Hanphutli Latung
Leiluikhanawui vang Abram kala Lotwui sei kahombing kharar ngarokhaowa, chieina Abramna ara̱ Lotli mangā eina kapang ngasaka. Lotna Jordanwui tara̱ kachungkha tampāk khuida Sodom shongli vāhaowa. Kakhalei chi khuida pamkhalei Abramli ithumwui Avāna atungshongla, azingshongla, zingsho kala zingtun kapeiyanglu da hānga: chi saikora awui naotunbingwui sāra.
13 1Abramna apreiva̱, awui lan katonga, kala Lotla ngasoda Egyptwui eina Negebshong kāpa. 2Chitharān Abram sha̱keili, lupāli, kala sināli kachungkha kashānga ngasāhaira. 3Ana Negebwui eina maron-maron eina zatlaga Bethelli vai, kala Bethel eina Aiwui ngachaili khare awui kachonshim nganinga apam chili vāshunga. 4Chi ana khare hanphut akha sākhui apamna. Chili Abramna ithumwui Avāwui mingli khoruma. 5Chitharān Abramli ngasokazata Lotla yaobing, seibing, kala kachonshim leisai. 6Ngalei chi athumna kapampam mapamrumpaithuwa; athumwui lan chungnā leikahaiwui vang anina apamra mapaithuwa. 7Abramwui sei kahombing eina Lotwui sei kahombingna kharar ngarokhaowa. Atam chitharān Canaannaobing eina Periznaobing ngalei chili pamsai. 8Abramna Lotli hānga, "Na eina I, kala nawui sei kahombing eina iwui sei kahombing makharar ngarokaranu, kaja ithum ivānaobingna. 9Ngalei katonga nawui mangāli maleimala? Ina nali kapona, iwui eina ngateida pamlu: na khavuishong vaakha, ina yāpangshong vaira; na yāpangshong vaakha, ina khavuishong vaira."
10Lotna mik yangkakā eina, Jordan tampāk katonga Zoar vāshungda apam kachiva̱li tara̱ chaimi kahai thei; chi ithumwui Avāwui yāmgui kathā, Egyptwui ngalei kathāna. (Hi ithumwui Avāna Sodom eina Gomorrahli mashimān ngasakranglakhawui atamna.). 11Lotna Jordan tampāk katonga chi khalattawui vang kapangkhuida zimikshoshong tāmamāna; anina angachaili pakthuihaowa. 12Abramna Canaan ngaleili pamsai; Lotna tampākwui keinungbingli pamruma kala Sodom vāshungda kachonshim khankhui. 13Chitharān Sodomwui mibing makhayā ngasāda ithumwui Avāli kachungkha morei sai.
14Lotna awui eina pakthuiwui thili, ithumwui Avāna Abramli hānga, "Na nganinga apam chiwui eina atungshong, azingshong, zingshoshong, kala zingtunshong mik yangkakā yanglu. 15Kaja nana theipai ngalei katonga chi nali kala nawui ara̱-azāli katang makhavai mira. 16Ina nawui ara̱-azāli okathuiwui chifa thāda sāra; okathuiwui chifa mashing shānkhuishapakha, nawui ara̱-azāla shānkhuishapra. 17Ngakarthuilu, ngalei chiwui asān eina aretli zatlu, kaja ina chi nali mira."
18Abramna awui kachonshim akhankhuida, Hebronli khalei Mamrewui shirimthingpamli vāda pamhaowa, kala apam chili ithumwui Avāli hanphut akha sākhui.
