ዘፍጥረት 13 FHB Father's Heart Bible™

13 ¹ኣብራም ድማ ካብ ግብፂ ናብ ምድሪ ነጌብ ደየበ፤ ንሱን ሰበይቱን ዘለዎ ዅሉን፥ ሎጥውን ምስኡ። ²ኣብራም ድማ ብጥሪትን ብብሩርን ብወርቅን የመና ሃብተመ። ³ካብ ነጌብ ተልዒሉ ድማ በብጕዕዞኡ ናብ ቤቴል ከደ፥ ናብቲ ኣቐዲሙ ድንኳኑ ኣብ መንጎ ቤቴልን ጋይን ተኺሉ ዝነበረ ቦታ፥ ⁴ናብቲ ኣቐዲሙ መሰውኢ ዝሰርሐሉ ቦታ ድማ ከደ። ኣብኡ ኸዓ ኣብራም ስም ኣቦና ፀውዐ። ⁵እቲ ምስ ኣብራም ዝጓዓዝ ዝነበረ ሎጥ ድማ፥ ንሱውን ኣባጊዕን ከፍትን ድንኳናትን ነበሮ። ⁶እታ ምድሪ ድማ ብሓደ ኾይኖም ኽትሕዞም ኣይከኣለትን፤ ጥሪቶም ብዙሕ ስለ ዝነበረ ኸዓ ብሓደ ኽቕመጡ ኣይከኣሉን። ⁷ኣብ መንጎ ጓሶት ኣብራምን ጓሶት ሎጥን ድማ ባእሲ ተልዓለ። ከነዓናውያንን ፌርዛውያንን ከዓ በቲ ጊዜ እቲ ኣብታ ምድሪ ይነብሩ ነበሩ። ⁸ኣብራም ድማ ንሎጥ ከምዙይ በሎ፦ “ኣነን ንስኻን፥ ጓሶተይን ጓሶትካን ኣሕዋት ኢና እሞ፥ ኣይንባኣስ። ⁹እታ ዅላ ምድሪ ኣብ ቅድሜኻዶ ኣይኮነትን? በጃኻ ኻባይ ተፈለ፤ ንፀጋም እንተ ኸድካ ኣነ ናብ የማን ክኸይድ እየ፤ ንየማን እንተ ኸድካ ድማ ኣነ ናብ ፀጋም ክኸይድ እየ።”

¹⁰ሎጥ ድማ ኣዒንቱ ቋሕ ኣቢሉ፥ እታ ዅላ ጐልጐል ዮርዳኖስ ክሳዕ ዞዓር፥ ከም ገነት ኣቦና፥ ከም ምድሪ ግብፂ፥ ብዅሉ ወገን ማይ ዝረወየት ከም ዝነበረት ረአየ። እዙይ ከዓ ኣቦና ንሰዶምን ገሞራን ከየጥፍአ ቕድሚኡ ዝነበረ እዩ። ¹¹ሎጥ ድማ እታ ዅላ ጐልጐል ዮርዳኖስ ንባዕሉ ሓረየ፤ ንምብራቕ ኣቢሉ ኸዓ ተጕዓዘ፤ ክልቲኦም ድማ ንሓድሕዶም ተፈላለዩ። ¹²ኣብራም ኣብ ምድሪ ከነዓን ተቐመጠ፤ ሎጥ ከዓ ኣብ ማእኸል ከተማታት እታ ጐልጐል ተቐመጠ፤ ድንኳናት ድማ ክሳዕ ሰዶም ተኸለ። ¹³ሰብ ሰዶም ድማ እኩያት ነበሩ፤ ኣብ ቅድሚ ኣቦና ኸዓ የመና ሓጢኣት ይገብሩ ነበሩ።

¹⁴ሎጥ ካብኡ ምስ ተፈለየ ድማ፥ ኣቦና ንኣብራም ከምዙይ በሎ፦ “ካብቲ ዘለኻዮ ቦታ ኣዒንትኻ ቋሕ ኣቢልካ፥ ንሰሜንን ንደቡብን ንምብራቕን ንምዕራብን ጠምት። ¹⁵እዛ ትርእያ ዘለኻ ኵላ ምድሪ ንዘለኣለም ንኣኻን ንደቅኻን ክህበኩም እየ እሞ። ¹⁶ንዘርእኻ ድማ ከም ሓመድ ምድሪ ክገብሮ እየ፤ ሓመድ ምድሪ ክቝፀር ዝኽእል እንተ ኾይኑ፥ ዘርእኻውን ክቝፀር እዩ። ¹⁷ተስእ፤ ነታ ምድሪ ብንውሓታን ብገፊሓን ኪዳ፤ ንኣኻ ክህበካ እየ እሞ።”

¹⁸ኣብራም ድማ ድንኳናት ኣልዒሉ፥ ከይዱ ኣብ ዓበይቲ ኣእዋም መምሬ፥ ኣብ ኬብሮን ተቐመጠ፤ ኣብኡ ኸዓ ንኣቦና መሰውኢ ሰርሐ።