ପିତା ଫାରୋଙ୍କ ବିଚାର କରନ୍ତି

ଫାରୋ ସେହି ମହା ନଦୀ-ଦାନବ, ଯେ ଦାବି କରେ ନୀଳ ନଦୀ ତାହାର, କାରଣ ସେ ତାହା ତିଆରି କଲା। ଆମର ପିତା ତାହାର ଚୁଆଲିରେ ବଡ଼ଶି ଲଗାଇ ତାକୁ ମରୁଭୂମିକୁ ଟାଣି ନିଅନ୍ତି। ମିସର ଇସ୍ରାଏଲ ପାଇଁ ଏକ ଫାଟିଯାଉଥିବା ନଳ ଥିଲା। ଚାଳିଶ ବର୍ଷ ଧ୍ୱଂସସ୍ଥାନ ହୋଇ ରହିବା ପରେ ତାହା ସବୁଠାରୁ ନୀଚ ରାଜ୍ୟ ରୂପେ ଫେରିଆସେ।

ଅଧ୍ୟାୟ 29।

ଦଶମ ବର୍ଷର ଦଶମ ମାସର ଦ୍ଵାଦଶ ଦିନରେ ଆମ୍ଭମାନଙ୍କ ପିତାଙ୍କ ବାକ୍ୟ ମୋʼ ନିକଟରେ ଉପସ୍ଥିତ ହେଲା,

ହେ ମନୁଷ୍ୟପୁତ୍ର, ମିସରର ରାଜା ଫାରୋଙ୍କ ବିରୁଦ୍ଧରେ ଆପଣା ମୁଖ ରଖ, ଆଉ ତାହାଙ୍କ ଓ ସମୁଦାୟ ମିସରର ବିରୁଦ୍ଧରେ ଭବିଷ୍ୟଦ୍‍ବାକ୍ୟ ପ୍ରଚାର କର।

ତୁମ୍ଭେ କଥା କହି ଜଣାଅ, ପ୍ରଭୁ, ସାର୍ବଭୌମ ପିତା ଏହି କଥା କହନ୍ତି, “ଦେଖ, ହେ ମିସରର ରାଜା ଫାରୋ, ଆପଣା ନଦୀସମୂହ ମଧ୍ୟରେ ପଡ଼ିଥିବା ଯେଉଁ ତୁମ୍ଭେ ବୃହତ୍‍ ନାଗ ‘ମୋହର ନୀଳ ନଦୀ ମୋହର ନିଜର, ମୁଁ ତାହା ଆପଣା ନିମନ୍ତେ ନିର୍ମାଣ କଲି’ ବୋଲି କହୁଅଛ, ସେହି ତୁମ୍ଭ ବିରୁଦ୍ଧରେ ଆମ୍ଭେ ଅଟୁ। ମାତ୍ର ଆମ୍ଭେ ତୁମ୍ଭ ହନୁ ମଧ୍ୟରେ ଅଙ୍କୁଶ ଦେବା, ଆଉ ତୁମ୍ଭ ନଦୀସମୂହର ମତ୍ସ୍ୟଗଣକୁ ତୁମ୍ଭ କାତି ସଙ୍ଗେ ଲଗାଇ ଦେବା; ଆମ୍ଭେ ତୁମ୍ଭ ନଦୀସମୂହ ମଧ୍ୟରୁ ତୁମ୍ଭକୁ ଟାଣି ବାହାର କରିବା, ଆଉ ତୁମ୍ଭ ନଦୀସମୂହର ସମସ୍ତ ମତ୍ସ୍ୟ ତୁମ୍ଭ କାତି ସଙ୍ଗେ ଲାଗି ରହିବ। ଆମ୍ଭେ ତୁମ୍ଭକୁ ଓ ତୁମ୍ଭ ନଦୀସମୂହର ସମସ୍ତ ମତ୍ସ୍ୟକୁ ପ୍ରାନ୍ତରରେ ନିକ୍ଷେପ କରିବା। ତୁମ୍ଭେ ଖୋଲା ପଦା ଉପରେ ପଡ଼ିବ; ତୁମ୍ଭେ ଏକତ୍ର କିମ୍ବା ସଂଗୃହୀତ ହେବ ନାହିଁ। ଆମ୍ଭେ ତୁମ୍ଭକୁ ଭୂଚର ପଶୁ ଓ ଆକାଶସ୍ଥ ପକ୍ଷୀଗଣଙ୍କୁ ଖାଦ୍ୟ ରୂପେ ଦେଇଅଛୁ। ସେତେବେଳେ ମିସରର ସମସ୍ତ ନିବାସୀ ଜାଣିବେ ଯେ ଆମ୍ଭେ ପିତା ଅଟୁ, କାରଣ ସେମାନେ ଇସ୍ରାଏଲ ବଂଶ ପ୍ରତି ନଳଖଗଡ଼ାର ଯଷ୍ଟି ସ୍ଵରୂପ ହୋଇଅଛନ୍ତି। ସେମାନେ ଯେତେବେଳେ ତୁମ୍ଭକୁ ହସ୍ତରେ ଧରିଲେ, ସେତେବେଳେ ତୁମ୍ଭେ ଭାଙ୍ଗିଯାଇ ସେମାନଙ୍କ ସ୍କନ୍ଧ ବିଦୀର୍ଣ୍ଣ କଲ; ପୁଣି ସେମାନେ ଯେତେବେଳେ ତୁମ୍ଭ ଉପରେ ଆଉଜିଲେ, ସେତେବେଳେ ତୁମ୍ଭେ ଭାଙ୍ଗିଯାଇ ସେମାନଙ୍କ ସମସ୍ତ କଟି ଟଳମଳ କରାଇଲ।”

