ዘፍጥረት 14 FHB Father's Heart Bible™

14 ¹ብዘመን ኣምራፌል ንጉስ ሰናዖር፥ ኣርዮክ ንጉስ ኤላሳር፥ ከዶርላዖሜር ንጉስ ዔላም፥ ቲዳል ንጉስ ኣህዛብ፥ ²እዞም ነገስታት እዚኣቶም ምስ ቤራ ንጉስ ሰዶም፥ ብርሻ ንጉስ ገሞራ፥ ሺንኣብ ንጉስ ኣዳማ፥ ሸሜቤር ንጉስ ሰቦይም፥ ንጉስ ቤላ ከዓ፥ ንሳ ዞዓር እያ፥ ተዋግኡ። ³ኵሎም እዚኣቶም ኣብ ለሰ ሲዲም፥ ንሳ ባሕሪ ሞት እያ፥ ብሓደ ተኣከቡ። ^a a v3 እብራይስጢ፦ ባሕሪ ጨው። ⁴ዓሰርተ ኽልተ ዓመት ንከዶርላዖሜር ተገዝኡ፤ ኣብ መበል ዓሰርተ ሰለስተ ዓመት ግና ዓመፁ። ⁵ኣብ መበል ዓሰርተ ኣርባዕተ ዓመት ከዓ ከዶርላዖሜርን እቶም ምስኡ ዝነበሩ ነገስታትን መፂኦም ነቶም ኣብ ኣሽተሮት ቃርናይም ዝነበሩ ራፋውያን፥ ነቶም ኣብ ሃም ዝነበሩ ዙዚም፥ ነቶም ኣብ ሻዌ ቂርያታይም ዝነበሩ ኤሚም ሰዓርዎም፥ ⁶ነቶም ኣብ እምባኦም ሴይር ዝነበሩ ሖራውያንውን ክሳዕ እታ ኣብ ወሰን ምድረ በዳ ዘላ ኤልፋራን ሰዓርዎም። ⁷ተመሊሶም ድማ ናብ ዔንሚሽጳጥ፥ ንሳ ቃዴስ እያ፥ ከዱ፤ ንዅሉ ግዝኣት ኣማሌቃውያን፥ ከምኡውን ነቶም ኣብ ሓፃፆን ታማር ዝነብሩ ኣሞራውያን ወቕዕዎም። ⁸ንጉስ ሰዶም፥ ንጉስ ገሞራ፥ ንጉስ ኣዳማ፥ ንጉስ ሰቦይም፥ ንጉስ ቤላ ከዓ፥ ንሳ ዞዓር እያ፥ ወፂኦም ኣብ ለሰ ሲዲም ኣብ መንፅሮም ንውግእ ተሰለፉ፥ ⁹ምስ ከዶርላዖሜር ንጉስ ዔላም፥ ቲዳል ንጉስ ኣህዛብ፥ ኣምራፌል ንጉስ ሰናዖር፥ ኣርዮክ ንጉስ ኤላሳር፤ ኣርባዕተ ነገስታት ምስ ሓሙሽተ።

¹⁰ለሰ ሲዲም ከዓ ጐዳጕዲ ቕጥራን መሊኡ ነበረ። ነገስታት ሰዶምን ገሞራን ሃደሙ፤ ገሊኣቶም ከዓ ኣብኡ ወደቑ፤ እቶም ዝተረፉ ድማ ናብ እምባታት ሃደሙ። ¹¹እቶም ኣርባዕተ ነገስታት ኵሉ ኣቑሑ ሰዶምን ገሞራን ኵሉ ምግቦምን ወሲዶም ከዱ። ¹²ንሎጥ ወዲ ሓው ኣብራም ምስ ንብረቱ ወሲዶም ከዱ፤ ሎጥ ኣብ ሰዶም ይቕመጥ ነበረ እሞ።

