Mi eng' bukuit

Taunet 13 FHB Father's Heart Bible™

Kiistoi 15% eng' kiy ne iale korook →
Bukuit

Weegeito kaptisisyet

Kiyai mogoryo si kong'eet boryondo kwenutap mestowegap Abram ak Lot, si koochi anyun Abram weeriitap ne tupcho kolewen tai. Ki lewen Lot atebweetap Jordan ne kibisiis komyee ak kowendi ole mi Sodom. Ye kingo bagaaktai Abram ne kagong'eta, komwachi Kwandanyo kogeer komoswek tugul: tugul ko po kesweekyik.

Ng'alaali Kwandanyo eng' mustarisyek 14–17

Sura 13.

Ki manda Abram eng' emetap Misiri kwo komostap Negeb, ineendet ak kwandanyi ak tuguuk tugul che ki tinyei, kobooto Lot. Ki ek anyun Abram mogoryo miising' eng' kiyagiik, eng' silingisyek, ak sahab. Ki testai panwekwak eng' komostap Negeb agoi Bethel, ole mi kwenutap Bethel ak Ai, ole ki teech emainnyi tai, ak ole ki teech kaptisisyet tai. Ki guur Abram eng' olooto kainetap Kwandanyo. Ki tinyei anyun Lot, ne ki wendi kobooto Abram, keechiirek ak tuuga ak emaisyek. Ma koyamei emet icheek komeng'jin tuwai; amu ki oo tuguukwak miising' si ma imuuch komeny tuwai. Ki ng'eet boryondo eng' kwenutap mestowegap Abram ak mestowegap Lot. Ki menyei Kanaanik ak Perisik eng' emet eng' saetyoto. Ki leenji Abram Lot, “Mokibeelgei, inyee ak anee, anan mestowenguk ak chenyuun, amu kiboo tupchosyekyok. Tos ma mi emet komugul taing'ung'? Achicha, itabaanjigei eng' anee: ngot iwe eutap kaataam, awe eutap tai; ngot iwe eutap tai, awe eutap kaataam.”

Ki agosu Lot ak koger kole atebweetap Jordan komugul ne tokyingei Zoar, ki kibisiis miising' komoswek tugul, ko uu mbareetap Kwandanyo, ko uu emetap Misiri. (Ki po nooto ye kita ko wong' Kwandanyo Sodom ak Gomorah.). Ki lewen Lot atebweetap Jordan komugul ineegei ak kowendi komostap kong'asiis; ki partoigei icheek tuwai. Ki meny Abram eng' emetap Kanaan; ki meny anyun Lot eng' kwenutap nganasoogap atebweet ak koteech emaisyek agoi Sodom. Ki po piigap Sodom che yaacheen, ak koyai tengek ne oo miising' eng' taitap Kwandanyo.

Kingo partoigei Lot kobun ineendet, ki leenji Kwandanyo Abram, “Agosu eng' ole itonon, igosu murot kaataam ak murot tai ak komostap kong'asiis ak cherongo. Amu emet komugul ne igeer, aguuchin inyee ak lagoguk agoi koigeny. Ayai lagoguk ko uu temburyegap ng'wony—ngot imuuchi chii kogeny temburyegap ng'wony, ko kegenyi lagoguk agine. Ng'eet, iwendoti emet eng' koindonyi ak tebeesindanyi, amu aguuchin inyee.”

Ki teech Abram emaisyekyik, ak kwo komeny ole neegitee keetiigap Mamre eng' Hebron, ak koteech Kwandanyo kaptisisyet eng' olooto.