ଏଣୁ ପ୍ରଭୁ, ସାର୍ବଭୌମ ପିତା ଏହି କଥା କହନ୍ତି, ଦେଖ, ଆମ୍ଭେ ତୁମ୍ଭ ବିରୁଦ୍ଧରେ ଖଡ଼୍ଗ ଆଣୁଅଛୁ, ଆଉ ତୁମ୍ଭ ମଧ୍ୟରୁ ମନୁଷ୍ୟ ଓ ପଶୁକୁ ଉଚ୍ଛିନ୍ନ କରିବା।

ତହିଁରେ ମିସର ଦେଶ ଧ୍ଵଂସସ୍ଥାନ ଓ ଉଜାଡ଼ ହେବ, ପୁଣି ସେମାନେ ଜାଣିବେ ଯେ ଆମ୍ଭେ ପିତା ଅଟୁ— କାରଣ ଫାରୋ କହିଲା, “ନୀଳ ନଦୀ ମୋହର, ମୁଁ ତାହା ନିର୍ମାଣ କଲି।”

“ଏଣୁ ଦେଖ, ଆମ୍ଭେ ତୁମ୍ଭ ବିରୁଦ୍ଧରେ ଓ ତୁମ୍ଭ ନଦୀସମୂହ ବିରୁଦ୍ଧରେ ଅଛୁ, ଆଉ ଆମ୍ଭେ ମିସର ଦେଶକୁ ସବନ ଠାରୁ କୂଶର ସୀମା ପର୍ଯ୍ୟନ୍ତ ନିତାନ୍ତ ଉଜାଡ଼ ଓ ଧ୍ଵଂସସ୍ଥାନ କରିବା। କୌଣସି ମନୁଷ୍ୟର ଚରଣ ତହିଁ ମଧ୍ୟଦେଇ ଗମନ କରିବ ନାହିଁ, କି କୌଣସି ପଶୁର ଚରଣ ତହିଁ ମଧ୍ୟଦେଇ ଗମନ କରିବ ନାହିଁ; ଚାଳିଶ ବର୍ଷ ପର୍ଯ୍ୟନ୍ତ ସେଠାରେ କେହି ବାସ କରିବ ନାହିଁ। ଆମ୍ଭେ ମିସର ଦେଶକୁ ଧ୍ଵଂସିତ ଦେଶସମୂହ ମଧ୍ୟରେ ଉଜାଡ଼ ସ୍ଥାନ କରିବା, ଆଉ ତାହାର ନଗରସମୂହ ଉଚ୍ଛିନ୍ନ ନଗର ମଧ୍ୟରେ ଚାଳିଶ ବର୍ଷ ପର୍ଯ୍ୟନ୍ତ ଉଜାଡ଼ ହୋଇ ରହିବ। ପୁଣି ଆମ୍ଭେ ମିସରୀୟମାନଙ୍କୁ ନାନା ଦେଶୀୟମାନଙ୍କ ମଧ୍ୟରେ ଛିନ୍ନଭିନ୍ନ କରିବା ଓ ନାନା ଦେଶ ମଧ୍ୟରେ ବିକ୍ଷିପ୍ତ କରିବା।”

