ሕዝቅኤል 30

30 ¹የአባታችን ቃል ወደ እኔ እንዲህ ሲል መጣ፦

²የሰው ልጅ ሆይ፣ ትንቢት ተናገር፤ እንዲህ በል፦ ጌታ አባት እንዲህ ይላል፦ “‘ወዮ ለዚያ ቀን!’ ብላችሁ ዋይ በሉ።” ³ቀኑ ቀርቦአልና፤ የአባታችን ቀን ቀርቦአል፤ የደመና ቀን፣ ለአሕዛብ የጥፋት ጊዜ ነው። ⁴ሰይፍ በግብፅ ላይ ይመጣል፤ የተገደሉት በግብፅ በሚወድቁበት ጊዜ በኵሽ ላይ ጭንቀት ይሆናል፤ ሀብትዋን ሲወስዱ፣ መሠረቶችዋም ይፈርሳሉ። ⁵ኵሽ፣ ፉጥ፣ ሉድ፣ ዐረብ ሁሉ፣ ልቢያ፣ የኪዳኑም ምድር ሕዝብ አብረዋቸው በሰይፍ ይወድቃሉ። ⁶አባታችን እንዲህ ይላል፦ “ግብፅን የሚደግፉ ይወድቃሉ፤ የትዕቢትዋም ኀይል ይወርዳል፤ ከሚግዶል እስከ ሴዌኔ ድረስ በእርስዋ ውስጥ በሰይፍ ይወድቃሉ፤ ይላል ጌታ አባት። ⁷በባድማ ምድሮች መካከል ባድማ ይሆናሉ፤ ከተሞችዋም በፈራረሱ ከተሞች መካከል ይተኛሉ። ⁸በግብፅ ላይ እሳት ባነደድሁ ጊዜ፣ እኔ አብ እንደ ሆንሁ ያውቃሉ፤ ረዳቶችዋም ሁሉ ይሰበራሉ።

⁹በዚያ ቀን ተዘልላ የምትኖረውን ኵሽን ለማስፈራራት መልእክተኞች ከእኔ ዘንድ በመርከብ ይወጣሉ፤ በግብፅም ቀን ጭንቀት ይይዛቸዋል፤ እነሆ፣ በርግጥ ይመጣል።

¹⁰ጌታ አባት እንዲህ ይላል፦ “የግብፅን ብዙ ሕዝብ በባቢሎን ንጉሥ በናቡከደነፆር እጅ አጠፋለሁ። ¹¹እርሱና ከእርሱ ጋር ያለው ሰራዊቱ፣ ከአሕዛብ ሁሉ ይልቅ ጨካኞች የሆኑት፣ ምድሪቱን ሊያጠፉ ይመጣሉ፤ ሰይፋቸውንም በግብፅ ላይ ይመዝዛሉ፤ ምድሪቱንም በተገደሉት ይሞሉአታል። ¹²የዓባይን ፈሳሾች አደርቃለሁ፤ ምድሪቱንም ለክፉ ሰዎች እሸጣታለሁ፤ ምድሪቱን በውስጥዋም ያለውን ሁሉ በባዕዳን እጅ ባድማ አደርጋለሁ። እኔ አብ ተናግሬአለሁ።”

¹³ጌታ አባት እንዲህ ይላል፦ “ጣዖታትን አጠፋለሁ፤ በሜምፊስ ያሉትን ከንቱ ምስሎችም እደመስሳለሁ። ከእንግዲህ በግብፅ ምድር መስፍን አይኖርም፤ በምድሪቱም ሁሉ ላይ ፍርሃትን አሰፍናለሁ። ^a a v13 ሜምፊስ የታችኛው ግብፅ የጥንት ዋና ከተማ ነበረች፤ በሕዝቅኤል ዕብራይስጥ ኖፍ ተብላ ትጠራለች። ¹⁴ጳትሮስን ባድማ አደርጋለሁ፤ ጣኔዎስን በእሳት አቃጥላለሁ፤ በቴብስም ላይ ፍርድን አመጣለሁ። ^b b v14 ቴብስ የላይኛው ግብፅ ታላቅ ከተማ ነበረች፤ በሕዝቅኤል ዕብራይስጥ ኖ ተብላ ትጠራለች። ¹⁵ቍጣዬን በግብፅ ምሽግ በሆነችው በሲን ላይ አፈሳለሁ፤ የቴብስንም ብዙ ሕዝብ አጠፋለሁ። ¹⁶በግብፅ ላይ እሳት አነድዳለሁ፤ ሲን በጭንቀት ትወራጫለች፤ ቴብስ ትሰበራለች፤ ሜምፊስም በቀን ጠላቶች ይገጥሟታል። ¹⁷የሄልዮፖሊስና የፊቤሴት ጕልማሶች በሰይፍ ይወድቃሉ፤ ከተሞችዋም ራሳቸው ወደ ምርኮ ይሄዳሉ። ¹⁸በታፍናስ የግብፅን ቀንበር በምሰብርበት ጊዜ ቀኑ ይጨልማል፤ የትዕቢትዋም ኀይል በእርስዋ ውስጥ ያከትማል። ደመናም ይሸፍናታል፤ ሴቶች ልጆችዋም ወደ ምርኮ ይሄዳሉ። ¹⁹እንዲህ በግብፅ ላይ ፍርድን አመጣለሁ። በዚያን ጊዜ እኔ አብ እንደ ሆንሁ ያውቃሉ።”

አብ የፈርዖንን ክንድ ይሰብራል

²⁰በአሥራ አንደኛው ዓመት በመጀመሪያው ወር በሰባተኛው ቀን የአባታችን ቃል ወደ እኔ እንዲህ ሲል መጣ፦

²¹የሰው ልጅ ሆይ፣ የግብፅን ንጉሥ የፈርዖንን ክንድ ሰብሬአለሁ፤ እነሆ፣ ሰይፍ ለመጨበጥ እንዲበረታ ይፈወስ ዘንድ አልተጠገነም፤ በመጠምጠሚያም አልተጠመጠመም። ²²ስለዚህ ጌታ አባት እንዲህ ይላል፦ “እነሆ፣ የግብፅን ንጉሥ ፈርዖንን እቃወማለሁ፤ ክንዶቹንም፣ የበረታውንና የተሰበረውን፣ እሰብራለሁ፤ ሰይፉንም ከእጁ አወድቃለሁ። ²³ግብፃውያንንም በአሕዛብ መካከል እበትናለሁ፤ በየአገሩም እዘራቸዋለሁ። ²⁴የባቢሎንንም ንጉሥ ክንዶች አበረታለሁ፤ ሰይፌንም በእጁ አኖራለሁ፤ የፈርዖንን ክንዶች ግን እሰብራለሁ፤ ፈርዖንም በባቢሎን ንጉሥ ፊት እንደሚሞት ሰው ያቃስታል። ²⁵የባቢሎንን ንጉሥ ክንዶች አበረታለሁ፤ የፈርዖን ክንዶች ግን ይወድቃሉ። ሰይፌን በባቢሎን ንጉሥ እጅ ባኖርሁ ጊዜ፣ እርሱም በግብፅ ምድር ላይ በሚዘረጋው ጊዜ፣ እኔ አብ እንደ ሆንሁ ያውቃሉ። ²⁶ግብፃውያንንም በአሕዛብ መካከል እበትናለሁ፤ በየአገሩም እዘራቸዋለሁ። በዚያን ጊዜ እኔ አብ እንደ ሆንሁ ያውቃሉ።”