Langkaso Kongluiwui Makhavā
Pharaohli nawui khangam thāda khipā leikhala da ngahānlaga, Assyria chitheimi: cedarthing akha juimatailaka vānaobingna aphāngli athip sai, kala Edenwui thingbingna chili kangachi; awui langsowui vang phattuhaowa, awui khaya̱ saikorana mahāngla, kala awui kong chi khurlungli phungshokhaowa. Chānsam chi hi ot kathāna.
31 1Zingkum tharāda akha, kachāng kakathuma, zimiksho khareli, ithumwui Avāwui Tui ili rāhānga:
2"Miwui Naomayara, Egyptwui awunga Pharaohli kala awui mi kachungkhali hānglu: Nawui kharewui alungli khipā nali phākhamei? 3Assyria hi Lebanonli khalei cedarthing akhana; khamathā aphāng kala ngahong khaya̱ leida, kajui juishun eina, aton muiyā ngachaili kāzoka. 4Tara̱na ali hak ngasaka, kathukana ali juishun ngasaka, awui kongbing ana phurshok kahai pam kuimareida longshoka, awui kongrā luiwui thingrong saikorali chihosanghaowa. 5Chiwui vang luiwui thingrong saikorawui ngachaili awui kajui juimeikap ngasāhaowa; ana ngapānvai tharan, mavātla tara̱wui vang awui thingphāng mataisanga, kala awui aphāng longa. 6Awui thingphānglungli khamasaiwui vānaobing saikorana athip rāsākakhui, awui aphāng zingli sāyur saikorana nao pharā, kala awui khaya̱li reikhamatai miyur saikora pama. 7Awui reikharewui alungli a khamathāna, awui aphāng longbing eina, kaja awui angayung mavātla tara̱li ngayao vāhaowa. 8Ithumwui Avā yāmguili khalei cedarthingbing ali phākhamei maleimana; cypressthingbingna awui thingphāngli phākhamei maleimana, kala matangthingbing awui aphāng thāda maleimana. Ithumwui Avā yāmguili khalei thingrong khipālikha awui khamathā thāda maleimana. 9Ina ali awui aphāng kachungkha eina khamathā ngasaka, kala ithumwui Avā yāmguili khalei Edenwui thingrong saikorana ali yuishihaowa.'
10"Chiwui vang Proho Avāna hithāda hānga: "Ana juishun eina, aton muiyā ngachaili haihaida, kala awui ning kajuiwui vang langsohaowa kajiwui vang, 11'Ina ali yurbingwui kapinga akhawui pāngli mihaira, ana ali chithāda kasāna; awui makhayāwui vang ina ali kashamshokhaowa. 12Yur kateibing, yurbingwui alungli sākashe meikap kaji, ali ta̱teka horhaowa. Awui aphāng kaphungtungli kala tampāk kachiva̱li tāhaowa, awui thingphāng ngaleiwui tampākbing saikorali teka pamsai, kala okathuiwui miyur saikorana awui khaya̱ thuihaida ali horhaowa. 13Awui pitākahai akungtungli khamasaiwui vānaobing saikora pama, kala awui aphāng ngachaili sāyur saikora pama. 14Chiwui vang tara̱ khalei thingrong khipālikha juishun matheira, lah aton muiyā ngachaili mahaira, kala tara̱ kapingbing khipālikha juishun matheira. Kaja mikumobing alungli, chomli tākhavābing ngasoda, saikora okathuiwui kathukali kathili mihaira.'
15Proho Avāna hithāda hānga: "Ana chikhurli tā zimiksho chili, ina kathukali chapkhangachā ngasaka kala thingrong chiwui vang ali fakhama; awui kongbing ina khāmhaowa, kala mavātla tara̱ khāmkhui. Awui vang Lebanon ina tangmang ngasaka, kala awui vang luiwui thingrong saikora ngahuihaowa. 16Ali chomli tākhavābing ngasoda chikhurli ina horsang tharan, awui kongluiwui akhon eina ina yurbing nganuk ngasaka. Chiwui thili okathuiwui kathukali, Edenwui thingrong saikora, Lebanonwui mathāmeikap kala kaphā meikap kaji, tara̱ kapingbing saikorana ringphā samphanga. 17Awui pangshap kahai, yurbing ngachaili awui khaya̱li kapamabing athumla ali ngasoda chikhurli, raighai eina thikahaibingli tāhaowa.'
18"Eden yāmguiwui thingrongbingwui ngachaili khipākha nawui tekhamatei kala reikhamatai ngaraichāhaikhala? Chithālala Eden thingrongbingli ngasoda na kathukali khuitāra, ahui marimkashokbing, raighai eina sāthat kahaibingli ngasoda ngasopira. Hi chi Pharaoh kala awui mibing saikorana, da Proho Avāna hānga."
