ሕዝቅኤል 31 FHB Father's Heart Bible™

31 ¹ኣብ መበል ዓሰርተ ሓደ ዓመት፥ ኣብ ሳልሳይ ወርሒ፥ በታ ቐዳመይቲ መዓልቲ፥ ቃል ኣቦና ናባይ መፀ፦

²“ኦ ወዲ ሰብ፥ ንፈርዖን ንጉስ ግብፅን ነቲ ህዝቡን ከምዙይ በሎም፦ ብዕቤትካ መን ይወዳደረካ? ³ኣሶር ኣብ ሊባኖስ ዝግባ ነበረ፥ ምልኩዕ ጨናፍርን ናይ ዱር ፅላልን ነበሮ፤ ብቑመቱ ልዕል ኢሉ፥ ርእሱ ኣብ ማእኸል ደመና ነበረ። ⁴እቲ ማያት ዓቢ ገበሮ፤ እቲ መዓሙቝ ነዊሕ ገበሮ፤ ሩባታቱ ኣብ ዙርያ እታ ዝተተኽለላ ቦታ ይውሕዙ ነበሩ፤ መስኖታቱ ድማ ናብ ኵሉ ኣእዋም በረኻ ሰደደ። ⁵ስለዙይ ቑመቱ ኣብ ልዕሊ ኵሉ ኣእዋም በረኻ ልዕል በለ፤ ጨናፍሩ በዝሐ፤ ጨናፍሩ ድማ ብሰሪ እቲ ብዙሕ ማያት እናተጋፍሐ ነውሐ። ⁶ኣብ ጨናፍሩ ኵሎም ኣዕዋፍ ሰማይ ሰፈሩ፤ ኣብ ትሕቲ ጨናፍሩ ኵሎም ኣራዊት በረኻ ወለዱ፤ ኣብ ፅላሉ ድማ ኵሎም ዓበይቲ ህዝብታት ነበሩ። ⁷ብዕቤቱ ምልኩዕ ነበረ፥ ጨናፍሩ ነዋሕቲ ነበራ፤ ሱሩ ድማ ናብ ብዙሕ ማያት ወሪዱ ነበረ። ⁸እቲ ኣብ ገነት ኣቦና ዘሎ ኣእዋም ዝግባ ክወዳደርዎ ኣይከኣሉን፤ ኣእዋም ፅሕዲ ንጨንፈሩ ክወዳደራ ኣይከኣሉን፤ ኣእዋም ሑዳ ድማ ከም ጨናፍሩ ኣይነበራን። ኣብ ገነት ኣቦና ዝነበረ ኦም፥ ብፅባቐ ኸማኡ ዝኸውን ኣይነበረን። ⁹ብብዙሕ ጨናፍሩ ምልኩዕ ገበርክዎ፤ ኵሎም ኣእዋም ኤደን፥ እቶም ኣብ ገነት ኣቦና ዝነበሩ ድማ ቐንኡሉ።’”

¹⁰ስለዙይ እግዚኣብሄር ኣቦ ኸምዙይ ይብል ኣሎ፦ “ልዕል ስለ ዝበለ፥ ርእሱ ኣብ ማእኸል ደመና ስለ ዝገበረ፥ ልቡ ድማ ብቑመቱ ስለ ዝዓበየ፥ ¹¹‘ናብ ኢድ እቲ ናይ ኣህዛብ ሓያል ኣሕሊፈ ሃብክዎ፤ ንሱ ኸዓ ብርግፅ ገበሮ፤ ብሰሪ ክፍኣቱ ሰጐጕክዎ። ¹²ደቂ ባዕዲ፥ እቶም ኣብ ኣህዛብ ኣዝዮም ጨካናት፥ ቘሪፆም ሓደግዎ። ጨናፍሩ ኣብ ኣኽራንን ኣብ ኵሉ ሽንጥሮን ወደቐ፤ ጨናፍሩ ኣብ ኵሉ ለሰታት እታ ምድሪ ተሰቢሩ ወደቐ፤ ኵሎም ህዝብታት ምድሪ ድማ ካብ ፅላሉ ወፂኦም ሓደግዎ። ¹³ኣብ ልዕሊ እቲ ዝወደቐ ጉንዱ ኵሎም ኣዕዋፍ ሰማይ የዕርፉ፤ ኣብ ጨናፍሩ ድማ ኵሎም ኣራዊት በረኻ ይነብሩ፤ ¹⁴ብዙሕ ማይ ዝረኽቡ ኣእዋም ልዕል ከይብሉ፥ ርእሶም ኣብ ማእኸል ደመና ኸይገብሩ፥ ማይ ዝሰትዩ ዅሎም ከዓ ልዕል ልዕል ከይብሉ እዩ። ኵሎም ናብ ሞት፥ ናብ መዓሙቝ ምድሪ፥ ኣብ ማእኸል ደቂ ሰብ፥ ምስቶም ናብ ጕድጓድ ዝወርዱ ኣሕሊፎም ተዋሂቦም እዮም እሞ።’”

¹⁵እግዚኣብሄር ኣቦ ኸምዙይ ይብል ኣሎ፦ “በታ ናብ ሲኦል ዝወረደላ መዓልቲ፥ ነቲ መዓሙቝ ኣብኸኽዎ፤ ምእንታኡ ድማ ከደንክዎ፤ ንሩባታቱ ዓገትኩ፤ እቲ ብዙሕ ማያትውን ተዓግተ፤ ምእንታኡ ንሊባኖስ ኣፀለምክዎ፤ ኵሎም ኣእዋም በረኻ ድማ ብሰሪኡ ደረቑ። ¹⁶በቲ ናይ ውድቀቱ ድምፂ ንህዝብታት ኣንቀጥቀጥክዎም፤ ምስቶም ናብ ጕድጓድ ዝወርዱ ናብ ሲኦል ምስ ደርበኽዎ። ሽዑ ኣብ መዓሙቝ ምድሪ፥ ኵሎም ኣእዋም ኤደን፥ እቶም ብሉፃትን ዝበልፁን ኣእዋም ሊባኖስ፥ ኵሎም ማይ ዝሰትዩ፥ ተፀናንዑ። ¹⁷ንሳቶም ድማ ምስኡ ናብ ሲኦል፥ ናብቶም ብሰይፊ ዝተቐተሉ ወረዱ፤ እቶም ሓይሉ ዝነበሩ፥ ኣብ ፅላሉ ኣብ ማእኸል ኣህዛብ ዝነበሩ እዮም።’

¹⁸“ካብ ኣእዋም ኤደን ብኽብርን ብዕቤትን ዝመሰለካ መን እዩ? ኮይኑ ግና ምስ ኣእዋም ኤደን ናብ መዓሙቝ ምድሪ ክትውረድ ኢኻ፤ ኣብ ማእኸል እቶም ዘይተገረዙ፥ ምስቶም ብሰይፊ ዝተቐተሉ ክትድቅስ ኢኻ። እዝ ፈርዖንን ኵሉ ህዝቡን እዩ፥ ይብል እግዚኣብሄር ኣቦ።”