Esekiẹli 31

31 ¹Ní ọdún kọkànlá, oṣù kẹta, ọjọ́ kìíní, ọ̀rọ̀ Baba wa tọ̀ mí wá pé:

²“Ọmọ ènìyàn, sọ fún Farao ọba Ejibiti àti àwọn ọ̀pọ̀ ènìyàn rẹ̀ pé: Ta ni ó bá ọ dọ́gba nínú títóbi rẹ? ³Asiria jẹ́ igi kedari ní Lebanoni, pẹ̀lú àwọn ẹ̀ka tí ó lẹ́wà àti ibòji igbó, ó ga sókè gíga, orí rẹ̀ sì wà láàrín àwọsánmà. ⁴Àwọn omi ló sọ ọ́ di ńlá, ibú ló mú kí ó ga, àwọn odò rẹ̀ ń ṣàn yí ibi tí a ti gbìn ín ká, ó sì ń rán àwọn ìṣàn rẹ̀ jáde sí gbogbo àwọn igi inú pápá. ⁵Nítorí náà gíga rẹ̀ ga ju gbogbo àwọn igi inú pápá lọ; àwọn ẹ̀ka ńlá rẹ̀ pọ̀ sí i, àwọn ẹ̀ka rẹ̀ sì gùn nítorí ọ̀pọ̀ omi bí ó ti ń tàn kálẹ̀. ⁶Ní orí àwọn ẹ̀ka ńlá rẹ̀ ni gbogbo àwọn ẹyẹ ojú ọ̀run ti kọ́ ìtẹ́, lábẹ́ àwọn ẹ̀ka rẹ̀ ni gbogbo àwọn ẹranko inú pápá ti bí ọmọ, nínú ibòji rẹ̀ sì ni gbogbo àwọn orílẹ̀-èdè ńláńlá ń gbé. ⁷Ó lẹ́wà nínú títóbi rẹ̀, pẹ̀lú àwọn ẹ̀ka rẹ̀ tí ó gùn, nítorí gbòǹgbò rẹ̀ dé inú ọ̀pọ̀ omi. ⁸Àwọn igi kedari tí ó wà nínú ọgbà Baba wa kò lè bá a díje; àwọn igi firi kò lè bá àwọn ẹ̀ka ńlá rẹ̀ dọ́gba, àwọn igi plénì kò sì dàbí àwọn ẹ̀ka rẹ̀. Kò sí igi kankan nínú ọgbà Baba wa tí ó dàbí rẹ̀ ní ẹwà. ⁹Mo sọ ọ́ di ẹlẹ́wà pẹ̀lú ọ̀pọ̀ àwọn ẹ̀ka rẹ̀, gbogbo àwọn igi Edeni tí ó wà nínú ọgbà Baba wa sì ṣe ìlara rẹ̀.’

¹⁰Nítorí náà báyìí ni Baba Olódùmarè wí: “Nítorí tí ó ga sókè gíga, tí ó gbé orí rẹ̀ sí àárín àwọsánmà, àti tí ọkàn rẹ̀ sì gbéraga nítorí gíga rẹ̀, ¹¹‘Mo fi í lé alágbára orílẹ̀-èdè lọ́wọ́, ẹni tí ó sì ti bá a wí dájúdájú; mo lé e jáde nítorí ìwà búburú rẹ̀. ¹²Àwọn àjèjì, àwọn tí ó burú jù nínú àwọn orílẹ̀-èdè, gé e lulẹ̀, wọ́n sì fi í sílẹ̀. Àwọn ẹ̀ka rẹ̀ ṣubú sórí àwọn òkè ńlá àti nínú gbogbo àfonífojì, àwọn ẹ̀ka ńlá rẹ̀ dùbúlẹ̀ ní fífọ́ nínú gbogbo kòtò ilẹ̀ náà, gbogbo àwọn ènìyàn ayé sì kúrò nínú ibòji rẹ̀, wọ́n sì kọ̀ ọ́ sílẹ̀. ¹³Lórí ẹ̀hìn-ìgi rẹ̀ tí ó ti wó ni gbogbo àwọn ẹyẹ ń bà, láàrín àwọn ẹ̀ka rẹ̀ sì ni gbogbo àwọn ẹranko igbó wà, ¹⁴kí ó má baà sí àwọn igi tí a bomirin dáradára tí yóò ga sókè gíga tàbí tí yóò gbé orí wọn sí àárín àwọsánmà, àti kí ẹnikẹ́ni tí ó ń mu omi má baà ga tó bẹ́ẹ̀. Nítorí a ti fi gbogbo wọn lé ikú lọ́wọ́, sí ìsàlẹ̀ ilẹ̀, láàrín àwọn ọmọ ènìyàn, pẹ̀lú àwọn tí ń sọ̀kalẹ̀ lọ sínú kòtò.’

¹⁵Báyìí ni Baba Olódùmarè wí: “Ní ọjọ́ tí ó sọ̀kalẹ̀ lọ sí isà òkú, mo mú kí ibú ṣọ̀fọ̀, mo sì fi bò ó nítorí igi náà; mo dá àwọn odò rẹ̀ dúró, a sì fa ọ̀pọ̀ omi sẹ́yìn. Mo sọ Lebanoni di òkùnkùn lé e lórí, gbogbo àwọn igi inú pápá sì rọ nítorí rẹ̀. ¹⁶Nígbà tí ìró ìṣubú rẹ̀ dún, mo mú kí àwọn orílẹ̀-èdè wárìrì, nígbà tí mo gbé e sọ̀kalẹ̀ sí isà òkú pẹ̀lú àwọn tí ń sọ̀kalẹ̀ lọ sínú kòtò. Nígbà náà ní ìsàlẹ̀ ilẹ̀, gbogbo àwọn igi Edeni, àwọn tí ó dára jù tí ó sì tóbi jù ní Lebanoni, gbogbo àwọn tí ń mu omi, ni a tù nínú. ¹⁷Àwọn náà pẹ̀lú sọ̀kalẹ̀ lọ pẹ̀lú rẹ̀ sí isà òkú, sí ọ̀dọ̀ àwọn tí a fi idà pa—àwọn tí í ṣe agbára rẹ̀, tí wọ́n ń gbé nínú ibòji rẹ̀ láàrín àwọn orílẹ̀-èdè.’

¹⁸“Èwo nínú àwọn igi Edeni ni ó bá ọ dọ́gba ní ògo àti títóbi? Síbẹ̀ pẹ̀lú àwọn igi Edeni ni a ó mú ọ sọ̀kalẹ̀ lọ sí ìsàlẹ̀ ilẹ̀, láti dùbúlẹ̀ láàrín àwọn aláìkọlà, pẹ̀lú àwọn tí a fi idà pa. Èyí ni Farao àti gbogbo ọ̀pọ̀ ènìyàn rẹ̀, ni Baba Olódùmarè wí.”