ሕዝቅኤል 29

29 ¹በዐሥረኛው ዓመት፣ በዐሥረኛው ወር፣ በወሩም በዐሥራ ሁለተኛው ቀን የአባታችን ቃል ወደ እኔ መጣ፤

²የሰው ልጅ ሆይ፣ ፊትህን በግብፅ ንጉሥ በፈርዖን ላይ አድርግ፤ በእርሱና በግብፅ ሁሉ ላይ ትንቢት ተናገር።

³ተናገር እንዲህም በል፤ ጌታ አብ እንዲህ ይላል፤ “የግብፅ ንጉሥ ፈርዖን ሆይ፣ እነሆ፣ እኔ ከአንተ ጋራ እጣላለሁ፤ አንተ በቦዮችህ መካከል የተንጋለልህ ታላቅ ዘንዶ፣ ‘አባዬ የእኔ ነው፤ ለራሴም ሠራሁት’ የምትል ነህ። ⁴ነገር ግን በመንጋጋህ መንጠቆዎችን አደርጋለሁ፤ የቦዮችህንም ዓሦች በቅርፊትህ ላይ አጣብቃለሁ፤ ከቦዮችህ መካከል እጎትትሃለሁ፤ የቦዮችህም ዓሦች ሁሉ በቅርፊትህ ላይ ይጣበቃሉ። ⁵አንተንና የቦዮችህን ዓሦች ሁሉ ወደ ምድረ በዳ እጥልሃለሁ፤ በሜዳ ላይ ትወድቃለህ፤ አትሰበሰብም፣ አትከማችም። ለምድር አራዊትና ለሰማይ ወፎች ምግብ አድርጌ ሰጥቼሃለሁ። ⁶በዚያን ጊዜ የግብፅ ነዋሪዎች ሁሉ እኔ አብ እንደ ሆንሁ ያውቃሉ፤ ለእስራኤል ቤት የሸምበቆ በትር ሆነውላቸዋልና። ⁷በእጃቸው በያዙህ ጊዜ ተሰባበርህ፣ ትከሻቸውንም ቀደድህ፤ በተደገፉብህም ጊዜ ተሰበርህ፣ እግራቸውንም አንቀጠቀጥህ።”

⁸ስለዚህ ጌታ አብ እንዲህ ይላል፤ እነሆ፣ በአንተ ላይ ሰይፍ አመጣለሁ፤ ሰውንና እንስሳንም ከአንተ አስወግዳለሁ።

⁹የግብፅ ምድር ባድማና ፍርስራሽ ትሆናለች፤ እኔም አብ እንደ ሆንሁ ያውቃሉ፤ ፈርዖን “አባይ የእኔ ነው፤ እኔም ሠራሁት” ብሏልና።

¹⁰“ስለዚህ ከአንተና ከቦዮችህ ጋራ እጣላለሁ፤ የግብፅንም ምድር ከሴዌኔ ጀምሮ እስከ ኢትዮጵያ ድንበር ድረስ ፍጹም ባድማና ምድረ በዳ አደርጋታለሁ። ¹¹የሰው እግር አያልፍባትም፣ የእንስሳም እግር አያልፍባትም፤ አርባ ዓመትም ማንም አይኖርባትም። ¹²የግብፅን ምድር በባድማ አገሮች መካከል ባድማ አደርጋታለሁ፤ ከተሞችዋም በፈረሱ ከተሞች መካከል አርባ ዓመት ባድማ ይሆናሉ። ግብፃውያንንም በአሕዛብ መካከል እበትናለሁ፤ በየአገሩም እዘራቸዋለሁ።”

¹³ጌታ አብ እንዲህ ይላልና፤ “ከአርባ ዓመት በኋላ ግብፃውያንን ተበትነውበት ከነበሩት ሕዝቦች መካከል እሰበስባቸዋለሁ። ¹⁴የግብፅን ምርኮ እመልሳለሁ፤ ወደ ተወለዱባትም ምድር ወደ ጳትሮስ አመጣቸዋለሁ፤ በዚያም ዝቅተኛ መንግሥት ይሆናሉ። ¹⁵ከመንግሥታት ሁሉ ይልቅ ዝቅተኛ ይሆናል፤ ከእንግዲህም ከአሕዛብ በላይ ራሱን ከፍ ከፍ አያደርግም። በጣም አሳንሳቸዋለሁና ከእንግዲህ በአሕዛብ ላይ አይገዙም። ¹⁶ግብፅ ከእንግዲህ ለእስራኤል ቤት መታመኛ አትሆንም፤ ነገር ግን ወደ እርስዋ ባዘነበሉ ጊዜ ኀጢአታቸውን የምታስታውስ ትሆናለች። በዚያን ጊዜም እኔ ጌታ አብ እንደ ሆንሁ ያውቃሉ።”

¹⁷በሃያ ሰባተኛው ዓመት፣ በመጀመሪያው ወር፣ በወሩም በመጀመሪያው ቀን የአባታችን ቃል ወደ እኔ መጣ፤

¹⁸የሰው ልጅ ሆይ፣ የባቢሎን ንጉሥ ናቡከደነፆር ሰራዊቱን በጢሮስ ላይ አበርትቶ አሠራ፤ ራስ ሁሉ ተላጨ፣ ትከሻም ሁሉ ተገፈፈ፤ ነገር ግን እርሱና ሰራዊቱ በጢሮስ ላይ ስለ ሠሩት ሥራ ከእርስዋ ዋጋ አላገኙም። ¹⁹ስለዚህ ጌታ አብ እንዲህ ይላል፤ እነሆ፣ የግብፅን ምድር ለባቢሎን ንጉሥ ለናቡከደነፆር እሰጣለሁ፤ እርሱም ሀብትዋን ይወስዳል፣ ምርኮዋንም ይማርካል፣ ብዝበዛዋንም ይበዘብዛል፤ ይህም ለሰራዊቱ ዋጋ ይሆናል። ²⁰ለሠራው ሥራ ዋጋ የግብፅን ምድር ሰጥቼዋለሁ፤ ስለ እኔ አድርገውታልና፤ ይላል ጌታ አብ።

²¹በዚያን ቀን ለእስራኤል ቤት ቀንድ አበቅላለሁ፤ በመካከላቸውም አፍህን እከፍትልሃለሁ። በዚያን ጊዜም እኔ አብ እንደ ሆንሁ ያውቃሉ። ^a a v21 የሚበቅለው ቀንድ የሚያድግ ኀይልንና መዳንን የሚያመለክት ምልክት ነው፤ ይኸውም አባታችን ከዳዊት ዘር በተወለደው በኢየሱስ ያስነሣውን የመዳን ቀንድ አስቀድሞ ያመለክታል።