କାରଣ ପ୍ରଭୁ, ସାର୍ବଭୌମ ପିତା ଏହି କଥା କହନ୍ତି, “ଚାଳିଶ ବର୍ଷର ଶେଷରେ ଆମ୍ଭେ ମିସରୀୟମାନଙ୍କୁ, ଯେଉଁ ଗୋଷ୍ଠୀସମୂହ ମଧ୍ୟରେ ସେମାନେ ଛିନ୍ନଭିନ୍ନ ହୋଇଥିଲେ, ସେମାନଙ୍କ ମଧ୍ୟରୁ ସଂଗ୍ରହ କରିବା। ଆମ୍ଭେ ମିସରର ବନ୍ଦୀତ୍ଵ ଫେରାଇ ଆଣିବା, ପୁଣି ସେମାନଙ୍କ ଜନ୍ମଭୂମି ପଥ୍ରୋଷ ଦେଶକୁ ସେମାନଙ୍କୁ ଫେରାଇ ଆଣିବା, ଆଉ ସେଠାରେ ସେମାନେ ଏକ ହୀନ ରାଜ୍ୟ ହେବେ। ତାହା ରାଜ୍ୟସମୂହ ମଧ୍ୟରେ ଅତି ହୀନ ହେବ, ପୁଣି ଆଉ କେବେ ଆପଣାକୁ ନାନା ଦେଶୀୟଙ୍କ ଊର୍ଦ୍ଧ୍ଵରେ ଉନ୍ନତ କରିବ ନାହିଁ। ଆମ୍ଭେ ସେମାନଙ୍କୁ ଏତେ କ୍ଷୀଣ କରିବା ଯେ ସେମାନେ ଆଉ ନାନା ଦେଶୀୟଙ୍କ ଉପରେ କର୍ତ୍ତୃତ୍ଵ କରିବେ ନାହିଁ। ପୁଣି ମିସର ଆଉ କେବେ ଇସ୍ରାଏଲ ବଂଶର ଭରସାସ୍ଥାନ ହେବ ନାହିଁ, ମାତ୍ର ସେମାନେ ଯେତେବେଳେ ତାହାର ଅନୁଗାମୀ ହୋଇ ଫେରିଲେ, ସେତେବେଳର ସେମାନଙ୍କ ଅପରାଧର ସ୍ମାରକ ସ୍ଵରୂପ ହେବ। ସେତେବେଳେ ସେମାନେ ଜାଣିବେ ଯେ ଆମ୍ଭେ ପ୍ରଭୁ, ସାର୍ବଭୌମ ପିତା ଅଟୁ।”

ସତାଇଶତମ ବର୍ଷର ପ୍ରଥମ ମାସର ପ୍ରଥମ ଦିନରେ ଆମ୍ଭମାନଙ୍କ ପିତାଙ୍କ ବାକ୍ୟ ମୋʼ ନିକଟରେ ଉପସ୍ଥିତ ହେଲା,

ହେ ମନୁଷ୍ୟପୁତ୍ର, ବାବିଲର ରାଜା ନବୂଖଦ୍‍ନିତ୍ସର ସୋରର ବିରୁଦ୍ଧରେ ଆପଣା ସୈନ୍ୟଦଳକୁ କଠିନ ପରିଶ୍ରମ କରାଇଲା। ପ୍ରତ୍ୟେକ ମସ୍ତକ ଘଷି ଟାକ ହେଲା, ପ୍ରତ୍ୟେକ ସ୍କନ୍ଧ ଘଷି ଛଳିଗଲା, ତଥାପି ସୋର ବିରୁଦ୍ଧରେ ସେ ଯେଉଁ କାର୍ଯ୍ୟ କଲା, ତହିଁ ନିମନ୍ତେ ସେ କି ତାହାର ସୈନ୍ୟଦଳ ସୋରଠାରୁ କୌଣସି ବେତନ ପାଇଲେ ନାହିଁ। ଏଣୁ ପ୍ରଭୁ, ସାର୍ବଭୌମ ପିତା ଏହି କଥା କହନ୍ତି, ଦେଖ, ଆମ୍ଭେ ବାବିଲର ରାଜା ନବୂଖଦ୍‍ନିତ୍ସରକୁ ମିସର ଦେଶ ଦେବା। ସେ ତାହାର ଧନସମ୍ପତ୍ତି ବହିନେବ, ତାହାର ଲୁଟଦ୍ରବ୍ୟ ହରଣ କରିବ, ତାହାର ଅପହୃତ ଦ୍ରବ୍ୟ ଲୁଟ କରିବ— ଏହା ତାହାର ସୈନ୍ୟଦଳର ବେତନ ହେବ। ସେ ଯେଉଁ କାର୍ଯ୍ୟ କଲା, ତହିଁର ପାରିଶ୍ରମିକ ସ୍ଵରୂପେ ଆମ୍ଭେ ତାହାକୁ ମିସର ଦେଶ ଦେଇଅଛୁ, କାରଣ ସେମାନେ ଆମ୍ଭ ନିମନ୍ତେ ତାହା କଲେ, ଏହା ପ୍ରଭୁ, ସାର୍ବଭୌମ ପିତା କହନ୍ତି।

ସେହି ଦିନ ଆମ୍ଭେ ଇସ୍ରାଏଲ ବଂଶ ନିମନ୍ତେ ଏକ ଶୃଙ୍ଗ ଅଙ୍କୁରିତ କରିବା, ଆଉ ସେମାନଙ୍କ ମଧ୍ୟରେ ତୁମ୍ଭର ମୁଖ ଖୋଲିବା। ସେତେବେଳେ ସେମାନେ ଜାଣିବେ ଯେ ଆମ୍ଭେ ପିତା ଅଟୁ। ^a