Tarun Uba Ya Fāɗo a kan Fir'auna

Makokin da ke jan Fir'auna ƙasa. Ubanmu ya kama shi da taru kamar dodon kogi, ya jefar da shi a fili don tsuntsaye, aka kuma duhunta sararin sama bisa Masar. Sa'an nan aka zagaya maƙabartar dauloli, Assuriya, Elam, Meshek, Edom, Sidon, inda aka shirya wuri.

Babi na 32.

A shekara ta goma sha biyu, a wata na goma sha biyu, rana ta fari, sai maganar Ubanmu ta zo mini cewa,

Ɗan mutum, ka yi makoki a kan Fir'auna sarkin Masar, ka ce masa, Ka kwatanta kanka da zaki a cikin al'ummai, amma kai kamar dodon ruwa ne a cikin tekuna; kana kutsawa cikin kogunanka, kana dama ruwaye da ƙafafunka, kana ɓata magudanansu. ^a Ga abin da Uba Maɗaukaki yake cewa: Zan shimfiɗa taruna a kanka tare da taron mutane masu yawa, za su kuma jā ka sama cikin babban taruna. Zan jefa ka a ƙasa, in watsar da kai a fili; zan sa dukan tsuntsayen sama su sauka a kanka, dabbobin dukan duniya kuma su ƙoshi da naman jikinka. Zan warwatsa naman jikinka a kan duwatsu in cika kwaruruka da mushenka. Zan jiƙe ƙasa da jininka mai gudu har zuwa duwatsu, magudanai kuma za su cika da kai. Sa'ad da nake kashe ka, zan lulluɓe sammai in duhunta taurarinsu; da gizagizai zan rufe rana, wata kuma ba zai ba da haskensa ba. Zan duhunta dukan haskoki masu haske a sammai a kanka, zan kuma kawo duhu a ƙasarka, in ji Uba Maɗaukaki. Zan dami zukatan mutane masu yawa sa'ad da na kawo labarin fāɗuwarka a cikin al'ummai, zuwa ƙasashen da ba ka sani ba. Zan sa mutane masu yawa su razana saboda kai, sarakunansu kuma za su yi rawar jiki don tsoro saboda kai sa'ad da na girgiza takobina a gabansu. A ranar fāɗuwarka za su yi rawar jiki ba fāshi ba, kowa saboda ransa. Gama ga abin da Uba Maɗaukaki yake cewa: Takobin sarkin Babila zai auko maka. Da takuban jarumawa zan sa taronka su fāɗi— mafiya zafin hali cikin dukan al'ummai. Za su ragargaza girman kan Masar, dukan taronta kuma za a hallaka. Zan hallaka dukan shanunta daga gefen ruwaye masu yawa; ƙafar mutum ba za ta ƙara dama su ba, kofaton shanu kuma ba za su dama su ba. Sa'an nan zan sa ruwayensu su natsu in sa kogunansu su gudana kamar mai, in ji Uba Maɗaukaki. Sa'ad da na mai da ƙasar Masar kufai, na ƙwace wa ƙasar dukan abin da ya cika ta, sa'ad da na bugi dukan mazaunanta, sa'an nan za su san cewa ni ne Uba.

Wannan makoki ne; za su rera shi. 'Ya'yan al'ummai mata za su rera shi a kan Masar da dukan taronta; za su rera shi, in ji Uba Maɗaukaki.

A shekara ta goma sha biyu, a rana ta goma sha biyar ga wata, sai maganar Ubanmu ta zo mini cewa,

Ɗan mutum, ka yi kuka a kan taron Masar; ka saukar da ita—ita da 'ya'yan al'ummai masu daraja mata—zuwa duniyar ƙasa, tare da waɗanda suke gangarawa zuwa rami. Kin fi wa kyau? Ki sauka ki kwanta tare da marasa kaciya. ^b Za su fāɗi a cikin waɗanda aka kashe da takobi. An zāre takobi; ku jā ta tare da dukan taronta. Daga tsakiyar kabari manyan shugabanni za su yi magana a kansa, tare da mataimakansa: Sun gangara, suna kwance a can—marasa kaciya, waɗanda aka kashe da takobi. Assuriya tana nan tare da dukan taronta, kaburburenta kewaye da ita, dukansu an kashe su, sun fāɗi ta wurin takobi, an kafa kaburburensu a wurare mafiya zurfi na rami, taronta kewaye da kabarinta, dukansu an kashe su, sun fāɗi ta wurin takobi—waɗanda suka taɓa baza razana a cikin ƙasar masu rai. Elam tana nan tare da dukan taronta kewaye da kabarinta, dukansu an kashe su, sun fāɗi ta wurin takobi—waɗanda suka gangara marasa kaciya zuwa duniyar ƙasa, waɗanda suka taɓa baza razanarsu a cikin ƙasar masu rai. Yanzu suna ɗaukar kunyarsu tare da waɗanda suke gangarawa zuwa rami. An shirya mata gado a cikin waɗanda aka kashe, tare da dukan taronta, kaburburenta kewaye da shi—dukansu marasa kaciya, waɗanda aka kashe da takobi. Domin sun baza razana a cikin ƙasar masu rai, suna ɗaukar kunyarsu tare da waɗanda suke gangarawa zuwa rami; an sa su a cikin waɗanda aka kashe. Meshek da Tubal suna nan tare da dukan taronsu, kaburburensu kewaye da su, dukansu marasa kaciya, an soke su da takobi, domin sun baza razanarsu a cikin ƙasar masu rai. Ba sa kwance tare da jarumawan dā da suka fāɗi, waɗanda suka gangara zuwa kabari tare da makaman yaƙinsu, waɗanda aka sa takubansu a ƙarƙashin kawunansu laifinsu kuma yana kan ƙasusuwansu—gama razanar waɗannan jarumawa ta taɓa cika ƙasar masu rai. Amma ke ma za a karya ki a cikin marasa kaciya, ki kuma kwanta tare da waɗanda aka kashe da takobi. Edom tana nan, sarakunanta da dukan fādawanta, waɗanda duk da ƙarfinsu aka kwantar da su tare da waɗanda aka kashe da takobi; suna kwance tare da marasa kaciya, tare da waɗanda suke gangarawa zuwa rami. Dukan sarakunan arewa suna nan, da dukan mutanen Sidon, waɗanda suka gangara da kunya tare da waɗanda aka kashe duk da razanar da ƙarfinsu ya taɓa haddasawa; suna kwance marasa kaciya tare da waɗanda aka kashe da takobi, suna kuma ɗaukar kunyarsu tare da waɗanda suke gangarawa zuwa rami. Fir'auna zai ga su ya kuma ta'azantu game da dukan taronsa—Fir'auna da dukan mayaƙansa, waɗanda aka kashe da takobi, in ji Uba Maɗaukaki. Gama na baza razanarsa a cikin ƙasar masu rai; saboda haka za a kwantar da shi a cikin marasa kaciya, tare da waɗanda aka kashe da takobi—Fir'auna da dukan taronsa, in ji Uba Maɗaukaki.