¹³ሓደ ዘምለጠ ሰብ ድማ ነዝ ነገር እዙይ ንኣብራም ዕብራዊ ነገሮ። ኣብራም ከዓ ኣብ ዓበይቲ ኣእዋም መምሬ ኣሞራዊ፥ ሓው ኤሽኮልን ዓኔርን ዝኾነ፥ ይቕመጥ ነበረ፤ ንሳቶም ድማ ተሓባበርቲ ኣብራም ነበሩ። ¹⁴ኣብራም ዘመዱ ኸም ዝተማረኸ ምስ ሰምዐ፥ ነቶም ኣብ ቤቱ ዝተወለዱ ሰለስተ ሚእቲ ዓሰርተ ሸሞንተ ዝተዓለሙ ሰባት ኣውፂኡ ክሳዕ ዳን ሰዓቦም። ¹⁵በታ ለይቲ እቲኣ ኸዓ ንሱ ምስ ባሮቱ ተመቓቒሎም ወቕዕዎም፤ ክሳዕ እታ ብሰሜን ደማስቆ ዘላ ሆባ ድማ ሰዓብዎም። ¹⁶ኵሉ ኣቑሑ ኸዓ ኣምለሰ፤ ንዘመዱ ንሎጥ ምስ ጥሪቱ፥ ነተን ኣንስትን ነቶም ህዝብን ድማ ኣምለሰ።

ካብ ውግእ ምምላስ

¹⁷ኣብራም ንከዶርላዖሜርን ነቶም ምስኡ ዝነበሩ ነገስታትን ሰዒሩ ተመሊሱ ምስ መፀ፥ ንጉስ ሰዶም ኣብ ለሰ ሻዌ፥ ንሳ ለሰ ንጉስ እያ፥ ክቕበሎ ወፀ። ¹⁸መልከ ፄዴቅ ንጉስ ሳሌም ከዓ እንጀራን ወይንን ኣውፅአ። ንሱ ኸዓ ካህን ኤል ኤልዮን፥ ልዑል ኣቦና ነበረ። ^b b v18 መልከ ፄዴቅ፥ ካህን ልዑል እግዚኣብሄር፥ ንኢየሱስ ዝመስል ምሳሌ እዩ፤ ኣብ እብራውያን 7 ድማ ነቲ ኢየሱስ ዝፍፅሞ ስርዓት ዘለዎ ዘለኣለማዊ ካህንን ንጉስን ኮይኑ ተጠቒሱ ኣሎ። ¹⁹ንኣብራም ባረኾ ድማ ከምዙይ በለ፦ “ኣብራም በቲ ፈጣሪ ሰማይን ምድርን ዝኾነ ኤል ኤልዮን፥ ልዑል ኣቦና ይባረኽ። ²⁰ነቶም ፀላእትኻ ኣብ ኢድካ ዝሃበ ኤል ኤልዮን፥ ልዑል ኣቦና ድማ ይባረኽ።” ሽዑ ኣብራም ካብ ኵሉ ነገር ዓስራት ሃቦ።

²¹ንጉስ ሰዶም ድማ ንኣብራም “ነቶም ሰባት ሃበኒ፤ ነቲ ኣቑሑ ግና ንስኻ ውሰዶ” በሎ።

²²ኣብራም ግና ንጉስ ሰዶም ከምዙይ በሎ፦ “ኣነ ናብ ኣቦና፥ ኤል ኤልዮን፥ ልዑል፥ ፈጣሪ ሰማይን ምድርን ዝኾነ፥ ኢደይ ኣልዒለ ፅኑዕ ማሕላ ምሒለ ኣለኹ፤ ²³ካብ ናትካ ሓንቲ ፈትሊ ኾነ መእሰሪ ሳእኒ እኳ ኸም ዘይወስድ፥ ‘ኣነ ንኣብራም ኣሃብተምክዎ’ ከይትብል፥ ²⁴ኣነ ዋላ ሓንቲ ኣይወስድን፤ ብዘይ እቲ መንእሰያት ዝበልዕዎ፥ ነቶም ምሳይ ዝኸዱ ዓኔርን ኤሽኮልን መምሬን ከዓ ግደኦም ይኹኖም፤ ንሳቶም ግደኦም ይውሰዱ።”