Girman Kai Kafin Fāɗuwa
An tambayi Fir'auna wa ake kwatanta shi da shi, sa'an nan aka nuna masa Assuriya: itacen al'ul mai tsayi har tsuntsaye suka yi sheƙa a cikinsa, itatuwan Aidan kuma suka yi masa kishi, aka sare shi saboda girman kansa, aka bar inuwarsa, aka kuma aika gangar jikinsa zuwa rami. Kwatancen shi ne dukan maganar.
31 1A shekara ta goma sha ɗaya, a wata na uku, a rana ta farko, sai maganar Ubanmu ta zo mini,
2“Ɗan mutum, ka gaya wa Fir'auna sarkin Masar da jama'arsa cewa, Da wa za a kwatanta ka cikin girmanka? 3Assuriya ta kasance itacen al'ul a Lebanon, mai kyawawan rassa da inuwar kurmi, mai tsayi ƙwarai, tsamiyarsa a cikin gizagizai. 4Ruwaye suka sa shi yă yi girma, zurfin ruwa ya sa shi yă yi tsawo, kogunansa suna gudana kewaye da inda aka shuka shi, suna aika da magudanansa zuwa dukan itatuwan jeji. 5Saboda haka tsayinsa ya zarce dukan itatuwan jeji; manyan rassansa suka yi yawa, ƙananan rassansa kuma suka yi tsawo saboda yawan ruwan da yake samu yayinda yake bazuwa. 6A cikin manyan rassansa dukan tsuntsayen sama suka yi sheƙa, a ƙarƙashin ƙananan rassansa dukan namun jeji suka haifi 'ya'ya, kuma a cikin inuwarsa dukan manyan al'ummai suka zauna. 7Yana da kyau cikin girmansa, da dogayen rassansa, gama saiwoyinsa sun nutse har zuwa ruwaye masu yawa. 8Itatuwan al'ul a cikin lambun Ubanmu ba su iya kwatanta da shi ba; itatuwan fir ba su kai manyan rassansa ba, itatuwan armon kuma ba su yi kama da ƙananan rassansa ba. Babu wani itace a cikin lambun Ubanmu da ya yi kama da shi a kyau. 9Na sa ya yi kyau da yawan rassansa, har dukan itatuwan Adan da suke cikin lambun Ubanmu suka yi kishinsa.”
10Saboda haka ga abin da Uba Mai Iko Duka yake cewa, “Domin ya yi tsayi sosai, ya sa tsamiyarsa a cikin gizagizai, zuciyarsa kuma ta kumbura da girman kai saboda tsayinsa, 11‘na ba da shi ga mai iko a cikin al'ummai, wanda tabbas ya yi masa hukunci; na kore shi saboda muguntarsa. 12Baƙi, waɗanda su ne mafiya zalunci a cikin al'ummai, suka sare shi suka yar da shi. Ƙananan rassansa suka fāɗi a kan duwatsu da cikin kowane kwari, manyan rassansa suka karye a cikin dukan magudanan ƙasar, dukan mutanen duniya kuma suka bar inuwarsa suka yashe shi. 13A kan gangar jikinsa da ya fāɗi dukan tsuntsayen sama suna zama, a cikin ƙananan rassansa kuma dukan namun jeji, 14domin kada wani itace mai ruwa mai yawa yă yi tsayi sosai ko yă sa tsamiyarsa a cikin gizagizai, kuma kada waɗanda suke shan ruwa su kai wannan tsawo. Gama an ba da dukansu ga mutuwa, zuwa cikin ƙasa mai zurfi, a cikin 'ya'yan mutane, tare da waɗanda suke gangarawa zuwa rami.’
15Ga abin da Uba Mai Iko Duka yake cewa, ‘A ranar da ya gangara zuwa kabari, na sa zurfin ruwa yă yi makoki na kuma rufe shi saboda itacen; na hana kogunansa gudana, aka kuma tsai da ruwaye masu yawa. Na duhunta Lebanon saboda shi, kuma dukan itatuwan jeji suka bushe saboda shi. 16Da jin ƙarar fāɗuwarsa na sa al'ummai suka girgiza, sa'ad da na jefar da shi zuwa kabari tare da waɗanda suke gangarawa zuwa rami. Sa'an nan a cikin zurfin ƙasa, dukan itatuwan Adan, zaɓaɓɓu masu kyau na Lebanon, dukan waɗanda suke shan ruwa, suka sami ta'aziyya. 17Su ma suka gangara tare da shi zuwa kabari, zuwa ga waɗanda aka kashe da takobi—waɗanda su ne ƙarfinsa, waɗanda suka zauna a cikin inuwarsa a cikin al'ummai.’
18“Wane itace na Adan ne ya yi daidai da ɗaukakarka da girmanka? Duk da haka za a saukar da kai tare da itatuwan Adan zuwa cikin ƙasa mai zurfi, ka kwanta a cikin marasa kaciya, tare da waɗanda aka kashe da takobi. Wannan shi ne Fir'auna da dukan jama'arsa, in ji Uba Mai Iko Duka.”