኔ ተለይ፤ አንተ ወደ ግራ ብትሄድ፣ እኔ ወደ ቀኝ እሄዳለሁ፤ አንተ ወደ ቀኝ ብትሄድ፣ እኔ ወደ ግራ እሄዳለሁ።”

¹⁰ሎጥ ዐይኑን አንሥቶ ተመለከተ፤ የዮርዳኖስ ሜዳ ሁሉ እስከ ጾዓር ድረስ፣ እንደ አባታችን አትክልት፣ እንደ ግብፅ ምድር በሁሉም ስፍራ በውሃ የታጠበ መሆኑን አየ። (ይህም አባታችን ሰዶምንና ገሞራን ከማጥፋቱ በፊት ነበር።) ¹¹ሎጥ የዮርዳኖስን ሜዳ ሁሉ ለራሱ መረጠ፤ ወደ ምሥራቅም ተጓዘ፤ ሁለቱም እርስ በርስ ተለያዩ። ¹²አብራም በከነዓን ምድር ተቀመጠ፤ ሎጥ ግን በሜዳው ከተሞች መካከል ኖረ፤ ድንኳኖቹንም እስከ ሰዶም ድረስ ተከለ። ¹³የሰዶም ሰዎች ግን ክፉዎች ነበሩ፤ በአባታችንም ላይ እጅግ ኀጢአት ይሠሩ ነበር።

¹⁴ሎጥ ከእርሱ ከተለየ በኋላ፣ አባታችን አብራምን እንዲህ አለው፤ “ካለህበት ቦታ ዐይንህን አንሥተህ ወደ ሰሜንና ወደ ደቡብ፣ ወደ ምሥራቅና ወደ ምዕራብ ተመልከት። ¹⁵የምታየውን ምድር ሁሉ ለአንተና ለልጆችህ ለዘላለም እሰጣለሁና። ¹⁶ልጆችህን እንደ ምድር ትቢያ አደርጋለሁ፤ ማንም የምድርን ትቢያ መቍጠር ቢችል፣ ልጆችህም ይቈጠራሉ። ¹⁷ተነሥተህ በምድሪቱ ርዝመትና ስፋት ተመላለስ፤ ለአንተ እሰጣታለሁና።”

¹⁸አብራም ድንኳኖቹን ነቅሎ ሄደ፤ በኬብሮን ባለው በመምሬ አድባር ዛፎች አጠገብ ተቀመጠ፤ በዚያም ለአባታችን መሠዊያ ሠራ።