Ezekiyel 30 FHB Father's Heart Bible™

30 ¹Maganar Ubanmu ta zo mini:

²Ɗan mutum, ka yi annabci ka ce, Maɗaukakin Uba ya ce, “Ku yi kuka, ‘Kaito, ranan nan!’ ³Gama ranar ta yi kusa, ranar Ubanmu ta yi kusa— ranar gizagizai, lokacin masifa ga al'ummai. ⁴Takobi zai fāɗo wa Masar, azaba kuma za ta kasance a Kush sa'ad da waɗanda aka kashe suka fāɗi a Masar, sa'ad da suka kwashe dukiyarta, aka kuma rushe tushenta. ⁵Kush, Fut, da Lud, dukan Larabawa, Libiya, da mutanen ƙasar alkawari za su fāɗi tare da su ta takobi. ⁶Ga abin da Ubanmu ya ce, “Waɗanda suke goyon bayan Masar za su fāɗi, ƙarfinta mai girman kai kuma zai sauka; daga Migdol zuwa Aswan za su fāɗi a cikinta ta takobi, in ji Maɗaukakin Uba. ⁷Za su zama kufai a cikin ƙasashe kufai, biranenta kuma za su kasance a cikin birane da suka rushe. ⁸Sa'an nan za su san cewa ni ne Uba, sa'ad da na sa wuta a Masar aka kuma ragargaza dukan masu taimakonta.

⁹A ranan nan manzanni za su fita daga wurina a cikin jiragen ruwa domin su razana Kush mai zaman lafiya, azaba kuma za ta kama su a ranar Masar—gama lalle tana zuwa.

¹⁰Ga abin da Maɗaukakin Uba ya ce, “Zan kawo ƙarshen taron jama'ar Masar ta hannun Nebukadnezzar sarkin Babila. ¹¹Shi da mayaƙansa tare da shi, mafiya zalunci cikin al'ummai, za a kawo su domin su hallaka ƙasar; za su zāre takubansu a kan Masar su kuma cika ƙasar da matattu. ¹²Zan busar da rafukan Nilu in kuma sayar da ƙasar ga mugaye; zan mai da ƙasar kango, da kuma dukan abin da yake cikinta, ta hannun baƙi. Ni, Uba, na faɗa.”

¹³Ga abin da Maɗaukakin Uba ya ce, “Zan hallaka gumaka in kuma kawo ƙarshen siffofin banza a Memfis. Ba za a ƙara samun sarki a ƙasar Masar ba, zan kuma baza tsoro ko'ina a ƙasar. ^a a v13 Memfis babban birni ne na dā na Masar ta Ƙasa — a cikin Ibraniyancin Ezekiyel ana kiranta Nof. ¹⁴Zan mai da Fatros kango, in sa wuta a Zowan, in kuma zartar da hukunci a kan Tebes. ^b b v14 Tebes babban birni ne na Masar ta Bisa — a cikin Ibraniyancin Ezekiyel ana kiranta No. ¹⁵Zan zubar da hasalata a kan Felusiyum, kagarar Masar, in kuma datse taron jama'ar Tebes. ¹⁶Zan sa wuta a Masar; Felusiyum za ta murɗe cikin azaba, za a farfashe Tebes, Memfis kuma za ta fuskanci abokan gāba da rana. ¹⁷Samarin Heliyofolis da Fi-beset za su fāɗi ta takobi, biranen kansu kuma za su tafi bauta. ¹⁸A Tafanhes rana za ta yi duhu sa'ad da na karya karkiyar Masar a can, ƙarfinta mai girman kai kuma zai ƙare a cikinta. Girgije zai rufe ta, 'ya'yan garuruwanta kuma za su tafi bauta. ¹⁹Ta haka zan zartar da hukunci a kan Masar. Sa'an nan za su san cewa ni ne Uba.”

Uba Ya Karya Hannun Fir'auna

²⁰A shekara ta goma sha ɗaya, a wata na fari, a rana ta bakwai, maganar Ubanmu ta zo mini:

²¹Ɗan mutum, na karya hannun Fir'auna sarkin Masar; ba a ɗaure shi domin warkarwa ba, ba a kuma sa masa katako ba, don yă sami ƙarfin da zai iya riƙe takobi. ²²Saboda haka ga abin da Maɗaukakin Uba ya ce, “Ina gāba da Fir'auna sarkin Masar. Zan karya hannuwansa—mai ƙarfi da wanda ya karye—in kuma sa takobi yă fāɗi daga hannunsa. ²³Zan watsar da Masarawa cikin al'ummai in kuma warwatsa su cikin ƙasashe. ²⁴Zan ƙarfafa hannuwan sarkin Babila in sa takobina a hannunsa, amma zan karya hannuwan Fir'auna, Fir'auna kuma zai yi nishi a gaban sarkin Babila kamar mai mutuwa. ²⁵Zan ƙarfafa hannuwan sarkin Babila, amma hannuwan Fir'auna za su fāɗi. Sa'an nan za su san cewa ni ne Uba, sa'ad da na sa takobina a hannun sarkin Babila, ya kuma miƙa shi a kan ƙasar Masar. ²⁶Zan watsar da Masarawa cikin al'ummai in kuma warwatsa su cikin ƙasashe. Sa'an nan za su san cewa ni ne Uba.”