Ezekiyeli 31 FHB Father's Heart Bible™

31 ¹Mu caka cakhumi na cibodzi, mu mwezi wacitatu, pa ntsiku yakutoma, mafala a Baba wathu abwera kuna ine:

²“Mwana wa munthu, panga Farau mambo wa Edjitu na mwinji wace kuti: Mbani anakulandana na iwe mu ukulu wako? ³Asiriya akhali muti wa sedri ku Libano, na misambvu yakubalika na ntsidzi wa dondo, wakulapha kakamwe, nsongo wace pakati pa makhole. ⁴Madzi ampasa ukulu, madzi akuzika ancitisa kukula kwace mpaka kulapha, mikulo yace mbikhathimira mbuto idabzalwa iye, mbitumiza mikwambvu yace kuna miti yonsene ya nthando. ⁵Na tenepo kulapha kwace kwaposa miti yonsene ya nthando; nthambi zace zathimizirika, misambvu yace yakula mitali thangwi ya madzi mazinji, mu kufuka kwace. ⁶M'nthambi zace mukhamanga zisa mbalame zonsene za m'mwamba, pantsi pa misambvu yace pikhabalira pinyama pyonsene pya nthando, mu ntsidzi wace mukhakhala madzinza makulu onsene. ⁷Ukhali wakubalika mu ukulu wace, na misambvu yace mitali, thangwi midzi yace ikhafika kuna madzi mazinji. ⁸Miti ya sedri mu munda wa Baba wathu nee ikhakwanisa kulandana na iwo; miti ya sipiresi nee ikhalingana na nthambi zace, miti ya palatano nee ikhali ninga misambvu yace. Nkhabe muti mu munda wa Baba wathu ukhali ninga iwo mu kubalika. ⁹Ine ndaucita kukhala wakubalika na misambvu yace mizinji, na miti yonsene ya Edeni ile ikhali mu munda wa Baba wathu yancitira njiru.'

¹⁰Na tenepo Baba Wankulu asalonga tenepa: "Thangwi iwo ukhali wakulapha kakamwe, waikha nsongo wace pakati pa makhole, na ntima wace wadzikuza thangwi ya kulapha kwace, ¹¹'Ine ndaupereka m'manja mwa nyamphambvu wa madzinza, adaucitira pinthu mwakukwana; ndaubulusa thangwi ya kuipa kwace. ¹²Anthu acilendo, akuipa kakamwe pakati pa madzinza, audula mbauasiya. Misambvu yace yagwa pa mapiri na m'maluphata onsene, nthambi zace zidagwanyika zagona mu mikulo yonsene ya dziko, anthu onsene a pa dziko abuluka mu ntsidzi wace, mbauasiya. ¹³Pa citsamba cace cidagwa pasakhala mbalame zonsene za m'mwamba, pakati pa misambvu yace pisakhala pinyama pyonsene pya nthando, ¹⁴toera miti yonsene yakuthiririka madzi ikhonde kulapha, nee kuikha misongo yawo pakati pa makhole, nee m'bodzi wa ale asamwa madzi anakwanisa kulapha tenepo. Thangwi onsene aperekwa ku kufa, ku mbuto zakuzika za pantsi pa dziko, pakati pa anthu, pabodzi na ale anatsikira ku dindi.'

¹⁵Baba Wankulu asalonga tenepa: "Pa ntsiku idatsika iwo ku manda, ndacitisa madzi akuzika kulira, mbandiaphimbira thangwi ya muti unowu; ndapingiza mikulo yace, madzi mazinji aletsedwa. Ndacitisa Libano kucita ntema pa iwo, miti yonsene ya nthando yauma thangwi ya iwo. ¹⁶Na kubveka kwa kugwa kwace ndacitisa madzinza kutetemera, pidauponya Ine iwo ku manda pabodzi na ale anatsikira ku dindi. Penepo ku mbuto zakuzika za pantsi pa dziko, miti yonsene ya Edeni, yakubalika na yadidi kakamwe ya Libano, yonsene yakumwa madzi, yabalangazwa. ¹⁷Iyo yatsikambo pabodzi na iwo ku manda, kuna ale adaphiwa na supada—ale akhali mphambvu yace, akhakhala mu ntsidzi wace pakati pa madzinza.'

¹⁸“Ndi muti upi wa Edeni ukhalandana na mbiri yako na ukulu wako? Mbwenye pabodzi na miti ya Edeni, iwe unadzatsitswa ku mbuto zakuzika, toera kugona pakati pa ale adakhonda kusidzwa, pabodzi na ale adaphiwa na supada. Uyu ndi Farau pabodzi na mwinji wace onsene, asalonga Baba Wankulu.”